1 Kɔrint 5 - Kaa n Kəzə̀ n fəghə mə

Dzûmə tə Klisto tə khə way ni ghəŋŋə ghəə a laŋŋə ghə

¹ Nya, ghə̂ a ndzəmə dza kaabənu nə̀ ghaa ghəŋŋə ghəə a laŋŋə ghə n fəŋŋə kə ghaa. Ghə dzanu nə̀ ghaa ghəŋŋə ndzoʼo ghəə a laŋŋə ghey abə a buʼ loʼ kə ghə̂ ghey ghə ka bəghəm tə Zə̀ kə, ghə way ni ghəŋə dzə. Ghə dzanu nə̀ wù loʼ loʼnu n fəŋŋə kə ghaa tə nyəŋinə ghi wey bày wi.

² Ghaa loʼ ngee ni ghaŋŋə wû zə n ndzoʼo ghəə ghən ə? À wən loʼ ighəə ghaa mə khə ni mow tii, ghaa bùʼ dzùm nuu shi daŋŋə wù wey tə ghəŋŋə ndzoʼo ghəə ghən n fəŋŋə kə ghaa.

³ Nghee i bùʼ loʼ kə nə̀ n way fey ghi ghaa n wû wuŋ wə, n loʼ dzəŋi ghi ghaa n moʼlə tuŋ. Nghee n loʼnə ghi ghaa n moʼlə tuŋ, n dza n zəd i Mûkəbii Yeso nə̀ wù wey tə ghəŋənə ndzoʼo ghəə ghən n ghəŋə bəəbə.

⁴ Abə ghaa i təmdzəŋi bənə, mə i loʼ dzəŋi ghi ghaa n moʼlə tuŋ, daʼa kə Mûkəbii ə saa Yeso kə i loʼ soʼo.

⁵ N nəŋə i tii zə, ghaa teeli khə ni fuu tsəghə ndòw wù wən tə̀ Satan, sey nə̀, abə Satan ləŋi maʼa kənə gow uwû wi, fə̀ŋ ə wi i loʼ ni keeli ibəghəshi n tsuʼ fey Mûkəbii i bəghənə tii.

⁶ I dzɔbə way nghee ghaa bwey ghaŋŋə kaabənə wû zə. Ghaa khə way nə̀ nyaŋi fə mbvuŋ nə nfuŋ, fə ghəŋŋə nə̀ fuŋ n tii mə ndzəm n kɔʼ kɔʼ ə?

⁷ Ghaa khə ni teeli sòw maʼa ghəə a bəbə ghən a loʼnə tə a loʼ mbvuŋ i wey zə n fəŋŋə kə ghaa tə̀ ghaa zow doʼo bə tə a loʼ baa kə fəghə kən mbvuŋ way tii. Saa ndzəm loʼ baa kən mbvuŋ way tii n təŋkey ghə mâ sâa Klisto tə a loʼ waa njì ə zə̂ kə Taa zaʼa kə n tow u saa.

⁸ Abə saa zəənə zə̂ kə Taa zaʼa kə, kə saa nə zəənə n baa kən kə khənə mbvuŋ i wey zə, i loʼnə tə a loʼ ibəb nsə kwɔli kə fə̀ŋ kə, ghaa khə ni fəd zə̂ n baa kən kə khə way mbvuŋ, kə loʼnə tə a loʼ fə̀ŋ tə zow tə nsə isəŋə.

⁹ N màʼlə kən mə â tɔ̀ɔ bənə tə̀ ghaa, mə â dza tə̀ ghaa nə̀ kə̂ ghaa nə̂ təmə dzəŋinə ghi ghə̂ a laŋŋə ghə.

¹⁰ Mə â ka dza dzə ghə̂ ghey adzəm ghə ghəŋŋənə ghəə a laŋŋə ghən fa mbi, nkee ghə̂ ghən ghə shiənə n sə̂ ghə n fə u mbi, nkee ghə̂ a tsɔŋɔ ghə, nkee ghə̂ ghən ghə ngɔɔmənə muʼu mə. Abə a loʼ nə̀ mə â dza sey, i mə dii nə̀ ghaa sey khə ni zəghə maʼa mbi zən.

¹¹ Mə â dza tə̀ ghaa nə̀ kə̂ ghaa nə̂ təmə dzəŋinə ghi wù wən tə tɔŋŋənə wû u wi wə nə̀ i loʼ dzûmə Klisto, loʼ sey nə̀ tə laŋŋənu, shiə n sə̂ ghə n fə u mbi, ngɔɔmə mmuʼu, khəə təfəghəm, mə̂ə khə̀ə nlə, nkee tsɔŋɔ. Kə̂ ghaa nə̂ buʼu zə̂ə dzəŋinə ghi ndzoʼo wù tii.

¹² À buʼ way dzə bùʼ kuŋ ni saʼ ghə̂ ghey ghə loʼ nə̀ a way dzûmə tə Klisto. À kee loʼ bùʼ kə ghaa ni saʼ ghə̂ ghey ghə dzəŋi loʼnə ghi ghaa n dzəŋi kə dzûmə tə Klisto.

¹³ À loʼ Kəzə̀ tə khənə ni saʼ ghə̂ ghey ghə loʼnə nə̀ a way dzûmə tə Klisto. I kee tɔ̀ɔ doʼo n màlə K-a-zə̀ nə̀, “Ghaa khə ni teeli dzum nuu shi wù bəbə wey tə loʼnə n fəŋŋə kə ghaa.”