1 Kɔrint 2 - Kaa n Kəzə̀ n fəghə mə

Pɔl naʼlə tûm n daʼa key Zay kə Zow kə fuunə tə wi

¹ Waazə ghə, nghee tə̀ mə â bənə n səə ghaa ni bə naʼa ghəə a səŋi ghən a nyi doʼonə bòʼ Kəzə̀, mə â ka nəəbə dzə ghaa nə kənyim nkee n tɔb u nii wə.

² Nghee tə̀ mə â loʼnə ghi ghaa, n mâ naŋa n fə̀ŋ zuŋ nə̀ mə i neyzəənu ghəə ghə adzəm, mə i kee neyzəə way ghə i loʼ zə bòʼ Yeso Klisto, a ka tsəm dza kpu zən tə â kpunə n zat kə fəkaʼ.

³ Ambə n bənə n fəŋŋə ghaa, wû wuŋ wə â taw way, mə n tsəŋŋə tənə kə sa n wɔ tsəŋ zə nə̀ mə i fwaʼ dzɔb way fwaʼ kuŋ kə.

⁴ Tûm zən mə â naʼlənə, â maŋ way dzə ighɔɔmə i nuu bənə n wɔ wù sɔŋtsuʼ ni nəəbə ghaa tii, â fəd loʼ Zay kə Zow kə, kə â fuunə mə n daʼa kə, ni naʼa ghəə tii ghə adzəm tə̀ ghaa.

⁵ Mə â ghəŋə sey nə̀ kə ghaa nə gaʼanə bəghəm i fə̀ŋ i ghaa zə n tɔb u wù sɔŋtsuʼ, â loʼ ni ghəŋə nə̀ ghaa fəd zoʼo doʼo ndow n daʼa key Zə̀ kə fuunə.

Tɔb u Kəzə̀ wən Zay kə Zow kə dii bənə

⁶ Abə n loʼnə n fəŋŋə kə dzûmə tə Klisto tey tə loʼ nə̀ tə n beyyə n bəghəm i fə̀ŋ i ghə, mə n naʼlə tûm tə̀ ghə n tɔb wən Zə̀ kə fuunə. N kee naʼlə dzə way tûm tə̀ ghə n tɔb wən a khənə ghə̂ ghən ghə muunə fa n mbi nkee ghə̂ ghən ghə saʼanə mbi zən. Ghə̂ a mbi ghən loʼ nə̀ daʼa u ghə u nya may bənu.

⁷ Tûm zən n naʼlə bənə loʼ tɔb wən u nuu bənə n wɔ Zə̀ kə. Zə̀ kə â nyi naŋa tɔb wən, ghə̂ ghə u khə way. Zə̀ kə â təb naŋa tɔb u tii wə tə saa nə̀ mbi ka kam kaʼ nə̀ saa i keeli nkɔʼlə tii.

⁸ Wù umɔʼ way dzə n ghə̂ ghən ghə saʼanə mbi n num tən nya tə â zowkeelinə ghəə ghən, n təŋkey, abə ghə â zowkeelinə, tə̂ ghə â ka baa Mûkəbii wən ghə fuunə kɔʼləmə n dzəm n zat kə fəkaʼ.

⁹ I tɔ̀ɔ doʼo n màʼlə K-a-zə̀ nə̀, “Ghəə zey sə̂ i ka kam koʼ koʼ tsə, Ghəə zey tuŋŋə kə ka kam zow koʼ tsə, Nsə ghəə zey fə̀ŋ ə wù sɔŋtsuʼ i loʼ ka kam buʼ moʼlə koʼ tsə, Loʼ ghəə zey Zə̀ kə bayyə naŋanə tə̀ ghə̂ ghey ghə ləghənə wi.”

¹⁰ Zə̀ kə n ghəŋə nə̀ Zay kə Zow kə chi dii bə ghəə ghən tə â nyi naŋanə tə̀ saa. À loʼ Zay kə Zow kən kə fuʼi shiə kɔʼɔ bənə ghəə ghə adzəm, fuʼi may shiə kɔʼɔ bə ghəə a Kəzə̀ ghən a nyi doʼo nay nyi ndownə.

¹¹ Nghee tə̀ i loʼ nə̀ wù loʼ way dzə tə loʼ ni keeli fə̂ key wù moʼlənə n fə̀ŋ ə wi, a may kə zay kə wù tii, n jìi i mɔʼɔ zə, wù loʼ way dzə tə khənə ghəə zey Zə̀ kə moʼlənə n fə̀ŋ ə wi, à may kə Zay K-a-zə̀.

¹² À kee loʼ nə̀ ghey khənu nə̀ naamə udzəm u nuu bə n wɔ Zə̀ kə, n təŋkey, Zə̀ kə ka fuu dzə ghey n zay kə wù wey tə muunə fa n mbi, tə fəd fuu ghey n Zay kə wi kə.

¹³ Ghəə ghən ghey ghɔɔmə bənə tə̀ ghaa, ghey ghɔɔmə bə dzə way n tɔb u wù sɔŋtsuʼ, à fəd loʼ n tɔb wən Zay kə Zow kə fuunə tə̀ ghey. À loʼ Zay kə Zow kə, kə ghəŋŋənə nə̀ ghey i tiilə dza bə isəŋə zey i loʼnə bòʼ Kəzə̀ tə̀ ghə̂ ghey ghə khənə Zay kə Zow kə.

¹⁴ Wù wey tə khə way Zay kə Zow kə n kow wi, tə way dzə ni keeli naamə wey Zay K-a-zə̀ kə fuunə. Ndzoʼo ghə̂ a tii a koʼo ghəə tii ghə tə a loʼ ilaʼlə. Ghə way ni zowkeeli ghəə a tii ghə n təŋkey à loʼ kə Zay kə Zow kə, kə loʼ ni ghəŋə nə̀ ghə zowkeeli ghəə a tii ghə.

¹⁵ Wù wey Zay kə Zow kə loʼnə n kow wi, loʼnu ni saʼ aghəə adzəm, wù wey Zay kə Zow kə kee way n kow wi, way dzə ni saʼ wù wey Zay kə Zow kə loʼnə n kow wi.

¹⁶ I tɔ̀ɔ doʼo n màʼlə K-a-zə̀ nə̀, “À loʼ ndee tə khənə moʼlə tə Mûkəbii tə ə? À loʼ ndee tə loʼnə ni tsə̀ Mûkəbii ə?” A kee bə ghey, ghey khə moʼlə tey Klisto khənə ghii tə.