NEEMIA 1 - Ko te Tohi Tapu i te fakauvea

Kole a Neemia o uhiga mo fanau a Iselaele

¹ Palalau a Neemia, foha o Akalia. I te mahina o Kiseleu, i te uafulu tau, nee au nofo i Suse, i te kolo mua,

² pea nee kaku mai leva mai Suta ia Hanani, ko he tahi o oku tehina, mo ni ihi age kau tagata. Nee au fakafehui leva natou o uhiga mo te kau Sutea ae nee hao, ae nee toe i te popula, pea mo Selusalemi.

³ Nee natou tali mai kia au: Ko natou ae nee toe i te popula e nonofo i te fenua, i he malaia lahi mo he ufiufi lahi; kua holo te u kaupa maka o Selusalemi, pea kua tutu ona matapa e te afi.

⁴ I taku logo ki te u mea aia, nee au lala leva ki te kele o tagi, pea nee au nofo leva i te mamahi i ni aho e lahi osi. Nee au sesunio pea nee au faikole leva ki te Atua o te atu lagi,

⁵ pea nee au ui: Oi Eteleno, Atua o te atu lagi, Atua lahi mo fakamataku, ae e ke taupau tau hai pea e manavaofa kia natou ae e ofa kia koe pea e tauhi au folafola!

⁶ Ke tokaga mai tou taliga, pea ke sio mai ou mata, o fakalogo ki te kole ae e fai atu kia koe e tau tagata faifekau i te lakaga aeni, i te aho mo te pouli, ki au tagata faifekau te u fanau a Iselaele, o kofesio te u agahala a te u fanau a Iselaele, amatou agahala kia koe; koteuhi kua matou agahala kia koe, ia au mo te fale o taku tamai.

⁷ Nee matou agahala lahi kia koe, koteuhi nee mole matou tauhi au folafola, mo au lao, pea mo au fakatotonu ae nee ke tuku ki tau tagata faifekau ko Moisese.

⁸ Manatui te folafola aeni nee ke fakatotonu kia Moisese, tau tagata faifekau, ke ina fakaha: Ka kotou agahala anai, e au veteki anai koutou i te lotolotoga o te u puleaga;

⁹ kae kapau e kotou toe liliu mai kia au, pea kapau e kotou tauhi anai aku folafola mo kotou fai natou, pe e kotou mavetevete foki o kaku ki te u potupotu o te lagi, kae au fakatahii anai koutou pea e au toe aumai anai koutou mai hena ki te kogamea ae kua au filifili ke afio ai toku huafa.

¹⁰ Ko au tagata faifekau natou aeni pea ko tau hahai, ae nee ke totogi aki tou mafimafi pea mo tou nima malohi.

¹¹ Oi Aliki, ke tokaga mai tou taliga ki te kole a tau tagata faifekau, pea mo te kole a au tagata faifekau ae e natou loto ke natou matataku ki tou huafa! Tapuaki i te aho nei tau tagata faifekau, o ke tuku ke ina mau he manavaofa ia mua o te tagata aeni! I te temi aia nee au pule ki te vino a te hau.