1 Kɔrint 3 - Kaa n Kəzə̀ n fəghə mə

Dzûmə tə Klisto tə khə ni loʼ nə kəfə kəmɔʼ

¹ Waazə ghə, mə â way dzə ni ghɔɔmə tə̀ ghaa tə̀ n ghɔɔmənə tə̀ ghə̂ ghey Zay kə Zow kə loʼnə n kow ghə. Mə â fəd khə ni ghɔɔmə tə̀ ghaa tə̀ a loʼ ghə̂ ghey ghə nam loʼnə n muu i mbi zən, loʼ soʼo tə à loʼ aghinətəghə n bəghəm i fə̀ŋ i ghə n kow Klisto.

² Mə â fuu ghaa n ghii mə nə̀ ghaa mə̂, â way dzə fəzəə u taw wə, n təŋkey, ghaa â ka kam nyim kpii dzə ni zə̂ fəzəə u taw wə. Ndzəm ndzəm sa, ni bə taa bə na ghaa ka kam nam nyim kpii dzə ni zə̂ fəzəə u taw wə.

³ I loʼ sey n, n təŋkey, ghaa nam muu ndzoʼo muu zən ghə̂ a mbi a muunə. Abə ghaa nam khənə ghoʼ kə n fəŋŋə kə ghaa, zuulə soʼo n wû i ghaa, i dii bənu nə̀ ghaa loʼ ghə̂ a mbi, ghaa a ghəŋŋə soʼo ghəə ghə tə a maŋ loʼ wù sɔŋtsuʼ wən tə khə way Zə̀ kə.

⁴ I loʼ sey n təŋkey, abə ghaa a loʼ a dzanə nə̀, “N dzûmə Pɔl.” A loʼ ghə a dzanə nə̀, “N dzûmə Apolos.” Ghaa sey ghəŋŋə way ghəə ghə tə a maŋ loʼ wù sɔŋtsuʼ ə?

⁵ Apolos ghi Pɔl buʼ loʼ ghə ndee? Ghə maŋ loʼ ghə̂ a kəfwaʼ a Kəzə̀, Zə̀ kə ghəŋənə ghə nə̀ ghə ghəŋə nə̀ ghaa keeli bəghəm i fə̀ŋ n kow Klisto. Kay wù fwaʼa ndòw kə fwaʼ key Mûkəbii fuu naŋanə tə̀ wi nə̀ tə fwaʼ.

⁶ À loʼ mə, mə â zəghənə ndzoʼ tə tii tə, Apolos n vəələ tsu. Â kee loʼ Kəzə̀ kə â ghəŋə nə̀ tə nyim.

⁷ Wù wey tə zəghənə ndzoʼ tə nsə wù wey tə vəələnə, ghə way dzə ni ghəŋə nə̀ ndzoʼ tə tii tə i nyim, à may kə Kəzə̀ kə loʼ ni ghəŋə nə̀ ndzoʼ tə tii tə i nyîmmə.

⁸ Wù wey tə zəghənə ndzoʼ tə loʼ ighələ ghi wù wey tə vəələnə. Sey Zə̀ kə i tsəə kə kay wù n fwaʼ key tə fwaʼanə.

⁹ I loʼ sey n təŋkey ghey maŋ loʼ ghə̂ a kəfwaʼ, ghey dzəŋi fwaʼanə tə̀ Zə̀ kə. Ghaa a kee loʼnə tə a loʼ sum u Kəzə̀, ghaa u loʼ soʼonə ndaw zey Zə̀ kə fwaʼanə tii.

¹⁰ Mə â ney kɔʼ naamə key Zə̀ kə â fuunə tə̀ mə, səd tsu tsə̂ kə ndaw tii tə̀ a loʼ wù wey tə bəghə khəələnə ndaw tə. Wù nuu nya kee bəghə n tsə̂ kə tii kə. À kee loʼ nə̀ kay wù khə ni ney ighə̂mə n jìi zey tə bəghənə tii.

¹¹ Wù loʼ way dzə ni səd tsə̂ kə ndaw kə nuu kə nə̀ à way kə key Zə̀ kə â səd tsəghə dzənə. Tsə kə ndaw kə tii kə loʼ kə Yeso Klisto kə.

¹² Abə wù bəghə kənə ndzoʼo ndaw i ghaa zə n tsə̂ kə ndaw kən, nə̀ tə bəghə kə n tsâa zə i shɔlɔ, nə itsaa, n tay ghən a kwɔɔnə wən i taw zə, nə nkaʼ, nə uwii, nkee fəndzam.

¹³ N tsuʼ fey Zə̀ kə i saʼanə mbi tii, vəllə wə i dii bənu ndzoʼo fə key kay wù bəghə u təndaw u neynə ni bəghə ndaw tii. Vəllə u tii u nə mɔm koʼ tsu ni dii bə nə̀ wù tii â bəghə ndaw tii n fə wey u tawnə mɔ u wey u taw way.

¹⁴ Zə̀ kə i naamənu wù wey tə bəghənə n tsə kə ndaw kə tii kə n fə wey vəllə u fəə nuulə way.

¹⁵ Wù wey vəllə u kee fəə nuulə kɔʼɔnə fə wey tə bəghənə ndaw tii tii, Zə̀ kə i naamə way wù tii. Zə̀ kə i kee bəghəshiənu wù tii tə̀ a loʼ wù wey ghə sii nuu shi bənə nə uvəllə.

¹⁶ Ghaa khə way nə̀ ghaa loʼ Ndaw Kəzə̀ ə? Ghaa khə way nə̀ Zay K-a-zə̀ kə muu n kow ghaa ə?

¹⁷ Wù wey tə bəəbə maʼanə ndaw Kəzə̀ i nii zə, Zə̀ kə i ləŋi maʼa soʼo wi, n təŋkey, ndaw Kəzə̀ i nii i loʼ luʼu kə bam kə, wû i ghaa, ghaa u loʼnə ndaw Kəzə̀ i tii zə.

¹⁸ Kə̂ ghaa nə̂ nəbənə wû i ghaa zə, abə wù ghaa u loʼ u moʼlənə nə̀ tə khə utɔb n ghəə a mbi, tə khə ni doʼo tə̀ a loʼ wù laʼlə, tə i baa loʼ ni keeli tsu utɔb.

¹⁹ I loʼ nə̀, fə̂ key mbi tɔŋŋənə nə̀ a loʼ utɔb, a loʼ ilaʼlə n sə K-a-zə̀. I loʼ tə i tɔ̀ɔ doʼonə n màʼlə K-a-zə̀ nə̀, “Zə̀ kə biilə kwɔɔ kɔʼɔ kə ghə̂ a tɔbə ghə n tɔb wey ghə dza ghə khənu.”

²⁰ I nam tɔ̀ɔ doʼo soʼo n màʼlə K-a-zə̀ nə̀, “Mûkəbii khənu nə̀ tɔb u ghə̂ ghey ghə moʼlə nə̀ ghə tɔbənu maŋ loʼ kənunu.”

²¹ Sey, kə wù ghaa u loʼ u nə̂ tsɔbənə fə̀ŋ nə̀ n dzûmə wù sɔŋtsuʼ u wən nkee tə wey, n təŋkey, a ndzəm khə ghaa fə̂ wə udzəm.

²² Fə u tii wə udzəm loʼ u ghaa wə, nə̀ a loʼ kə Pɔl nkee Apolos nkee Pita. Abə à buʼ loʼ kə mbi i zən nkee imuu nkee ivə, nə̀ a loʼ kə ghəə ghən nya nkee a ghey a nam khə ni bə, ghəə a tii adzəm a loʼ tə̀ ghaa.

²³ Ghaa loʼ n tənə Klisto, Klisto u loʼnə tənə Kəzə̀.