Room 1 - Vagla

¹ Mìŋ́ Yeesu Kristo balii Pɔɔllɛ a sɛbi hɔnnaa. A par Kɔraawiizii u yiriŋ ń wa ɛɛ u huŋhunni, di liziŋ du amaniyesuma huma naa biini.

² Amaniyesuma la ɛɛ wia la uŋ faa ŋɔ nua di gil u dɔgtɛɛzi sɛbi dau u Hɔnnanii biini faala maa labuu.

³ U Biibaal wiarɛ. Waabuu yaa Dɔɔri Yeesu Kristo la. U newee bɔr, u ɛɛ kooribinii Deevid la lullii.

⁴ Ka Kɔraawiizi n wa lalluu siu biini la, u ɛɛ gunnɛ di bagli lugɔ u ɛɛ u Biibaallɛ, di dɔɔ fɔŋŋa ani u Duma ge.

⁵ U wiarɛ Kɔraawiizi suŋ n ni di hiiniŋ di gil n ɛɛ u huŋhunni bagli u wia ra tɛɛ nɛdee maa, bá wer sɛɛ u wia di yarduu, ú sɔŋ ge na girme.

⁶ Ii gba du banla n sɛɛwɛ la biinii. Kɔraawiizii yir ia ii ɛɛ Yeesu Kristo hora.

⁷ N na jaami ii banla maa n du Room di ɛɛ Kɔraawiizi nɛnɔŋŋaa la uŋ yittɛ ií ba wa ɛɛ u biinanaa la. Yáa Mɛɛ Kɔraawiizi ni yaa Dɔɔri Yeesu Kristo hiini ia di tɛɛ ia bampirsɔna.

Jaantɛɛi wiisuŋŋaa wia

⁸ Wii la min niŋ feli ŋɔ, waabuu keŋ. N na jaami n Mɛɛ Kɔraawiizi ani Yeesu Kristo sɔŋ, dikuu ii maa wia. Bɔr maanii ba ra ŋɔ gunla iiŋ yarduu wia.

⁹ Kɔraawiizi la minna hum ani n biini maa, di ra lizi u amaniyesuma di lii u Biibaal wia biini labuu niŋ ɛɛ n daansɛɛ hiŋ lugɔ n ɔɔ suŋŋuubuu ra tɛɛ ia saŋa maa minna jaamuu

¹⁰ di ɔɔ ra suŋŋuu, di u sɛɛwɔ, ń jaa wer na ŋmɛnɛɛ di wer ba ii be ani bɔsɔna filaŋkeŋ.

¹¹ N na nyiŋŋuu ń na ia werge maa, di wer hiini ia ani Kɔraawiizi Dumnanii wiɛɛlaa fɔŋŋa bɛl, ka ií wer dɔɔ bɔkpega ii hiŋaa biini.

¹² Yaa maa daŋ hiini dɔŋa. Gunla miŋ yardi Kɔraawiizi la daŋ du ia bɔkpega, gunla ii ge n yarduu la du n ge bɔkpega.

¹³ Yaabalaa, n na nyiŋŋi ii zum lugɔ saŋakpila maanii n faa ra nyiŋŋi n ba ii be, ka n faa waa wette ba. N na nyiŋŋi n wer na nɛra tɛɛ Kɔraawiizi lii ii gba biini alugɔ miŋ nawɛɛ lii ii dɔŋahina banla n waa Jus hina ɛɛwɛ di du yeŋa maa biini la.

¹⁴ Giris hina ni nɛkuna, nunzunna ni gɛnaa, ba maanii n lizi amaniyesuma la tɛɛ.

¹⁵ Awia, a du n bampiriire lugɔ min niŋ lizaa tɛɛ ii banla n du Room gba.

¹⁶ Kristo amaniyesuma la wia wanna ɛɛ hiihzi, dikuubɛɛwiai, a ɛɛ Kɔraawiizi fɔŋŋa wiarɛ, di wer ra lɛɛ banla maa n niŋ sɛɛ a wia. Jus hinaa ń feli ɛɛ guŋ tɛɛ, ka jaa ɛɛ tɛɛ banla n waa Jus hina ɛɛwɛ.

¹⁷ Kɔraawiizi gillɔɔ yaa zum lii u amaniyesuma baglaa biini gunla un niŋ ɛɛ nɛ́ra wia deŋli u be. Yarda ɛɛ u luglii di kaa ɛɛ u tuna ge. Ba faa sɛbi guŋ wiarɛ, di ŋɔ, “Nɛr la wia n deŋlee, yardaa niŋ ɛɛ u miibɔɔ.”

Kɔraawiizi baaŋ n fuuhwe werge wia

¹⁸ Kɔraawiizi kaa gil yaa zum gunla u baaŋ n fuuhwe dikuu banla n vɛɛ u nua, ka ra ɛɛ wichɔgaa la ni. Ba wia waa deŋlee. Ba ra tɔ wibii ŋmɛnɛɛrɛ,

¹⁹ dikuubɛɛwiai, ba zum wibii labuu. Wia la n gillɛ nɛra zum Kɔraawiizi du denii. Kɔraawiizii lizaa chaaŋ, nɛr maa wer naa di zum u wia.

²⁰ Un ta durnya guŋŋ wa hel zinaa, ba wettoo na gunla un duwɛɛ. U duula waa na, ka ba wer na gunla un duwɛɛ u kuna la un tawɛɛ la be, di wer chi de zum u fɔŋŋa la n waa tuŋ la ni u Kɔraawiizi ge duula. U lizi a wia maanii chaaŋ. Awia, ba waa kaa dɔɔ nua ban niŋ ŋɔ wii maa.

²¹ Dikuubɛɛwiai, baŋ wette zum Kɔraawiizi la, ka ba waa sɛɛwɛ bá tɔgzuu gunla n dɛguu. Ba biine waa huuhzɛɛ tɛu bá wer tɛu jaaŋ gba. Ba bir bugmi di ra fɛ nfɛrjagazi. Ba siwee waa pillɛɛ ka bir tɔ ra jaa.

²² Ba ra yir bahinaa nunzunna ka ɛɛ gɛnaa.

²³ Kɔraawiizi n dɔɔ girme werge waa siwaa dɔɔwɛ la, ka ba vɛɛu ka ra tɔgzi kuna aŋhina bam mawɛɛ a ɛɛ lugɔ newea, zumbizi, kunnaazi anaazu hina ani kuntuuzaa.

²⁴ Awiarɛ Kɔraawiizi bir har kpu baa, ba ra hiŋ ba kunnyiŋŋichɔgaa, di ra ɛɛ wikuna, di ra ɛɛ dɔŋa bɔrahɔna wichɔgaa.

²⁵ Ba kpa Kɔraawiizi wibii di chɛr kara wia, di ra tɔgzi kuna la un tawɛɛ la kaali u himmaa. Waabuu ɛɛ chiŋ ni hɛri taari di dɛg chɔlaa saŋa maa. Ami.

²⁶ Awiarɛ Kɔraawiizi bir u har kpu baa, ba ra hiŋ ba kunnyiŋŋichɔgaa la. Ba haana gba vɛɛ ba ni baala chɔɔi la, Kɔraawiizi n tɛɛ baa bá ra chɔɔ la, ka ra chɔɔ ba dɔŋa haana be.

²⁷ Baala ge ra ɛɛ guŋ di gil chɔɔi la n dɛkkɛ ka ra nyiŋŋi ba dɔŋa baala ani nyiŋŋichɔgaa werge maa, ba ni baa ra ɛɛ wikuna. Ba wileulaa wiarɛ ba ɔɔ na ba wichɔgaa kinturgaa.

²⁸ Baŋ waa sɛɛwɛ bá zum Kɔraawiizi la wiarɛ u gil ba birgi nfɛrchɔgaa hina di ra ɛɛ wia la n waa dɛkkɛ

²⁹ di dɔɔ wichɔgaa maa ni a dee werge maa, di ra sɛm, di dɔɔ kuna kɛkɛluu, miisɔɔh, bɔwii, nɛkpui, hɔɔzi dii, nɛdaraa ani nɛhaih werge. Ba ra munni nɛra wia

³⁰ di ra zɔɔzi nɛra, di hah Kɔraawiizi, di ra gbɛlli nɛra, di ra yir bahinaa nɛzenaa, di dɔɔ barabara, di ɔɔ ra nyiŋŋi wichɔgfalaa, bá ra ɛɛ di ra vɛɛ ba maawaa ni ba mɛɛwaa nuuzi,

³¹ di nyaa nfɛrɛ. Ba wia waa wibii dɔɔwɛ. Ba waa ba himmaa nɛra bila dɔɔwɛ, ba waa nɛra ni ra suŋ.

³² Bannii maa, ba zum Kɔraawiizi widaulaarɛ alugɔ banla n na ɛɛ wia naa dɛg kpuirɛ, ka ba himmaa haa vɛɛ ra ɛɛa, di kaa ra chɔli banla n na ɛɛa la di ra jaa.