Zɛkaria 1 - Vagla

Kɔraawiizi n na yir u nɛra bá bir ba u be wia

¹ Pɛsia Koorizeŋ Dariɔs kora dii binni anɛɛhiŋ baaguzi ŋmantannaazi biinii, Kɔraawiizi kpa u amaniye tɛɛ Ido biibaal Bɛrɛkia ge biibaal Kɔraawiizi dɔgtɛɛ Zɛkaria.

² Kɔraawiizi Fɔŋŋa Maa Hiŋ ŋɔ Zɛkaria benii, “Ŋɔ n nɛra be lugɔ mìŋ́ Kɔraawiizi Fɔŋŋa Maa Hiŋ la baaŋ faa fuuh ii naabaala ninɛɛ werge.

³ Ka filaŋkeŋ, n na ŋɔ ii benii, ií bir ba mìŋ́ Kɔraawiizi Fɔŋŋa Maa Hiŋ be, n ge bir ba ii be.

⁴ Ií gilɛɛ ɛɛ lugɔ ii naabaala. Faala la, n dɔgtɛɛzi faa feloore ŋɔ ba be lugɔ mìŋ́ Kɔraawiizi Fɔŋŋa Maa Hiŋ la ŋɔwɔɔrɛ, ‘Ií bir lii ii wichɔgaa ŋmɛnizi la, di gil ii wichɔgaa wiɛɛlaa la.’ Ka ba waa sɛɛwɛ nuu n be gɛɛ di du n wiŋɔɔlaa tau. Mìŋ́ Kɔraawiizii ŋɔ guŋ.

⁵ Ii naabaala la du lee filaŋkennei? Kɔraawiizi dɔgtɛɛzi la ge gba waa kaa hoo.

⁶ Ii naabaala faa vɛɛ n widaulaa ni n karfaazi la n dɔgtɛɛzi n faa ŋɔwɛɛ tɛɛ baa labuu. Awiarɛ tɔɔrɔɔ faa chol ba ni. Denii ba biine chɔgi, ba sɛɛ chɔgri di ŋɔ, ‘Kɔraawiizi Fɔŋŋa Maa Hiŋ la tɔɔri yaabuu gunla yaa wiɛɛlaa ni ŋmɛnizi la yaa n na hiŋ la n dɛkkɛ, gunla uŋ aah siwii ú ɛɛ yaa la.’ ”

Kɔraawiizi dɔgtɛɛ n na zagra lugɔ deeza biini wia

⁷ Baagu fidikpaŋhiŋ la banna yir Siibat la hɔpizaa tokko ni anaazu hɔl, Koorizeŋ Dariɔs kora dii binni anɛɛhiŋ biinii, Kɔraawiizi ŋɔ wia tɛɛ mìŋ́ u dɔgtɛɛ Zɛkaria, di pilli wia bagliŋ lugɔ deeza biini.

⁸ N na baal bɛl a hamuŋa ni n tinni zagaahmu, di chi daazi aŋhina banna yir mɛrtil biini, waluu bɛl nua. Zagaahma, a hulahulazi ani a huŋŋa chi u har.

⁹ N pɛɛzi, “Zagtinna bɛlaarɛ kennei, n dɔɔri?” Mɛlika la n nuu n na ŋɔ wia la ŋɔ n be, “N daŋ baglii nɛra la n ɛɛwɛɛ.”

¹⁰ Baal la n chigɛ mɛrtil daazi la biini bagli ba wia keŋ, “Baabuu Kɔraawiizi hum bá gaagi durnya hɛssi maa, di na wia la n na ɛɛ a biine.”

¹¹ Denii ba ŋɔ Kɔraawiizi mɛlika la n chigɛ mɛrtil daazi biini la be, “Yaa gaagi durnya maanii di na lugɔ koozaa maa waa hoo. Bampirsɔna bɛnnɛ du de.”

¹² Denii Kɔraawiizi mɛlika ŋɔ, “Kɔraawiizi Fɔŋŋa Maa Hiŋ, ɛrɛɛ a birgi mag ka i haa suŋ Jɛrusalɛm ni Juda bola la i baaŋ n na fuuh a ni, binni tokkoahoro ni fi maa biini lai?”

¹³ Awia, Kɔraawiizi faa ŋɔ wiŋɔnanaa ni bampirtigaa wiŋɔzi tɛɛ mɛlika la n nuu n na ŋɔ wia la.

¹⁴ Denii mɛlika la n nuu n na ŋɔ wia la ŋɔ, “Sii wiŋɔɔlii naa, dí kenne Kɔraawiizi Fɔŋŋa Maa Hiŋ la ra ŋɔ, ‘N nɔŋŋi Jɛrusalɛm ni Bizeŋ Ziɔnnɛ werge,

¹⁵ ka n baaŋ na fuuuh werge durnya hɛssi hina la n na fɛ lugɔ wichɔgii maa wàá wer huuzi baa la ni. N baaŋ faa waa fuuh guŋ, ka a hɛssi hina wiɛɛlaarɛ gillɛ n nɛra tɔɔrɔɔ nyaŋŋi.’

¹⁶ Awia, n bittɔɔ ba bolzeŋ Jɛrusalɛm n wa suŋ ba ni, ba kaa bir ma n Dia ni a bol maa. Mìŋ́ Kɔraawiizi Fɔŋŋa Maa Hinnɛ ŋɔ guŋ.”

¹⁷ Kɔraawiizi mɛlika la kaa ŋɔ n sii ŋɔ lugɔ Kɔraawiizi Fɔŋŋa Maa Hiŋ la ŋɔwɔɔrɛ, “N bola daŋ kaa su ni daama, ń kaa tig Jɛrusalɛm ni Bizeŋ Ziɔn hina bampiree, di lizi Jɛrusalɛm ú ɛɛ n hor.”

Nyigzi anaazu wia

¹⁸ Denii n binni di nyigzi anaazuu du n see!

¹⁹ N pɛɛzi mɛlika la n na ŋɔ wia n be la, “Bɛɛ nyigzii kennei?” U ŋɔ n be, “Nyigzi naabuu chigɛ tɛɛ durnya fɔŋŋa hina la n gillɛ Juda, Izrɛl ani Jɛrusalɛm hina maa yaari la.”

²⁰ Denii Kɔraawiizi bagliŋ luura banaazu n kpogli silaa.

²¹ N pɛɛzi, “Bɛɛ ba ra ba bá wa ɛɛi?” Denii u ŋɔ, “Ba ballɔɔ bá wa ɔnzi di kpegli durnya hɛssi hina la n chɔgi Juda hɛri, di gil u nɛra yaari la.”