Yirsum 1 - Vagla

¹ Koori Solomɔn yir la uŋ yittɛ u du sum kaali yira maa labuu keŋ.

Lugli yir Haŋfalii n na kɛlli u jaari ni wia

² Koriŋ, di bagliŋ i nɔŋŋaa, dikuubɛɛwiai, i nɔŋŋaa summɔ kaali siŋ.

³ I sɔɔh summɔɔ lugɔ tulaale, i sɔŋ ɛɛ lugɔ baŋ mizi tulaale. Awiarɛ suŋgure maa ra nyiŋŋii.

⁴ Lawiŋ ya chɔ kaali, a ɛɛ manaŋ! Ɛɛ n koori, di kpogliŋ zuu i dia. Yaa bɔra daŋ sɔɔni, i wia daŋ par yaa, yaa daŋ chɔli i nɔŋŋaa di kaali siŋ. Awia, suŋgure maanii ra nyiŋŋii!

Dammuzi Haŋfalii

⁵ Jɛrusalɛm biihaana, n biroore ka du wer, di biri lugɔ Kɛda Hɛribɔduma tantizi, ka du wer alugɔ Koori Solomɔn kooridia patiisazi.

⁶ Ií gilɛɛ ra gbɛlliŋ dikuu n biraa wia, dikuu wiizi n gillɛ n biri wia. N niubambinaa faa na baannɛ duŋ, di gil n hum huma grepu daazi koo biini. N faa waa n hiŋ kossaa saŋa dɔɔwɛ.

⁷ N sɛnni, ŋɔ n be, lee i nɔɔni i peeza la á ga dei? Lee a chɔɔ heezi wibaŋai? Ɛrɛɛ wiarɛ ń gaagi di ra nyiŋŋii penɔɔna baŋhina peeza biinei?

Haŋfalii jaari

⁸ Haa de zummɛa, haana biini maa toloori? La gaa hiŋ a peeza luge, di nyiŋŋi kooree tɛɛ i bupɔla n dugli penɔɔna tantizi la.

⁹ N sɛnni, baala ra nyiŋŋiibuu alugɔ Ijip koori zagra n na tɛrgi torkozi, n na nyiŋŋi zagniina.

¹⁰ I nyuhuna wessoo di tɔ i giraa, di chɔɔ i baŋaa lugɔ baŋaakuna la n wesse werge, a yoola du kpol.

¹¹ Ka yaa daŋ kuari saliŋ dignikuna, di kpa saliŋhuŋŋu margi a ni tɛi.

Haŋfalii

¹² N koori faa chɔɔ u karjaŋ ninɛɛ, n tulaale sɔɔh tɔ bɔr maa.

¹³ N sɛnni ɛɛwɔɔ lugɔ tulaale, di chɔɔ n bampirii.

¹⁴ N sɛnni ɛɛwɔɔ lugɔ pir daazi n na fii Ɛn Gɛdi grepu daazi kooni biini.

Haŋfalii jaari

¹⁵ N sɛnni, i wessoo, i ɛɛ suŋguruu werge, i siwee ra nyɛgzi lugɔ komma siwee.

Haŋfalii

¹⁶ N sɛnni, i ɛɛ bunɔɔnnɛ werge! I wia ra parimbuu! Kooriilɛɛrii niŋ ɛɛ yaa kunchɔɔrikuŋ.

¹⁷ Hɛriŋkpol daazi niŋ ɛɛ yaa dia dolli, daananaa ɛɛ u saŋa ni daabii.