Taitus 1 - Vagla

¹ Mìŋ́ Pɔɔllɛ ra sɛbi hɔnnaa ń tɛi. N ɛɛ Kɔraawiizi baliirɛ di kaa ɛɛ Yeesu Kristo huŋhunni, ń wer hiini banla Kɔraawiizi n lizɛɛ tɛɛ u hiŋ la, bá wer yarduu di kaa wer zum u wibii la maa n du yaa hiŋaa naa biini,

² di wer dɔɔ miibɔɔ la n waa tunaa dɔɔwɛ la tamii. Kɔraawiizi la n waa kara ra kanni la, waabuu ŋɔ a miibɔɔ wia saŋa la uŋ faa haa waa durnya tawɛɛ mɔɔ la.

³ Ka u himmaa kipar saŋa n wa helle, u gil nɛra zum a miibɔɔ wia, di lii wiŋɔzi la uŋ gillɛ n na ŋɔ la biini. Yaa Lɛɛri Kɔraawiizi labuu gillɛ n wa zum a maa wia, di ŋɔ ń na bagli nɛra.

⁴ N bie Taitus, n na jaamii. Mìŋ́ lulii hiŋaa naa yaa maa n na hiŋ naa biini. Awia, i ɛɛ n bie himmaanii. Yáa Mɛɛ Kɔraawiizi ni yaa Lɛɛri Yeesu Kristo hiinii, di tɛi bampirsɔna.

Huma n dɛkkɛ Taitus hum Krit hɛri wia

⁵ Miŋ gilii Krit la, n faa ra nyiŋŋuu lugɔ i wer tuŋ wia la n faa haa kawɛɛ de la, di la bola la maa di ga lizi nabɔnzi Yeesu hiŋra la maa biini gunla miŋ baglii la, bá wer ra binni ba ni.

⁶ Miŋ ŋɔ í lizi nabɔnzi naa, ɛɛ́ lizi banla n waa wichɔgii maa dɔɔwɛ nɛra n niŋ ŋɔ ba wia, ba kaa dɔɔ hahkpaŋkpaŋa bɛŋ la. A wesso ba biizi ge n na sɛɛ Yeesu wia, nɛ́ra gilɛɛ wa wer ŋɔ ba wia alugɔ ba kpoŋŋoo di ɛɛ dignikpega hina,

⁷ dikuubɛɛwiai, a dɛkkɔɔ nɛr la n na binni Yeesu hiŋra ni n ɛɛ nɛnanii, nɛ́r maa gilɛɛ wer ŋɔ u wichɔgaa ɛɛi maa wia. Kɔraawiizi baliirɛ. Ú gilɛɛ ra na u hiŋ, di gilɛɛ dɔɔ baasi werge, di gilɛɛ ra nyiŋŋi siŋ nyɔɔi, di gilɛɛ dɔɔ miisɔɔh, di gilɛɛ ra fini nɛra ú na kebee.

⁸ Ú ɛɛ hɔɔhrilɛɛri, di ɔɔ ra nyiŋŋi winanaa wia. Ɔɔ́ dɔɔ nfɛrɛ nɛnnɛ, di gil u wia maa ra deŋli, doŋa maa gilɛɛ waa pɛluu. Ɔɔ́ ra lau u hiŋ nɛnnɛ,

⁹ di ɔɔ ra hiŋ Kɔraawiizi wibii gunla baŋ faa bagluu la, ú ɔɔ wer ra ŋɔ Kɔraawiizi wia ŋmɛnizi gunla anna hiŋ di ra tɛɛ nɛra, di kaa wer ra di banla n na di hɔɔzi la wibii, bá zum.

¹⁰ Nɛkpila du de di ɛɛ dignikpega hina, di ra ŋɔ wia pɛɛpɛɛ di ra dar nɛra. Banla n na teŋri hɛna labuu ra dar nɛra werge.

¹¹ A wesso nɛra n tɔ ba nuuzi bá siigi. Ba ra chɔgi nɛra ni ba diini hina maanii, di ra bagli wia la n waa dɛkkɛ bá na kebee a biini.

¹² Ba bɛl ɛɛ dɔgtɛɛrɛ di faa ŋɔ ba wia keŋ, “Krit hina maa ɛɛ karkanna ani wichɔgɛɛraa, di dɔɔ kɛkɛluu ni yaara.”

¹³ Wibiire u faa ŋɔ gunla. Awia, a di baa wibii bá zum, ka bá jaa ra hiŋ Kɔraawiizi ŋmɛnɛɛ ani wibii.

¹⁴ Gilɛɛ ra hagzi Jus hina kara la ni wia la banla n vɛɛ wibii n na ŋɔ bá ra ɛɛ la.

¹⁵ Di i himmaa biini wesso, kummaa wessoo tɛi. A waa kii. Ka banla n dɔɔ wichɔgaa ba biine, ba waa yarda dɔɔwɛ la, kummaa ra kiiu. Ba biine nfɛssi ni ba biine wia maa doŋŋoo.

¹⁶ Ba ŋɔ ba zum Kɔraawiizii. Ka ba wiɛɛlaa biinii i chi zum lugɔ ba waa Kɔraawiizi zummɛ. Ba ɛɛ nɛjagazii. Ba waa wia ra nuu. Ba wàá wer ɛɛ winanaa maa.