Nahum 1 - Vagla

¹ Bolzeŋ Ninɛvɛ wia la Kɔraawiizi n pillɛɛ bagli Ɛlkɔs hinuu Nahum lugɔ deeza biini, u sɛbi dawuu keŋ.

Kɔraawiizi baaŋ n fuuh Ninɛvɛ hina ni wia

² Kɔraawiizi ɛɛ zoma hinnɛ, di ɔɔ ra turgi u dɔma ba wichɔgaa kim, di ɔɔ ra tɔɔri banla n na karsuu ni baaŋfuuih werge maa.

³ Kɔraawiizi baaŋ waa ɔɔ ra fuuh manamanaŋ, ka u ɛɛ fɔŋŋa hinnɛ werge, waa ɔɔ gil banla n dɔɔ bilchɔg pɛɛ, di waa ba digna tɛttɛ. U vollibɔr maa ɔɔ dɔɔ vem ni dooŋ pekpegre, baamazi ge ɛɛ u naazi nyɔɔ.

⁴ U ɔɔ ŋɔ wiarɛ fɔŋŋa ni, muuzeŋ hil, di gil muuni maa hil. Basan ni Bizeŋ Kamɛl hɛssi kuna maa yɔl, Lɛbanɔn hɛri ge fiiri maa sizi.

⁵ Bizenaa ɔɔ ra zigluu u see, giŋgimee ge ŋmɛɛri kaali. Hɛri ɔɔ ra zigluu kpikpikpi, di u wa ballɔ, haali durnya ni kuna la maa n du u biini.

⁶ Di u baaŋ wa fuuhwo werge, anɛɛ n niŋ wer chi u seei? U ɔɔ ra diu alugɔ niŋ, bia ɔɔ purguu burburbur u see.

⁷ Kɔraawiizi wessoo, di ra guu u nɛra tɔɔrɔɔ saŋazi. U ɔɔ ra binni banla n yarduubuu.

⁸ U daŋ chɔgi bolzeŋ Ninɛvɛ nyaamm alugɔ nii n suwee di ra lɔ werge, di ɔɔ chɔgi kuna la. U daŋ duŋŋi u dɔma du bɔbiri biini.

⁹ Wia la maa baŋ vɔɔwɛ bá ɛɛ Kɔraawiizi la, u daŋ gil a maa tuŋ. Tɔɔrɔɔ wàá ka ba bunɛɛhiŋ.

¹⁰ Ba daŋ ɛɛ lugɔ sɔɔhri n mil baa, di nyɔɔ siŋ dɛɛzi, niŋ fuuh baa alugɔ kɔlhilaa.

¹¹ Ee, Ninɛvɛ hina, nɛbɛl n dɔɔ biinikpola werge lii ii biinii, di ra vɔɔ jina ú ɛɛ Kɔraawiizi wichɔgaa, di ra bagli nɛra wichɔgaa ŋmɛnizi.

¹² Awia, kenne Kɔraawiizi ŋɔ u nɛra Izrɛl hina be, “Haali Asiiria hina n dɔɔ nɛra werge di du kpeg, ka n daŋ kpu baa bá wia tuŋ. Hoi, Juda hina, haali miŋ tɔɔri ia la gba, màá ka ɛɛ ia guŋ maa.

¹³ Filaŋkeŋ, n daŋ chɔgi fɔŋŋa la baŋ dɔɔwɛ ii ni la, di chaahzi yɔlɔzi la n vɔɔzi ia la ha.”

¹⁴ Kɔraawiizi ŋɔ wiŋɔkpeg bɛllɛ dikuu ii Ninɛvɛ hina wia, “Ií wàá dɔɔ naanna bá ra liizi ii wia. N daŋ chɔgi ii vugsɛɛhlaa ni a luulaa la n du ii vuga diini biine la. N daŋ ki ii bɔɔni dau, dikuu iiŋ chummɛ werge wia.”

¹⁵ Ií binni bizenaa nyuuni na, nɛbɛllɛ kpogli amaniyesuma di vol ra ba, unla n na sii bampirsɔna wia! Juda hina, ií ra di ii hɔpizizenaa, di kpa kuna la maa iiŋ ŋɔ nuuzi lugɔ ii daŋ tɛɛ Kɔraawiizi la tɛu. Biinikpola hina wàá ka zuu ii hɛri di lɔ ia laal maa, n daŋ kpu baa nyaamm.