NAUME 1 - Ko te Tohi Tapu i te fakauvea

Agaaga o te Atua mo tona mafimafi

¹ Palalau ki Ninive. Tohi o te kikite a Naume, mai Elekosi.

² Ko te Eteleno ko he Atua finenonofo, E ina totogi; e fonu ia ia i te itaita; E totogi e te Eteleno kia natou ae e agatuu kia ia, E ina taofi tona ita ki ona fili.

³ E katakii fualoa e te Eteleno tona hauhau, e lahi ia ia i tona malohi; E mole ina tuku ae e agahala ke hala tautea. E haele te Eteleno i te afa, mo te ahiohio; Ko te u ao ko te u efu o ona vae.

⁴ E ina valoki te tai pea e moamoa ia ia. E ina fakamaha te u vaitafe fuli; E mae te Pasani mo te Kalemelo, E mae te u fisii akau o Lipane.

⁵ E galulu te u mouga i ona mua, Pea e hoholo o te u mouga liliki; E malaga ki oluga te kele i ona mua, Te malamanei katoa mo natou fuli e nonofo i ai.

⁶ Ko ai e tuu anai ia mua o tona hauhau? Ko ai e tuu anai ia mua o tona hauhau lahi? E mafola tona hauhau o hage ko te afi, Pea e mafaafaa te u utu i ona mua.

⁷ E agalelei te Eteleno, Ko he nonoaga ia ia i te aho o te mamahi; E ina iloi natou ae e falala kia ia.

⁸ Kae e ina maumaui anai te kolo Aki ni galu o te malaia, Pea e ina tuli anai ona fili o kaku ki te u fakapouli.

Fakaha o te maumaui o Ninive

⁹ Kotea e koutou fakakaukaui ki te Eteleno? Ko ia ae e ina maumaui. E mole ha tua lua anai te mamahi!

¹⁰ Koteuhi e haihai anai natou o hage ko ni vao talatala, Pea e natou konana anai i te vino, E tutu anai natou o osiosi katoa, O hage ko te otaotai fulumeto moamoa.

¹¹ Maia koe nee ulu mai Ae nee ina metitasio te kovi ki te Eteleno, Ae nee nofo mo ni fakatuutuu kovi.

¹² Koia e folafola ai te Eteleno: Logo ai e natou malolohi mo kaugamalie, Kae e tuusi anai natou pea e natou pupuli anai. E au loto ke fakamamahii ia koe, Ke aua naa toe fakamamahii ia koe…

¹³ E au fasii anai i te aho nei tana amoga ia ia, Pea e au motuhi anai ou hai…

¹⁴ Koeni, te mea ae nee fakatotonu e te Eteleno kia koe: E mole ke toe mau anai ni hou hakoga ke natou taupau tou higoa; E au too anai i te fale o tou atua te u fakatata akau mo te u fakatata ukamea haka; E au teuteui anai tou tanuma, koteuhi e ke maamaa osi!