Obadia 1 - Vagla

¹ Wia la Kɔraawiizi La N Kaali Kummaa la n pillɛɛ bagli Obadia di ra bagli Ɛdɔm wiarɛ keŋ. Yaa nuu amaniyee lii Kɔraawiizi be. U faa hum u baliirɛ ú ba wa ŋɔ hɛssi maa hina be, “Ií izi ya ga lɔ Ɛdɔm hina laal.”

² Kɔraawiizi ŋɔ Ɛdɔm hina benii, “N daŋ gil ii gɛrgi hɛssi hina maa be, ba maa danna gbɛlli ia werge.

³ Ii barabara dar iabuu, ii banla n du bia la n jaŋŋɛ di la chiŋ werge nyuuni, di ra zuu a fɔɔliizi, di ra ŋɔ iihinaa be, ‘Anɛɛ n niŋ wer hel yaa di ba yaa ni hɛrɛi?’

⁴ Haali iiŋ la chiŋ alugɔ chig, di ma ii diini chinchiŋwilaa biini gba, ka n daŋ gil ii lii de ba hɛri. Mìŋ́ Kɔraawiizii ŋɔ guŋ.

⁵ Di ŋmɛɛna gɛɛ nɛfooza ba ii be hahmuŋa ni, hɛhchɔg daŋ chol ii ni. Ba wàá ŋmɛɛ ia lɛi ba kiparaa? Di banla n na tɔrgi grepuzi faa wa tɔrgaa, ba wàá gil aŋhinaa?

⁶ Ɛsau naanna, ba daŋ wa paagi ii daama kuna maa nyaamm, haali ii kunnanaananaa la iiŋ suahwɛ gba.

⁷ Nɛra la ii ni baa n dɔɔ nuukpaŋ la daŋ duŋŋi ia lii ii hɛri, ii dammuzi daŋ dar ia di kpegli ia. Banla ii ni baa n ɔɔ kpau ra di la daŋ he ia sidɛɛ, ka ii wàá zum.”

⁸ Kɔraawiizi ŋɔwɔɔrɛ, “N daŋ kpu Ɛdɔm nunzunna maa, a keŋ hɔpizii naa, nɛra la n na nuu wia zɛɛ daŋ lii Ɛsau bizenaa nyuuni.

⁹ Tɛman hina, ɔnsii ni bɔsai daŋ chol ii laallɔɔra maa ni, banla maa n du Ɛsau bizenaa nyuuni la maanii bá kpu.

¹⁰ Iiŋ ga foozi ii lulla Jekɔb dee kuna, di kaa kpu baa jaa la wia, ii maanii bá kpu, ii wàá ka dɔɔ girme di hanna la saŋaa saŋa maa.

¹¹ Ii chigɔɔ ra binni, ka ba dɔma wa chɔgi ba dominuuzi a hɔl hiŋ. Ii ɛɛ nɛchunzii lugɔ a keŋ nɛra naa n ballɛ di wa chi Jɛrusalɛm hina kundɔɔlaa maa kaali, di ga bɔnni dɔŋa la.

¹² A faa waa dɛkkɛ ii bɔra n sɔɔnɛɛ dikuu hɛhchɔg n chol ii lulla ni wia, di ra di iihinaa Juda hina ni, ba anuula saŋa la gɛɛ di ra ta barabara werge, ba tɔɔrɔɔ dii hiŋ biini.

¹³ A faa waa dɛkkɛ iiŋ zuu n nɛra bolzeŋ, di ra di iihinaa ba ni, ba anuula saŋa gɛɛ di paagi ba kundɔɔlaa a hɛhchɔg hɔpizii hiŋ.

¹⁴ A faa waa dɛkkɛ iiŋ chigɛ ŋmɛnichechema di ra lauri banla n ga de chɔ ra kaali la. A faa waa dɛkkɛ iiŋ kpa baa du ba dɔma nonee biini, ba biinichɔg hɔpizii hiŋ.

¹⁵ Hɔpizii la mìŋ́ Kɔraawiizi n niŋ di durnya hɛssi hina seriya duglɔɔrɛ. Ɛdɔm hina, wii la iiŋ kpawɛɛ ɛɛ ii dɔŋahina la, guŋ himmaanii bá kpa ɛɛ ii ge. Ii wiɛɛlaa la daŋ bir laŋŋi ii ni.

¹⁶ N nɛra nyɔɔ n tɔɔrɔɔ niirɛ werge n giŋgimiinanii la nyuu. Ka hɛssi la maa n baruu la daŋ haa nyɔɔ n tɔɔrɔɔ nii werge maa, ba daŋ nyɔɔu kpɛlɛŋŋ, ka siu.

¹⁷ Ka Jekɔb domee daŋ na lɛɛi Bizeŋ Ziɔn nyuu, ú ɛɛ kunnaniinanii, di ɛɛ ba kapɛttɛ bá ra di.

¹⁸ Jekɔb ni Joosɛf domeezi maa daŋ ɛɛ lugɔ niŋ. Ba daŋ chɔgi Ɛsau domee gunla niŋ n ɔɔ di kɔlaa bɛl maa wàá ka ka la. Mìŋ́ Kɔraawiizii ŋɔ guŋ.

¹⁹ Nɛra daŋ lii Nɛgɛv, di wa lɛɛ Ɛdɔm hɛri bizenaa nyuuni, di so. Nɛra kaa lii wiicholii giŋgimee nyuuni di wa lɛɛ Filisti hɛri maa so. A Izrɛl hina daŋ wa lɛɛ Ɛfram ni Samaria hina hɛssi maa. Ka Bɛnjamin domee ge lɛɛ Giliad hɛri di so.

²⁰ Izrɛl hina la baŋ laurɛɛ ba ga so Keenan hɛri la, daŋ lɛɛ a hɛri haali di ga lii Zarɛfaf, banla ge n lii Jɛrusalɛm di wa so Sɛfarad la daŋ lɛɛ Nɛgɛv bolzenaa waa maa.

²¹ Jɛrusalɛm laallɔɔra la n lɔ laal lii, daŋ ga lɔ Ɛdɔm hina, di lɛɛ ba hɛri, di ra di kora ba ni. Ka de hɛri kossi maa jaa ɛɛ Kɔraawiizi hora.”