Ruf Hɔŋ 1 - Vagla

Naomi ni Ruf wia

¹ Mɔɔ ka Izrɛl hina wa dɔɔ koora, sitɔɔraa faa ra binni ba ni. Denii lɔzi faa wa chol a hɛri. Baal bɛl ni u haaŋ ni u biibaala banɛɛ n faa lii Bɛtlihɛm n du Juda hɛri, izi bá ga so Moab hɛri tama.

² A baal sɔnnɛ faa Ɛlimɛlɛk, u haaŋ ge sɔnnɛ Naomi, a biibaala la ge sɔnaa Malɔn ni Kiliɔn. Ba faa lii Ɛfraf n du Bɛtlihɛmnɛ.

³ Baŋ ga soge de la, denii Ɛlimɛlɛk la siu ka ka u haaŋ Naomi ni u biibaala banɛɛ la bɛŋ.

⁴ A biibaala banɛɛ hiŋ paa Moab hina biihaana. Ba haana hiŋ sɔnaa faa Ɔpa ni Ruf.

⁵ Binni fi n wa bɛrɛɛ, Naomi biibaala banɛɛ la maa ge siuzi ka jaa ka u bɛŋ, waa kaa dɔɔ jaari, waa kaa dɔɔ bie ge gba.

⁶ Saŋa bɛl n wa helle, Naomi nuu lugɔ Kɔraawiizi hiini u nɛraa, di tɛɛ baa diwee nɛnnɛ. Awia, u ni u biizi haana la maa faa ɛɛ sirya, bá lii Moab hɛri di bir la ba hɛri.

⁷ Ba maa lii di kpa ŋmɛnɛɛ di ra la Juda hɛri.

⁸ Ka baŋ faa haa du ŋmɛnɛɛ la, Naomi ŋɔ u biizi haana la be, “Ií bir di ra la ii bol ii maawaa be. Kɔ́raawiizi hiini ia, di ɛɛ ia nɛnnɛ gunla iiŋ ɛɛŋ ani gunla iiŋ ɛɛwɛ tɛɛ banla n siuzɛɛ la.

⁹ Kɔ́raawiizi hiini ia, di gil ii bɛl maa kaa bir na jaari, di wer dɔɔ dia.” Denii Naomi faami baa kpaŋkpaŋa, di jaami baa nɛnnɛ, ka jaa ta baa.

¹⁰ Ba ra wii, ka ŋɔ u be, “Akai, yaa daŋ hiŋii di ra la i nɛra be.”

¹¹ Ka Naomi bir di ŋɔ ba be, “Ií bir di ra la bol, n biizi. Ɛrɛɛ wiarɛ ii ŋɔ n ni ia ra lanɛi? N daŋ kaa wer lul biibaala, bá wa birgi ii jannaa?

¹² Ií bir di ra la ii bol, n biizi. N jaa binuu werge maa alugɔ min niŋ kaa wer dɔɔ jaari. Haali gba di a ɛɛwɔ lugɔ n dɔɔ jaari tamiirɛ, di n yuuwɔ zinaa hamuŋa naa gba di lul biibaala,

¹³ ii daŋ wer so di kpaŋ baa, bá wa hellaa? Akai, n biizi, ii gba zummɔ lugɔ guŋ wàá ka wer ɛɛ. Kɔraawiizi lii n hattɛ, a guŋ gil n biini chɔgi werge maa dikuu ii wia.”

¹⁴ Denii ba kaa faari wiraa. Ɔpa jaami u jaari maa, ka tau ŋmɛnɛɛ, ka bir kaali u bol, ka Rufwaa haa chi u be, waa sɛɛwɛ ú kaali ka kau.

¹⁵ Denii Naomi ŋɔ Ruf be, “I dɔŋhiŋ lawaa bittɔɔ ra la u nɛra ni u vuga be la. Awia, í ge gba bir hiŋuu di ra la bol.”

¹⁶ Ruf ŋɔ u be, “Gilɛɛ firiŋ ń lii i be! Gil n nii ra la. Bɔr la maa hin niŋ la, n ge gba daŋ la de, bɔr la maa hin niŋ ga du, n ge gba daŋ ga du de, í nɛra birgi n nɛra, yaa maa kpau di ra hum Kɔraawiizi la hinna hum la.

¹⁷ Bɔr la maa hin niŋ du siu, denii n ge gba du siu, bá hugiŋ de. Kɔ́raawiizi tɔɔriŋ werge maa, di n wa vɛɛ nua naa miŋ ŋɔwɛɛ lugɔ n niibuu naa. Di siu lɛi, kummaa gilɛɛ waa bargi n nii dɔŋa ni.”

¹⁸ Naomi n wa zummɛ lugɔ Ruf ra nyiŋŋuu u nuu ra la la, waa kaa sɛɛ ŋɔ wiimaa.

¹⁹ Denii ba nɛra banɛɛ hiŋ lii di ra la, di vol guŋŋ ka haa ga hel Bɛtlihɛm. Baŋ ga helle, a tir a bol hina maa. Haana la n du de la koobi, di ra ŋɔ, “Naomii kennaa?”

²⁰ U ŋɔ ba be, “Ií gilɛɛ kaa ra yiriŋ Naomi. Ií jaa ra yiriŋ Mara, dikuubɛɛwiai, Kɔraawiizi Fɔŋŋa Maa Hiŋ, gillɔɔ de dui du kpol werge maa di tɛŋ.

²¹ Saŋa la miŋ faa lii ii be ɛŋ la, n faa dɔɔwɔɔ werge maa, ka filaŋkeŋ, Kɔraawiizi gillɔ n bir ba bol, di kummaa waa kaa hoo n nonee. Kɔraawiizi Fɔŋŋa Maa Hiŋ la n chɔgi n wia, ka kpa tɔɔrɔɔ tɛŋ kennaa, ɛrɛɛ wiarɛ ii haa ra yiriŋ Naomei?”

²² Kenne a ɛɛ, Naomi ni u bie haaŋ Ruf la n ɛɛ Moab hinuu la bir lii Moab hɛri, di ba Bɛtlihɛm. Baŋ wa hel Bɛtlihɛm, di ba haŋ faari di ra kum baali.