1 Timoti 2 - Kaa n Kəzə̀ n fəghə mə

Jìi zey dzûmə tə Klisto tə khə ni ngɔɔmə Zə̀ kə tii

¹ N luʼu kə sə isə kə, n ləghə nə̀ ghaa i gɔŋŋə tə ghə̂ ghə adzəm, nɔɔ ndow tə Zə̀ kə nə tə gaamə ghə, gɔŋŋə n tow u ghə, fuu ndow soʼo kəzɔŋŋə tə Zə̀ kə n ghəə ghey tə ghəŋənə tə ghə̂ ghə adzəm.

² Ghaa i gɔŋŋə n tow wə udəŋ, gɔŋŋə soʼo n tow u ghə̂ ghən ghə saʼa ghə̂ ghə, sey nə̀, saa loʼ ni zuŋ muu, muu soʼo muu dzuŋu zə ghi ghə̂ ghə adzəm n jìi zey i dzɔbənə n tə Zə̀ kə, dii ndow soʼo mwam u dzuŋu wə tə ghə̂ ghə.

³ I dzɔbənu ni gɔŋŋə tə ghə̂ ghə adzəm n ndzoʼo jii zən, à loʼ soʼo ghəə zey Zə̀ kə, tə loʼnə bəghəshi ə saa ləghənə.

⁴ Tə ləghə nə̀ aghə̂ adzəm a keeli ibəghəshi, ghə keeli soʼo isəŋə.

⁵ I loʼ sey n təŋkey, Zə̀ kə loʼ kə kəmɔ̀ʼ, wù loʼ soʼo umɔʼ tə təmə dzəŋinə ghə̂ ghə ghi Zə̀ kə, wù tii loʼ Yeso Klisto.

⁶ À loʼ wi tə â fuunə wû u wi wə ni kùmshi tow u ghə̂ adzəm. Yeso â bə kpu n tow u ghə̂ adzəm tə a loʼ tsəə ni dii tsu nə̀ nəŋə zey Zə̀ kə â bayyə naŋa ni bəghəshi aghə̂ tii n kpii.

⁷ À wən loʼ zuŋ key Zə̀ kə â sàynə mə tə a loʼ ngəd tə Yeso Klisto, tûm ndow soʼo mə tə̀ a loʼ wù dii nə̀ n ndow naʼa tûm i dzuŋu zə tə ghə̂ ghən ghə way ghə̂ a Təjuu ghə bòʼ bəghəm i fə̀ŋ nsə isəŋə kuum Yeso. Ghəə ghən n dzanə, loʼ isəŋə, n badla dzə way ghəə ghə.

⁸ N ləghə nə̀ gheynum ghə i gɔŋŋə n luʼu tey tədzəm ghə dzəŋi zuŋŋə doʼonə tii. Gheynum ghey ghə fuu dzənə muu i ghə zə tə Zə̀ kə, ghə i keeli kɔʼɔ wɔɔ a ghə idəŋ abə ghə gɔŋŋənə nə̀ ghə fəələ way nəghə mə nkee nə̀ baŋŋə way fəghəm tə.

⁹ N ləghə soʼo nə gheyzən ghən ghə loʼnə dzûmə tə Klisto tə, ghə i labə tsu wû i ghə zə n jìi zey i khənə kɔʼləmə. Ghə khə way ni dzəŋŋə ndzə̂ tə ufəŋ tə nkee ni faalə kətow n fə u nyiəllə wə n jìi zey sə̂ a ghə̂ ghə i shiənə n kow ghə. Ghə khə soʼo way ni dzəŋŋə nyiə u wən i taw zə nkee ndzə tən wən i tawnə.

¹⁰ Ghə fəd khə ni ghəŋŋə ghəə ghey a fiilənə weyzən wey tə dza nə̀ i bəghəm fuu tə Zə̀ kə.

¹¹ Weyzən khə ni zoʼlə ghəə ghə mɔŋ mɔŋ, fuu may ndow soʼo ingɔɔmə tə ghə̂ ghey ghə diinə wi.

¹² N ka bəghəm dzə nə̀ weyzən i dii nkee nə tə i khə daʼa kə n kow weynum. Weyzən khə ni zow doʼo mɔŋ abə ghə diinə ghəə ghə n dzəŋi kə dzûmə tə Klisto.

¹³ I loʼ sey n təŋkey Zə̀ kə â bɔm Adam isə̂ tə wi ni bə bɔm If.

¹⁴ Ni ndow n sə kə, â way dzə Adam Satan â nəb fuunə. Â fəd loʼ weyzən tə â nəb fuunə, sey, tə n bwuulə maʼa tsu laŋ K-a-zə̀.

¹⁵ Weyzən nə keeli ibəghəshi n bam i waa ghən tə nə jiə bənə nsə abə tə loʼ ni kow fə̀ŋ n bəghəm i fə̀ŋ i wi, nə iləghə nsə n jìi zey i zownə nə̀ tə zuŋu tsu uwû.