ESAIA 1 - Ko te Tohi Tapu i te fakauvea

Ko agahala a Suta mo tona tautea

¹ Folafola kikite a Esaia, foha o Amotesito, ki Suta mo Selusalemi, i te temi o Osiasi, mo Sotame, mo Akase, mo Esekiasi, hau o Suta.

² Atu lagi, koutou fagono mai! Kele, fagono mai tou taliga! Koteuhi e palalau te Eteleno. Nee au fafaga pea nee au taupau ni fanau, Kae nee natou agatuu kia au.

³ E iloi e te pipi tona pule, Pea mo te asino te fale manu o tona pule: Kae e mole iloi e Iselaele he mea pe e tahi, E mole pe mau e taku hahai honatou atamai.

⁴ Malaia ki te puleaga agahala, ki te hahai kua mafasia i te agakovi, Ki te hakoga o te kau agakovi, ki te u fanau fakalialia! Kua natou siaki te Eteleno, kua natou nukinuki ki te Maonioni o Iselaele. Kua natou toe liliu ki muli…

⁵ Kotea te u tautea foou ke hili kia koutou? Koteuhi kua koutou liuliuga akotou agatuu. Kua mahaki te foi ulu katoa, Pea kua mamahi te mafu katoa.

⁶ Mai te alofi vae o kaku ki te ulu, e mole pe he mea kei lelei: Ko te u lavea atea, mo te u kafo, mo te u papala, Ae nee mole hai, nee mole faitoo, nee mole tului aki he lolo.

⁷ Kua maumaui tokotou fenua, Kua tutu okotou kolo e te afi, Ko ni hahai kehe ae kua natou kai te u koloa o tokotou fenua i okotou mata, E natou kaihaa mo maumaui ia ia, o hage ko ni kau kanivao.

⁸ Pea kua nofo te taahine o Sione O hage ko he fale pola i he gaueaga vite, O hage ko he fale pola i he gaueaga kokope*, O hage ko he kolo nee takatakai.

⁹ Kanapau nee mole tuku e te Eteleno o te atu fua tau He kii toega vaivai ia matou, Nee matou liliu leva o hage ko Sotoma, Nee matou tatau leva mo Komola.

¹⁰ Pule o Sotoma, koutou fagono mai ki te folafola a te Eteleno! Hahai o Komola, fagono mai tou taliga ki te lao o tomatou Atua!

¹¹ E ui e te Eteleno: Kotea te uhiga o te liuliuga o akotou sakilifisio? Kua au makona i te u failaulau o te u ovi tagata pea mo te gako o te u uhii pipi tagata; E mole au mau he fiafia i te toto o te u pipi tagata, mo te u ovi fafine pea mo te u tao tagata.

¹² Ka koutou omai o tutuu i oku mua, Ko ai nee ina kole atu kia koutou ke ulihi oku lotoa?

¹³ Kotou tuku te aumai o te u molaga noa: E au fakalialia ki te iseso, Mo te u mahina foou, mo te u sapato pea mo te u fakatahi, E mole au lavai te sio ki te fakapo i te u aho lalahi.

¹⁴ Kua fehia toku laumalie ki akotou mahina foou mo akotou aho lalahi; Kua natou liliu ko he kavega mamafa kia au; Kua au piko i tonatou katakii.

¹⁵ Ka kotou falo mai okotou nima, e au fulihi kehe oku mata ia koutou; Ka kotou liuliuga te u faikole, e mole au fagono atu kia koutou: E fonu okotou nima i te toto.

¹⁶ Koutou maanu, koutou fakamaa, Koutou too ia mua o oku mata akotou gaue kovi; Koutou tuku te fai o te mea ae e kovi.

¹⁷ Koutou ako ki te fai o te mea ae e lelei, koutou kumi te faitotonu, Koutou puipui ia ia ae e gaohi kovii; Koutou fai te mea ae e totonu ki te toe hala matua, Koutou puipui te finetaka,

¹⁸ Koutou omai, pea ke tou talaga! E ui e te Eteleno. Kapau e kula akotou agahala o hage ko te toto, e natou liliu anai o hina o hage ko te nive; Kapau e natou kula o hage ko te pulupe*, e natou liliu anai o hina o hage ko te fului akeno hina.

¹⁹ Kapau e koutou mau he loto lelei pea kapau e koutou logo gafua, E koutou kai anai ki te u fua lelei tukupau o te fenua;

²⁰ Kae kapau e koutou logo gataa pea kapau e koutou agatuu, E tafi anai koutou e te heleta, Koteuhi kua folafola te gutu o te Eteleno.

²¹ Kotea koa ia! Kua liliu foki te kolo agatonu ko he fafine faiaga! I mua nee fonu ia i te fakaapaapa ki te lao, pea nee nofo i ai te faitotonu; Kae i te temi nei kua i ai ni tagata fakapo!

²² Kua fetogi tau paaga aki te sikoli, Pea kua hui tau vino aki te vai.

²³ Kua agatuu ou pule pea kua natou kau mo te kau kaihaa: Kua natou manako fuli ki te u meaofa pea kua natou felelei i muli o te u fakapale; E mole natou fai te mea ae e totonu ki te toe hala matua, Pea e natou taliga tuli ki te tagi a te finetaka.

²⁴ Koia koeni te mea e fakaha e te Aliki, te Eteleno o te atu fua tau, Te Malohi o Iselaele: Io, e au liufaki anai te kovi kia natou ae nee agatuu mai kia au, Pea e au toe totogi anai te kovi ki oku fili.

²⁵ Pea e au hili anai toku nima kia koe, E au tutu anai ke puli te sikoli ae e pipiki ia koe, o hage ko te gaue a te potase*, Pea e au too anai te u mosii pulu fuli maia koe.

²⁶ E au toe fakanofo anai au tuifakamaau o hage ko te temi mua, Pea mo au kau fono o hage ko te kamataaga. I te osi o te mea aia, e fakahigoa anai ia koe ko te kolo o te faitotonu, Kolo agatonu.

²⁷ E fakamauli anai ia Sione e te agatonu; Pea ko natou ae e tafoki anai i ai e fakamauli anai e te faitotonu.

²⁸ Kae e maumaui anai natou fuli ae e agatuu mo natou fuli ae e agahala, Pea e mamate anai natou fuli ae e natou siaki te Eteleno.

²⁹ E koutou ufiufi anai o tupu ko te u akau fuli ae nee koutou tui ki ai, Pea e koutou ufiufi anai o tupu ko te u oloto ae nee natou fai okotou fiafia;

³⁰ Koteuhi e koutou hage anai ko he telepenite ae kua migimigi ona lau, Pee ko he oloto ae e mole hona vai.

³¹ Ko te tagata malohi e tatau anai mo he efei pulu, Pea ko tana gaue mo he mafisii afi; E na uloulo anai fakatahi ia ae mo ae, Pea e mole he tahi anai ke ina matehi.