Wipillaa 1 - Vagla

¹ Wia naa n du hɔnnaa biini naa, Kɔraawiizi pillaabuu bagli Yeesu Kristo, ú bagli u balaa, bá wer zum wia la n niŋ wa ɛɛ filaŋkeŋ. Yeesu Kristo gillɔɔ u mɛlika bɛl ba u balii Jɔɔn be di wa bagluu a wia.

² Jɔɔn bagli wia la maa un nawɛɛ. Kɔraawiizi wiŋɔɔlii ni Yeesu Kristo ge baglaa daansɛɛrɛ u di, di sɛbi a wia dau.

³ Nɛr la n niŋ karmi hɔnnaa nɛra nuu, nuu sumaa. Banla ge n niŋ nuu banna karmuu di ra sɛɛ wia la a hɔŋ n baglɛɛ la, ba ge gba nuu sumaa. Saŋa la a wia n niŋ wa ɛɛ la ra dugluu.

Chɛchizi aniidaanɛɛ jaamaa wia

⁴ Mìŋ́ Jɔɔnnɛ sɛbi wia naa tɛɛ Yeesu hiŋra la n ɔɔ chaali dɔŋa bola aniidaanɛɛ, Eesia hɛri la. Kɔraawiizi la n du de filaŋkeŋ, di faa du de saŋa maa la, unla n niŋ haa wa ba la, ú hiini ia di tɛɛ ia bampirsɔna. Dunzi aniidaanɛɛ la n ɔɔ du u be u sognibɔr

⁵ ani Yeesu Kristo n faa ɛɛ Kɔraawiizi daansɛɛ hiŋ ni wibii, di kaa ɛɛ unla n felee izi lii lalaa biini, di kaa ɛɛ durnya koora maa nabɔma la, bá maa hiini ia, di tɛɛ ia bampirsɔna. Ií ra tɛɛ unla n nɔŋŋi yaa di siu, ú chal wer lɛɛ yaa ha, yaa wer lii yaa wichɔgaa biini la sɔŋ.

⁶ U gillɔɔ yaa kpau ɛɛ u kora hina di ɛɛ u kizeehina, di ra hum u Mɛɛ Kɔraawiizi. Awia, ií ra tɛu sɔŋ. Waabuu niŋ dɔɔ fɔŋŋa saŋaa saŋa maa. Ami.

⁷ Ií ra nuu ɛŋ. U daŋ ba. Baama ninɛɛ ú ga ba. Nɛruu nɛr maa daŋ nau unna ba. Banla n faa kpa kandaa di yag u loŋŋi la, ba gba daŋ nau. Durnya dee maa daŋ nau di ra lɔɔgi wile. Too. Ú ra ba! Ami.

⁸ Yaa Dɔɔri Kɔraawiizi la n ɔɔ du de filaŋkeŋ, di faa du de saŋa maa la, unla n niŋ haa wa ba di ɛɛ Fɔŋŋa Maa Hiŋ la, u ŋɔwɔɔrɛ, “Minuu lugli, minuu tuna.”

Yeesu nai lugɔ deeza biini wia

⁹ Mìŋ́ ii dɔŋhiŋ Jɔɔn n na sɛbi hɔnnaa, n ni ii maa ɛɛ kpannɛ di ra di tɔɔrɔɔ, di ra hum Kɔraawiizi Kora wia, di ra di kanyitti dikuu yaa ni Yeesu n kpauwɛ wia. Ba faa kpambuu ga ta nii baaŋ hɛri bɛl, ba ra yir de Patmɔs, dikuu miŋ faa bagli Kɔraawiizi wia di kaa di Yeesu daansɛɛ la wia.

¹⁰ Yaa Dɔɔri hɔpizii Alaadi bɛl hɔllɛ n faa du de. Kɔraawiizi Dumnanii izi n ni, n nuu loobii bɛl n har lugɔ bensunoniina.

¹¹ U ŋɔ, “Wia naa hinna na naa, sɛbaa du hɔŋ biini di tili Yeesu hiŋra la n chaalɛɛ du bola aniidaanɛɛ la, banla n du Ɛfɛsus, Simirna, Pɛgamum, Tayataira, Sadis, Filadɛlfia ani Laudisia la.”

¹² N bir ń na nɛr la n ŋɔ wia n be la. Mim bittɛ, n na saliŋ fintina daazi aniidaanɛɛ,

¹³ di na nɛbɛl lugɔ “Newee Biibaal” n chigɛ a fintina daazi baambaaŋ. Tagtajaŋ la un laalɛɛ hel u naapezi. Saliŋ belenti ge vɔɔ u bampirii.

¹⁴ U nyuhuna huuhzi alugɔ gonni. U siwee ge ra nyɛgzi lugɔ ninlau.

¹⁵ U naazi ge aah lugɔ baŋ kpa danyɛ du ninzeŋ u aah la. U loobii ge ra gbɔgzi lugɔ gɔnzeŋ nii n na chuuri.

¹⁶ Chinchiŋwilaa aniidaanɛɛ du u nodig. Tokobii bɛl n dɔɔ nuuzi anɛɛ di ra di werge ra lii u nua. U siwee paga ge chaani werge alugɔ wiizi n na lɔ fɔŋŋa ni.

¹⁷ Miŋ wa nau la, n chol u see lugɔ min siuwɛ. U kpa u nodig sag n ni, ka ŋɔ, “Gilɛɛ ra ɔm. Minuu tɔ see di kaa tɔ har.

¹⁸ Minuu unla n na nyiŋ la. N faa siuwɔɔ ka filaŋkeŋ, n kaa dɔɔ miibɔɔrɛ di ra nyiŋ saŋa maa! N dɔɔ siu ni lalaa bol saafiibee.

¹⁹ Awia, sɛbi wia la hiŋ nawɛɛ, wia la n du de filaŋkeŋ ani anla n niŋ wa ɛɛ wia naa harbɔɔ la.

²⁰ Chinchiŋwilaa aniidaanɛɛ naa n du n nodig ni saliŋ fintina daazi aniidaanɛɛ naa, n daŋ pilli a zɛɛ tɛi. Chinchiŋwilaa aniidaanɛɛ naa ɛɛ mɛlikazi la n na binni Yeesu hiŋra la n chaalɛɛ bola aniidaanɛɛ biini labuu. Fintina daazi naa ge ɛɛ Yeesu hiŋra la.”