1 Kɔrint 10 - Kaa n Kəzə̀ n fəghə mə

Pɔl fuu itsə̀ kuum ghəə ghə mmuʼu

¹ Waazə ghə, n ləghə ni zə̀ŋŋə bə ghaa n ghəə ghey ghə â shinə ghi ghə bày bày a saa ghə n nəŋə zey ghə â loʼnə ghi Mushi. Ghə â dzəŋi loʼ n tənə mbaʼ tey tə â keyyənə ghə adzəm, ghə n dzəŋi daŋ shi kɔʼ soʼo naali kə dzuu nə aghow.

² Ghə n dzəŋi ney kɔʼ mmuu n Kəzə̀ nə təmbaʼ nsə n naali kə dzuu kən nghee tə ghə â dzûmə ndownə Mushi.

³ Ghə adzəm n zə̂ kɔʼ ndzoʼo fəzəə wey Zə̀ kə â fuu tsu bənə tə̀ ghə.

⁴ Ghə adzəm n mə̂ kɔʼ ndzoʼo mmuu mey Zə̀ kə â fuu tsu bənə tə̀ ghə, n təŋkey, ghə â mə̂ə mmuu mey mə â shi bənə n naa key kə â ndow dzəŋinə ghi ghə. Naa kə tii kə â loʼ Klisto.

⁵ A kee loʼ nə̀ Zə̀ kə â duʼlə dzə way ghi ndəmə ghə, à wey loʼ ghə i tii zə vən a ghə ghə â saŋŋə doʼo kaabənə n mbvən ə ntsaŋ.

⁶ Ghəə ghən ghə â shi tə̀ a loʼ tsə̀ə tə̀ saa nə̀ kə saa nə ləghənə ni ghəŋŋə ghəə a bəbə ghə tə̀ a loʼ ghə.

⁷ Sey, kə̂ ghaa nə ngɔɔmənə muʼu mə tə̀ ndəmə ghə a ghəŋŋənə. I tɔ̀ɔ doʼo n màʼlə K-a-zə̀ nə̀, “Ghə̂ a tii ghə a doʼo tsu ni zə̂ ambə ghə nuu kɔʼnə, ghə n kaʼ ndow ni bən bən i laŋŋə zə.”

⁸ Kə̂ saa nə̂ ghəŋŋənə ghəə a laŋŋə ghə tə̀ ghə̂ a ghə a loʼ ghə â ghəŋənə. Ghəə a laŋŋə ghən n ghəŋə nə̀, ghə̂ a kpu təkam wû uwû nsə kam tə tətəghə nə fətsuʼ fəmɔʼ.

⁹ Kə̂ saa nə̂ mɔm koʼonə Mûkəbii Klisto tə̀ ghə̂ a ghə a loʼ ghə â ghəŋənə, zuu tə n tsowwə wey tsu ghə.

¹⁰ Kə̂ ghaa nə̂ sənnə ghɔɔmənə Zə̀ kə. Ghə̂ a ghə a loʼ ghə â sənnə ghɔɔmə sey, tsəndəghə ə Kəzə̀ zey i ləŋi maʼanə ghə̂ ghə n bə wey maʼa tsu ghə.

¹¹ Ghəə ghən adzəm ghə â shi n kow ghə tə̀ a loʼ tətsə̀ə tə̀ saa. Ghə â tɔ̀ɔ naŋa ghəə ghən n màʼlə K-a-zə̀ ni kii naŋa bə saa ghən saa muunə n num tən mbi may bənə tii.

¹² A wey loʼ ghə i tii zə, wù wey tə̀ moʼlənə nə̀ tə tɔʼ teynu n bəghəm i fə̀ŋ i wi, khə ni ney ighə̂mə, sey nə̀, kə tə nə bwunə n bəghəm i fə̀ŋ i wi.

¹³ Keeli tsu na nə̀ ghə i loʼ i way zə i bə mɔm koʼonə ghaa nə̀ i ka kam mɔm koʼ tsə ghə̂ a nuu ghə. A kee loʼ nə̀ Zə̀ kə naŋŋənu ghɔɔmə i wi zə. Sey tə î way dzə ni bəghəm nə̀ ghə i loʼ i mɔm koʼ ghaa nə̀ ghaa i taw tsəghə way ghə i tii zə. Abə ghə i loʼ i kee mɔm koʼnə ghaa, tə i diinu ghaa n jìi tə̀ ghaa loʼ tyi shi tii, sey nə̀ ghaa loʼ ni kow fə̀ŋ n ghə i tii zə.

Zə̂ kə mmuʼu nsə fəzəə wey Mûkəbii â fuunə

¹⁴ Sey, waazə ghuŋ a dzuŋu ghə, kə ghaa nə ngɔɔmənə muʼu mə.

¹⁵ N ghɔɔmə bə tə̀ ghaa n təŋkey n khənu nə̀ ghaa loʼ ghə̂ a tɔbə ghə. Wû i ghaa, ghaa laalə nyi tsu ghəə ghən n dza bənə ni koʼ nə̀ i kpiinu.

¹⁶ Wɔ̀ zey saa dzəŋi mə̂ə shiə kɔʼɔnə tii fuu soʼo kəzɔŋŋə tə Zə̀ kə, à sey way kaŋ tə Klisto saa dzəŋi mə̂ənə ə? Abə saa boʼlə zə̂ənə baa kə, a sey way wû u Klisto saa dzəŋi zə̂ənə ə?

¹⁷ Nghee baa kə loʼnə kəmɔʼ, saa u loʼnə n ndəm ni dzəŋi zə̂ baa kə tii, i sey diinə saa loʼ vən fə uwû fəmɔʼ, n təŋkey saa dzəŋi zə̂ə kə kəbaa kəmɔʼ.

¹⁸ Ney kɔʼ na ghə̂ ghə Izree ghə, n doʼo i ghə, wù wey tə zə̂nə fəzəə wey ghə fuunə tə a loʼ umaʼlə tə Zə̀ kə, sey zə̂ dzəŋinu ghi tsə zey ghə fəələnə maʼlə wə tii tə̀ Zə̀ kə.

¹⁹ Ghəə ghən n dzanə dii dzə way nə̀ fəzəə wey ghə fuunə tə a loʼ umaʼlə tə̀ muʼu mə, khənu daʼa kə loʼ kə nkee ni dza nə̀ muʼu n khənu daʼa kə loʼ kə.

²⁰ Ghəə zey n ləghənə ni dza, loʼ nə̀, maʼlə wey ghə fəələnə n tsə ghey ghə̂ ghey ghə ka bəghəm tə Zə̀ kə fəələnə maʼlə wə tii, ghə fəələ tə̀ vəətsəə ghə, a way dzə tə̀ Zə̀ kə. Sey, n ləghə way nə̀ ghaa i zəə dzəŋi ghi vəətsəə ghə.

²¹ Wə way dzə ni mə̂ dzəŋi ghi Mûkəbii wə mə̂ dzəŋi soʼo ghi vəətsəə ghə. Wə way dzə ni zə̂ə dzəŋi ghi Mûkəbii, wə i zə̂ə dzəŋi soʼo ghi vəətsəə ghə.

²² Abə saa ghəŋŋənə sey, saa sey ləghə nə̀ Mûkəbii fəələ unəghə ghi saa. Saa mgbaŋ khənu nə̀ saa ka taw tsəghə dzə wi.

²³ Ghə̂ a loʼ a loʼnu n fəŋŋə kə ghaa ghə dzanə nə̀, “Laŋ kə loʼ kə way dzə kə tuunə nə̀ ghey ka ghəŋə ghəə zey ghey ləghənə ni ghəŋə.” N kee dza bə tə̀ ghaa nə̀ a way dzə aghəə adzəm a dzɔbənə tə̀ ghaa. À loʼ kənu isəŋə nə̀, “Laŋ kə loʼ kə way dzə kə tuunə nə̀ saa ka ghəŋə ghəə zey saa ləghənə ni ghəŋə.” À kee loʼ nə̀ à way dzə aghəə adzəm a gaamənə ghaa ni bəghə muu i ghaa.

²⁴ Kə̂ wə nə ghəŋŋənə ghəə ghə nə̀ wə laalə tsu kə i zey i dzɔbənə tə̀ wɔ, i laalə ndow soʼo a ghey a dzɔbə soʼonə tə̀ ghə̂ a loʼ ghə.

²⁵ Sey, ghaa loʼnu ni fə̂ nyam abə a loʼ dzə nə̀ i nuu bə n tay i nyam nə̀ ghaa bəbə way ghəə ghə sey nə̀ kə fə̀ŋ tə nə saʼanə ghaa.

²⁶ N sey dza n təŋkey i tɔ̀ɔ doʼo n màʼlə K-a-zə̀ nə̀, “À loʼ Mûkəbii tə khənə ghəlitsə kə nsə fə̂ wən u loʼnə tii udzəm.”

²⁷ Abə wù wey tə ka bəghəm tə̀ Zə̀ kə tɔŋɔ tsunə wɔ nə̀ wə bə zə̂ ghi wi, nə̀ wə tsə̀m kɔʼnu ni ndow, zə̂ fə kə ghaa kə tə fuunə tə̀ wɔ nə̀ wə ka ghə i bəb, sey nə̀, kə fə̀ŋ zə nə saʼanə wɔ.

²⁸ Abə wù loʼ kee dza bənə tə̀ wɔ nə̀, “Fəzəə wən loʼ nə̀ ghə mâ fuu tə̀ a loʼ umaʼlə tə̀ muʼu mə.” Kə̂ wə nə̂ zə̂ənə, bòʼ wù wey tə dza bənə ghəə ghən tə̀ wɔ, nsə nə̀ kə wù loʼ nə keelinə fəmmə kə n fə̀ŋ.

²⁹ N fa ghɔɔmə dzə way nə̀ a loʼ fə̀ŋ zə, zə i saʼanə wɔ, a loʼ fə̀ŋ ə wù loʼ wey. N fa ghɔɔmə dzə way bòʼ wɔ, n təŋkey, ghəə zey wù loʼ moʼlənə n fə̀ŋ ə wi khə dzə way ni kəd wɔ n ghəə zey wə ləghənə ni ghəŋə.

³⁰ Abə n zə̂ dzəŋinə fəzəə u tii wə ghi wù tii nə̀ mə n fuu dzə zɔŋŋə kə tii tə̀ Zə̀ kə, wù loʼ khə dzə way ni dza nə̀ n loʼ wù bəbə a dza n zə̂ fəzəə u tii wə.

³¹ Sey, nə̀ wə zə̂ənu nkee wə məənu, nkee ghə i ghaa zə wə ghəŋŋənə, i ghəŋŋə ndow ghəə ghə adzəm ni fuu nkɔʼlə tə̀ Zə̀ kə.

³² Kə ghaa nə ghəŋŋənə ghəə zey zə i fuunə chɔd wə tə̀ ghə̂ a Təjuu ghə, ghə̂ ghən ghə way ghə̂ a Təjuu ghə nkee tə̀ ghə̂ a Kəzə̀ ghə.

³³ À wey loʼ soʼo nghee n dəmənə ni muu nə̀ n khə way chɔd wə ghi wù loʼ n ghəə ghey n ghəŋŋənə. N ghəŋŋə dzə way ghəə ghey a dzɔbə kənə tə̀ mə, n fədlə ghəŋŋə ghəə ghey ghə i gaamənə ndəmə aghə̂, sey nə̀, ghə i loʼ ni keeli ibəghəshi.