1 Jɔn 3 - Kaa n Kəzə̀ n fəghə mə

Dzûmə tə Klisto tə loʼ waa a Kəzə̀

¹ Koʼo na nghee tə̀ Bày ngii diinə ləghə i wi zə tii n kow saa. Tə n ghəŋə nə̀ ghə i tɔŋŋə saa nə̀ saa loʼ waa a Kəzə̀. Zə a ndzəm loʼ soʼonə nə̀ saa loʼ waa a Kəzə̀. Zuŋ key ghə̂ a mbi ghən koʼo keeli way saa loʼ nə̀ ghə khə way Zə̀ kə.

² Fə̂ ghuŋ a dzuŋu ghə, nyisa wən saa loʼnə waa a Kəzə̀ ghə, saa kam khə way fə key saa i bə doʼlənə ghii kə. Saa kee khə kə nə abə Klisto i bənə, saa i bɔɔmə doʼlə kə tə a loʼ wi, n təŋkey, saa i koʼo ndow kə wi nghee tə bɔɔmə loʼnə tii.

³ Wù wən tə khə ndzoʼo moʼlə zən n kow Klisto, sey sow zowwə naŋa wû u wi nə̀ tə i zow ighələ tə Klisto zownə.

⁴ Wù wən tə ghəŋŋə ghəə a bəbə ghə, bwuulə maʼa laŋ K-a-zə̀, n təŋkey, ghəə a bəbə ghə adzəm bwuulə maʼa laŋ K-a-zə̀.

⁵ Ghaa khənu nə Klisto a bə fa n mbi ni bə ney nuu ghəə a bəbə ghə, loʼ sey nə̀ tə ka kam ghəŋə koʼ tsə ghə i bəbə i loʼ zə.

⁶ Sey, wù wən loʼnə nə kəfə kəmɔʼ ghi Klisto, tə khə way ndow n sə kə ni ghəŋŋə ghəə a bəbə ghə. Wù wən tə kee ndow kə n sə kə ni ghəŋŋə ghəə a bəbə ghə, tə sey khə way wi, khə soʼo way wù wey tə loʼnə ghii wə.

⁷ Ghaa ghən ghaa loʼnə waa ghuŋ a dzuŋu ghə, kə ghaa i bəghəm nə wù loʼ nəb ghaa. Wù wey tə ghəŋŋənə ghəə ghə tsətsəghə n sə̂ K-a-zə̀, sey loʼ tsətsəghə ighələ tə̀ Klisto loʼnə tsətsəghə n sə̂ K-a-zə̀.

⁸ Wù wey tə ghəŋŋə nduŋŋə ndow kənə ghəə a bəbə ghə, loʼ waa avəətsəə, n təŋkey, vəətsəə a ghəŋŋə tənnə tsə kə ghəə a bəbə ghə ni ney nuu bə n nəŋə zey Zə̀ kə â bɔmnə mbi. Zuŋ key Waa Kəzə̀ â bənə tii, â loʼ ni bə ləŋi maʼa tən fwaʼ kə avəətsəə.

⁹ Ghə̂ ghən ghə loʼnə waa a Kəzə̀ ghə, kəm way ni ghəŋŋə ghəə a bəbə ghə bòʼ nə̀ mwam u Kəzə̀ a loʼ n kow ghə, nsə təŋkey, Zə̀ kə loʼ Bày ghə, sey, ghə kəm way ni tsəghə ndow n sə kə ni ghəŋŋə ghəə a bəbə ghə.

¹⁰ Jìi zey saa koʼo keelinə waa a Kəzə̀ ghə nsə nghee waa ghə avəətsəə ghə tii loʼ nə̀, wù wey tə ghəŋŋə ghəə zey i kpiilə way, way dzə waa Kəzə̀, ighələ ghi wù wən tə ləghə way waazə a wi ghə.

Ghaa i ləghə tiillə wû i ghaa zə

¹¹ Tûm zey ghaa â zow bənə n nəŋə zey ghaa â bəghəmnə tii tə̀ Klisto â loʼ nə̀ saa khə ni ləghə tiilə wû i saa zə.

¹² Saa khə dzə way ni doʼo tə a loʼ Ken tə â loʼnə waa avəətsəə, tə n wey maʼa tsu waazə ə wi Ebel. Â loʼ kee tə â wey maʼanə wi ə? Â loʼ n təŋkey tə â ghəŋŋə ghəə a bəbə ghə, waazə ə wi n kee ghəŋŋə ghəə ghən a loʼnə tsətsəghə n sə̂ K-a-zə̀.

¹³ Sey waazə ghə, kə dzuu zə i zum ghaa abə ghə̂ a mbi a baanə ghaa.

¹⁴ Saa khənu nə̀ və i kəm khə way daʼa kə n kow saa, saa nya khə muu zən i may way, n təŋkey, saa ləghə tiilə waazə a saa. Wù wey tə khə way ləghə zə, və i sey nam khənu daʼa kə n kow wi.

¹⁵ Wù wən tə bàanə waazə, loʼ wù wən tə weynə ghə̂ ghə. Ghaa khə soʼonu nə̀ wù wey tə weynə ghə̂ ghə i keeli way muu zə itsali zə.

¹⁶ Ghəə ghən a ghəŋŋə nə̀ saa zoʼlə keeli fə key ləghə zə iwû i loʼnə ghii kə loʼ nə̀ Klisto a kpu n tôw u saa. Sey, saa khə soʼo ni bəghəm ni kpu tow u waazə a saa.

¹⁷ Ghə̂ a kûm ghən fa n mbi ghə koʼo ndownə waazə ghən ghə muunə nə̀ ghə khə way fə kə, ka kwɔɔlə isî n kow ghə, ghə way dzə ni dza nə̀ ghə ləghənu Zə̀ kə.

¹⁸ Waa ghuŋ ghə, kə saa nə diinə ləghə zə nə idzuu kələ. Saa khə ni fədlə dii ndow ndzəm ndzəm kə iləghə kə n ghəə ghey saa ghəŋŋənə.

Saa i khə fə̀ŋ ni bə n sə̂ K-a-zə̀

¹⁹ Ghəə ghey saa ghəŋŋənə dii bənu nə̀ ghəə ghey saa dzanə loʼ isəŋə, sey, saa i loʼ ni bə n sə K-a-zə̀ nə̀ saa khə way tsəŋ zə n fə̀ŋ.

²⁰ Abə fə̀ŋ tə saa tə diinə nə̀ saa n ghəŋə bəəbə, saa khənu nə̀ Zə̀ kə dow tsəghənu fə̀ŋ tə saa tə, tə u khə may soʼonə ghəə ghey a loʼnə n fə̀ŋ tə saa.

²¹ Fə̂ ghuŋ a dzuŋu ghə, abə fə̀ŋ tə saa tə ka dii nə̀ saa n ghəŋə bəəbə, saa n khə fə̀ŋ ni bə n sə̂ K-a-zə̀ nə̀ saa tsəŋə way.

²² Saa i keelinu fə wən saa nɔɔnə n wɔ wi n təŋkey, saa naŋŋənu laŋ u wi wə, ghəŋə soʼo ghəə ghey a dzɔbənə tə wi.

²³ Laŋ kən tə tsəʼlə bənə tə saa loʼ nə̀ saa bəghəm fuu tə waa wi Yeso Klisto nsə nə̀ saa i ləghə tiilə wû i saa zə tə Klisto dzanə tə saa.

²⁴ Ghə̂ ghey ghə naŋŋənə laŋ K-a-zə̀ kə, ghə muu nə kəfə kəmɔʼ ghi Zə̀ kə, Zə̀ kə a muu soʼonə nə kəfə kəmɔʼ ghi ghə. À loʼ Zay kə Zow kə, kə ghəŋənə nə̀ saa keeli nə̀ Zə̀ kə muu n kow saa.