1 Jɔn 2 - Kaa n Kəzə̀ n fəghə mə

Klisto loʼ wù wən tə gaamənə saa

¹ Waa ghuŋ a dzuŋu ghə, n tɔ̀ɔ bə ghəə ghən tə ghaa nə̀ kə ghaa nə ghəŋŋə ghə i bəbə zə. Sey nə̀, abə wù ghaa u loʼ u kpaʼi ghəŋə ghə i bəbə zə, saa khə wù loʼ tə buʼunə wɔɔ kə n wɔ Bày n tow u saa tɔŋɔ Yeso Klisto, tə loʼnə wù wey tə loʼnə tsətsəghə.

² À loʼ wi Zə̀ kə â fuunə tə̀ a loʼ umaʼlə nə tə kpu n tow u saa ni sow maʼa bəb i saa. Tə â kad sow maʼa kə bəb i saa zə, tə â sow maʼa soʼo bəb i ghə̂ adzəm fa n mbi.

Iləghə nsə baa zə wû n fəŋŋə kə ghə̂ a Kəzə̀

³ Abə saa naŋŋənə laŋ u Kəzə̀ wə, i sey dii nə̀ saa kuum khənu wi.

⁴ Wù wən tə dzanə, “N khənu wi.” Kee fədlə ghəŋŋə way ghəə ghey tə dzanə, tə sey loʼ wù badla wə aghəə wə, isəŋə i loʼ zə u way soʼo n kow wù tii.

⁵ Wù wey tə naŋŋənə ghɔɔmə i Kəzə̀ zə, tə ndzəmə dii bənu nə̀ tə ləghənu Zə̀ kə. Jìi zən saa keelinə nə̀ muu i saa i loʼ dzəŋi ghi wi, loʼ nə,

⁶ wù wey tə dzanə nə̀ tə loʼ nə kəfə kəmɔʼ ghi Zə̀ kə, tə khə ni muu ighələ tə Yeso Klisto â muunə.

Laŋ kə fəghə kə

⁷ Fə ghuŋ a dzuŋu ghə, a way dzə laŋ kə fəghə kə n tɔ̀ɔ bənə tə ghaa. A fəd loʼ laŋ kə wey kə ghaa â khə tsənə ni ney nuu bə n tsuʼ fey ghaa â bəghəmnə tii tə̀ Klisto. Laŋ kə wey kə tii kə loʼ tûm i dzuŋu zən ghaa â zow dzənə.

⁸ Jìi zən Klisto a muunə tii nsə jii zən ghaa muunə tii, i ndzəmə dii bə nə laŋ kən kuum loʼ kə fəghə kə, n təŋkey, ləm kə nya tsəghə daŋŋə ndownu, daa kən kə ndzəm loʼnə daa kə u bəghənə.

⁹ Abə wù dzanə nə̀ n muu nə utsə, kee baa ndow waazə ə wi, wù tii sey nam muu nə kələm.

¹⁰ Wù wey tə ləghə tiilənə waazə wi, sey muu nə utsə, ghə i loʼ zə u way soʼo n muu i wi i loʼ ni chimmə wù loʼ nə̀ tə bwu laŋ K-a-zə̀.

¹¹ Wù wey tə kee bàanə waazə ə wi, loʼ nə kələm. Tə muu nə kələm, khə soʼo way luʼu key tə ndownə tii, n təŋkey, bəb zə n ghəŋə nə̀ tə fəb doʼo bə.

¹² N tɔ̀ɔ bə ghəə ghən tə ghaa ghən ghaa loʼnə waa ghuŋ ghə, n təŋkey, Zə̀ kə n ghəə a ghaa a bəbə a neyzəə bòʼ ghəə zey Klisto a ghəŋənə tə ghaa.

¹³ N tɔ̀ɔ bə tə ghaa ghə bày, tənkey, ghaa n doʼo ghə̂ ghey ghə loʼ nə̀ ghə n keeli Yeso Klisto wən tə â loʼnə tə mbi ni kaʼ. N tɔ̀ɔ bə tə ghaa fəghaŋ, n təŋkey ghaa n təm zə̂ wù təngəmə ghaa tɔŋɔ Satan.

¹⁴ N tɔ̀ɔ bə tə ghaa ghən ghaa loʼnə waa ghuŋ ghə, n təŋkey, ghaa n doʼo ghə̂ ghən ghə khənə Zə̀ kə tə loʼnə Bày. N tɔ̀ɔ bə tə ghaa, ghə bày, n təŋkey ghaa khənu wi wən tə â loʼnə tə̀ Zə̀ kə ni bɔm mbi. N tɔ̀ɔ bə tə ghaa ghaŋ fə, n təŋkey, ghaa khə kədaʼa, ghɔɔmə i Kəzə̀ zə a loʼ soʼonə n kow ghaa nsə nə ghaa n təm zə wù təngəmə ghaa wən tə loʼnə Satan.

¹⁵ I kə ghaa nə ləghənə fə u mbi wə, nkee fə kə mbi kə loʼ kə. Wù wey tə ləghənə fə u mbi wə, tə sey ləghə way Bày tə loʼnə Zə̀ kə.

¹⁶ N fə wən udzəm u loʼnə fa n mbi, tɔŋɔ u wən gow uwû ləghənə, u wən ghə̂ a koʼonə, ghə n ləghə ni keeli n muu i ghə, nsə fə wən fa n mbi ghə̂ a kɔʼlənə wû zə tii, fə kə loʼ kə way tii kə nuulə bənə n wɔ Bày, udzəm u loʼ fə u mbi.

¹⁷ Mbi zən nsə fə wən udzəm u loʼ nə tii ghə̂ a ləghə nə̀, u tsəghə daŋŋənu. À kee loʼ nə̀, ghə̂ ghey ghə ghəŋŋənə ghəə ghey Zə̀ kə ləghənə, ghə keeli muu zə itsali.

Ney na ghə̂mə zə ghi wù təngəmə ə Klisto

¹⁸ Waa ghuŋ a dzuŋu ghə, a wən loʼ nəŋə zən mbi may bə nə tii. Ghaa n zow nə̀ wù təngəmə ə Klisto bəghənu. Nyisa wən, ndəmə ghə̂ a təngəmə a Klisto ghə n baa bə. À wən loʼ jìi zey saa i keelinə tii nə nəŋə zey mbi i maynə zə n kpi.

¹⁹ Ghə̂ a təngəmə ghən â way dzəŋi dzə nə kəfə kəmɔʼ ghi saa. À wey loʼ ghə i tii zə ghə â nuu shinə n fəŋŋə kə saa. Abə zə â loʼnə nə̀ ghə â loʼ dzəŋi nə kəfə kəmɔʼ ghi saa, ghə â doʼo dzəŋi bə ghi saa, ghə a ka nuu dzə. Nghee ghə â fəd nuu shinə, i dii bə n mgbaŋ nə̀ wù ghə umɔʼ â way koʼ tsə ghi saa.

²⁰ Abə ghaa, ghaa way dzə tə a loʼ ghə bòʼ nə̀ Klisto n tsoʼlə ghaa n mbvə mən n nuu bənə n wɔ Zay kə Zow kə, kə u ghəŋŋə nə̀ ghaa adzəm, ghaa keeli isəŋə.

²¹ N tɔ̀ɔ bə tə ghaa nə a way dzə nə ghaa khə way isəŋə ə tii, n fədlə tɔ̀ɔ bə n təŋkey ghaa khənu isəŋə nsə nə ghaa khə soʼonu nə̀ ghəə a badla a way ni shi koʼ tsə nə isəŋə.

²² Wù wən tə badlanə ghəə ghə loʼ wù wən tə tuu maʼanə nə̀ Yeso way dzə wù wən Zə̀ kə tsuʼ naŋanə. À loʼ ndzoʼo wù tii tə loʼnə wù təngəmə ə Klisto. Tə tuu maʼa Bày nsə Waa wi.

²³ Wù wey tə tuu maʼanə waa, sey tuu maʼa soʼo Bày. Wù wən tə bəghəm naŋanə waa sey bəghəm naŋa soʼonu Bày.

²⁴ Sey, ghaa i tɔʼɔ naŋŋə tûm zən ghaa â zownə n nəŋə zey ghaa â bəghəmnə tii tə̀ Zə̀ kə. Abə ghaa naŋŋə dzɔbənə tûm tii n fə̀ŋ tə ghaa, ghaa i loʼ tən tsə kə nə kəfə kəmɔʼ ghi Waa nsə Bày.

²⁵ Klisto a təb naŋa nə̀ fə kən tə i fuunə tə saa, loʼ muu itsali zə.

²⁶ N ghəə ghən sa tɔ̀ɔ bə tə ghaa kuum ghə̂ ghən ghə dəmənə ni sii ndzəŋ ghaa.

²⁷ A kee bə ghaa, Klisto n ghaa tsuʼ naŋa nghee tə fuunə ghaa n Zay kə Zow kə wi kə. Nghee Zay kə Zow kə loʼ dzənə n kôw ghaa, ghaa kəm khə dzə way ni kəŋ wù loʼ nə̀ tə dii ghaa n ghəə ghə. Tə i dii ghaa n ghəə ghey adzəm ghaa ləghənə ni keeli. Ghəə ghən tə i diinə tə ghaa loʼ isəŋə, a way dzə ghəə a badla ghə. Sey, dzûmə na ghəə ghey tə diinə tə ghaa, tə ghaa doʼo nə kəfə kəmɔʼ ghi Klisto.

²⁸ Sey, ghaa ghən ghaa loʼnə waa ghuŋ ghə, ghaa doʼo tsu kə nə kəfə kəmɔʼ ghi Klisto, sey nə̀ abə tə i bə dzəŋŋə nə̀, saa i khə fə̀ŋ ni təmi n sə kə wi nə saa ka nyi doʼo bòʼ tow kə dədlə kə.

²⁹ Saa khə Klisto tə a loʼ wù wey tə loʼnə tsətsəghə, saa a khə soʼonə nə̀ wù wən tə ghəŋənə ghəə a wi ghə tsətsəghə, à loʼ waa Kəzə̀.