ESEKIELE 1 - Ko te Tohi Tapu i te fakauvea

Ha o te Aliki kia Esekiele Kololia o te Eteleno

¹ I te tau tolugofulu, i te aho nima o te mahina fa, i taku kei nofo mo te hahai popula i te vaitafe o Kepale, nee ava leva te atu lagi, pea nee au mau leva ni sio mai te Atua.

² I te aho nima o te mahina, ko te tau nima aia o te popula o te hau ko Sosakimi,

³ nee tuku leva te folafola a te Eteleno kia Esekiele, foha o Pusi, ko te tagata faisakilifisio i te fenua o te kau Kaletea, ovi ki te vaitafe o Kepale; pea nee ia ia leva te nima o te Eteleno.

⁴ Nee au sio leva, pea koeni, nee hau leva mai te potu noleto he ahiohio: Ko he ao matotolu mo he afi takanimonimo, pea nee takatakai ia e he malama, pea nee gigila i lotomalie o hage ko he sila momole ae nee hoki too mai pe mai te afi.

⁵ I lotomalie foki, nee ha ni manu mauuli e fa, ae nee mata o hage ko ni tagata.

⁶ Nee natou tahi mo ia te u foi mata e fa, pea nee natou tahi mo ia te u pakakau e fa.

⁷ Nee hahako onatou vae, pea nee hage onatou alofi vae ko ni alofi vae o he uhii pipi; pea nee natou gigila o hage ko te sila momole.

⁸ Nee natou mau ni nimai tagata i lalo o onatou pakakau i onatou fahai e fa; pea nee natou tahi mo ia toko fa ona mata mo ona pakakau.

⁹ Nee feuluaki te u potupotu o onatou pakakau. Nee natou tahi haele fakahagatonu ki mua pea nee mole toe mafuli kehe onatou sino.

¹⁰ Nee natou tahi mo ia fuli he matai tagata, mo he matai laione i te fahai matau, mo he matai pipi i te fahai hema, mo he matai akuila.

¹¹ Nee mafola leva ki oluga te u pakakau e lua, o pipiki tahi; kae nee uufi leva e ae ake pakakau e lua onatou sino.

¹² Nee natou tahi haele fakahagatonu i ona mua. Pea nee natou olo ki te kogamea ae nee taki natou ki ai e te Laumalie, pea nee mole natou tafoki i tanatou haele.

¹³ I te vaha o te u manu mauuli aia nee i ai ni mea ae nee hage ko ni mamala kakaha; pea nee feoloaki i ai ni mea ae nee hage ko ni malama; pea nee hau mai te afi he malama gigila, mo ni hila.

¹⁴ Pea nee lele pea nee toe foki mai te u manu o hage ko te mu o te hila.

¹⁵ I te lolotoga o taku sio ki te u manu aia, koeni, nee tuu he foi teka e tahi ki te kele, o ovi ki te u manu, ia mua o onatou mata e fa.

¹⁶ Nee hage te u teka aia ko te kilisolite*, pea nee tatau fuli natou toko fa; i tanatou gaue mo tonatou fau nee hage e tuku te tahi foi teka i loto o te tahi foi teka.

¹⁷ Nee feala ke natou olo ki te u fahai e fa kae aua naa natou toe liliu i tanatou haele.

¹⁸ Nee natou maoluga lahi osi, pea nee fonu te takatakai katoa o te u foi teka i ni foi mata.

¹⁹ Ka olo te u manu, pea e olo te u foi teka i onatou tafa; pea ka malaga ki oluga te u manu i te kele, pea e toe malaga foki ki oluga te u foi teka i te kele.

²⁰ Nee natou olo ki te kogamea ae nee taki natou ki ai e te Laumalie; pea nee olo te u foi teka mo natou, koteuhi nee nofo te laumalie o te u manu i te u foi teka.

²¹ Ka haele te u manu, pea e toe haele te u foi teka; ka natou tutuu, pea e toe tutuu foki te u foi teka; ka natou malaga ki oluga i te kele, pea e toe malaga foki ki oluga te u foi teka i te kele mo natou, koteuhi nee nofo te laumalie o te u manu i te u foi teka.

²² I oluga o te u manu, nee i ai o hage ko he lagi uui gigila, ae nee mafola i oluga o onatou ulu.

²³ I lalo o te lagi aia, nee tutuu fakahako ki oluga te u pakakau e lua o te u manu pea nee na felaveaki, kae nee uufi e ae ake pakakau e lua onatou sino.

²⁴ I tanatou haele, nee au logo leva ki te logoaa o onatou pakakau, o hage ko te gugulu o te u vai lalahi, pee ko te leo o te Mafimafi, pee ko he logoaa o he solia toko lahi; ka natou tutuu, e natou fakato onatou pakakau.

²⁵ Pea nee i ai leva he logoaa ae nee hau mai te lagi i oluga o onatou ulu, i te temi ae e natou tutuu ai, o fakato onatou pakakau.

²⁶ I te lagi ae i oluga o onatou ulu, nee i ai he mea ae nee hage ko he safile*, pea nee hage foki ko he hekaaga fakahau; pea nee ha i oluga o te mea aia nee hage ko he hekaaga fakahau he fofoga o he tagata ae nee hili i ai.

²⁷ Nee au toe sio foki ki he mea o hage ko he sila gigila, o hage ko he afi, pea nee tuu te tagata aia i loto o te mea aia, pea nee takatakai ia ia e he malama gigila i ona vakavaka o kaku ki oluga, pea i ona vakavaka o kaku ki lalo, nee au sio ki he mea o hage ko he afi, o hage ko he malama gigila ae nee ina takatakai ia ia.

²⁸ Nee tatau te malama gigila aia nee ina takatakai ia ia mo te malama o te nuanua i he aho ua. Ko he paaki aia o te kololia o te Eteleno. I taku sio ki te mea aia, nee au fakamapee leva, o fakatuu oku mata ki te kele, pea nee au logo leva ki te leo o he tahi ae nee palalau.