1 Jɔn 4 - Kaa n Kəzə̀ n fəghə mə

Jìi zey wə loʼ ni keeli zay kən kə dzanə isəŋə nsə zay kə tsɔŋɔ kə

¹ Fə̂ ghuŋ a dzuŋu ghə, i kə ghaa nə tsəmə bəghəm fuunə tə̀ ghə̂ ghən ghə dza bənə tə ghaa nə̀ ghə ghɔɔmə n daʼa kə Zay kə Zow kə. Ghaa i mɔm koʼo tsu dzə isə nə̀ zay kə tii kə nuu bə n wɔ Zə̀ kə, boʼnə tûm tə Kəzə̀ tə tsɔŋɔ tə kəmənu fa n mbi.

² Jii zey saa keelinə ghə̂ ghən ghə khənə Zay K-a-zə̀ kə loʼ nə, wù wən tə bəghəmnə nə̀ Klisto â bə fa n mbi n wû u wù sɔŋtsuʼ, tə sey khə zay key kə nuu bə n wɔ Zə̀ kə.

³ Abə wù dza bənə tə ghaa nə̀ tə nuu bə n səə Zə̀ kə nə̀ tə ka bəghəm kɔʼ dzə isəŋə kuum Yeso, wù tii khə dzə way zay key kə nuu bənə n wɔ Zə̀ kə. Ndzoʼo wù tii khə zay kə wù təngəmə ə Klisto wən ghaa zow dzənə nə̀ tə i bəghənu fa n mbi, zə a loʼ nə̀ tə ndzəm loʼnu fa n mbi.

⁴ Ghaa ghən ghaa loʼnə waa ghuŋ a dzuŋu ghə, ghaa loʼ waa a Kəzə̀. Ghaa mâ təm zə ghə̂ ghən, boʼnə zay kən kə loʼnə n kôw ghaa, kə n taw tsəghə shi zay key kə loʼnə n kow ghə̂ ghey ghə loʼnə fa n mbi.

⁵ Tûm tə tsɔŋɔ tən loʼ ghə̂ a mbi, sey, ghə ghɔɔmə ghəə a mbi, mbi a zowkeeli soʼonə ghə.

⁶ Saa fəd loʼ ghə̂ a Kəzə̀. Ghə̂ ghən ghə loʼnə ghə̂ a Kəzə̀ ghə, ghə zownu tə saa. Abə ghə mə way ghə̂ a Kəzə̀ ghə, ghə mə way ni zow tə saa. À wən loʼ nghee saa keelinə wù wey tə khənə zày key kə ghəŋŋənə nə̀ wù i dza isəŋə nkee zày key kə ghəŋŋənə nə̀ wù i badla ghəə ghə.

Ləghə i nuu bə n wɔ Zə̀ kə

⁷ Fə̂ ghuŋ a dzuŋu ghə, saa ndow kə n sə kə ni ləghə tiilə wû zə, boʼnə ləghə i nuu bə n wɔ Zə̀ kə. Wù wən tə khə ləghə zə loʼ waa Kəzə̀, tə u khə soʼo nə Zə̀ kə.

⁸ Wù wən tə khə way ləghə zə, khə soʼo way Zə̀ kə, n təŋkey, ləghə i nuu bə n wɔ Zə̀ kə.

⁹ Zə̀ kə â dii bə nghee tə ngii ləghənə saa tii, nghee tə â tûm bə sɔʼi fə waa wi fa n mbi, sey nə̀, saa i keeli muu zə itsali.

¹⁰ Ndzəm ndzəm kə iləghə kə way dzə nə̀ saa â ləghə ndow Kəzə̀, a fəd loʼ wi tə ləghə bənə saa isə, tûm bə waa wi tə a loʼ umaʼlə nə̀ tə bə ney nuu ghəə a saa a bəbə ghə.

¹¹ Fə̂ ghuŋ a dzuŋu ghə, jìi zey Zə̀ kə â ngii ləghənə saa tii, à loʼ soʼo sey saa ndzəm khə ni ləghə tiillə wû i saa zə.

¹² Wù loʼ ka kam koʼ koʼ tsə Zə̀ kə. Abə saa fədlə ləghə tiillə wû i saa zə, Zə̀ kə i loʼ nə kəfə kəmɔʼ ghi saa. Sey, ləghə i wi zə i loʼ ghi ndzəmə dii bə n ghəə a saa a ghəŋŋə ghə.

¹³ Zə̀ kə n fuu saa n Zay kə wi kə ni dii bə nə̀ saa loʼ nə kəfə kəmɔʼ ghi wi, tə u loʼ soʼo nə kəfə kəmɔʼ ghi saa.

¹⁴ Saa n koʼ, tiilə dza soʼo nə Bày a tûm bə waa wi nə̀ tə bə bəghəshi ghə̂ a mbi.

¹⁵ Abə wù dza nə̀ Yeso loʼ Waa Kəzə̀, tə sey muu nə kəfə kəmɔʼ ghi Zə̀ kə, Zə̀ kə a muu soʼo nə kəfə kəmɔʼ ghi wi.

¹⁶ Wû i saa, saa khənu, saa a bəghəm fuu ndow soʼonə n ləghə zən Zə̀ kə khənə n kôw saa. Ləghə i nuu bə n wɔ Zə̀ kə, sey nə̀ ghə̂ ghey ghə muunə nə iləghə, ghə muu nə kəfə kəmɔʼ ghi Zə̀ kə, Zə̀ kə a muu soʼonə nə kəfə kəmɔʼ ghi ghə.

¹⁷ A wey loʼ ghə i tii zə saa khə ni ngii khə ləghə zə n fəŋŋə kə saa, sey nə̀ saa i khə way tsəŋ i loʼ zə n tsuʼ fey Zə̀ kə i saʼanə mbi tii. Saa i tsəŋ way ghə i loʼ zə n təŋkey muu i saa i loʼ tə a loʼ muu i Yeso fa n mbi.

¹⁸ Tsəŋ i loʼ i way dzə abə wə ndzəmə ləghənə waazu. Ndzəm kə iləghə kə dzum maʼa itsəŋ n təŋkey tsəŋ i khə ighəə ni ghəŋə ghi ngoʼ.

¹⁹ Saa khə iləghə n wû i saa nsə tə Zə̀ kə, n təŋkey, Zə̀ kə a khə ləghə zey bə saa isə.

²⁰ Abə saa dzanə nə̀ saa ləghə Kəzə̀, fədlə baa waazə a saa, saa loʼ ghə̂ a badla ghə aghəə ghə, n təŋkey, abə wə way ni ləghə waazu nə̀ wə koʼo ndownu wi, wə i ləghə ngee Zə̀ kə nə̀ wə ka wi kam koʼ koʼ tsə ə?

²¹ Laŋ kən Klisto â fuu bənə tə saa, kə loʼ nə̀, wù wey tə ləghənə Zə̀ kə, khə ni ləghə soʼo waazə.