Maika 1 - Vagla

¹ Kɔraawiizi faa pilli Samaria ni Jɛrusalɛm wiarɛ lugɔ deeza biini, di bagli mìŋ́ Maika n lii Mɔrɛsɛf. A saŋaa Jɔtam, Ahaz ani Hɛzɛkia faa di kossi, Juda hɛri la.

² Durnya hɛssi hina maa, ií ra nuu! Kuna la maa n du hɛri, ií ra nuu! Kɔraawiizi La N Kaali Kummaa la daŋ hau ii ni, u Diinaniinanii la biini,

³ Kɔraawiizi lii u duuribɔttɛ tuu ra ba. U tuuwoo ra ba, ú wa vol bizenaa nyuuni.

⁴ Denii bizenaa ŋmɛɛri u naazi zɛɛ, walli maa pergi alugɔ kel n dugli niŋ di ra ŋmɛɛri la gɛɛ gunla nii n ɔɔ pal di ra tuu bɔwillii la.

⁵ Annii maa daŋ ɛɛu, dikuu Izrɛl hina wichɔgaa wia. Izrɛl hina wichɔgaarɛ a bɛlaai? Samaria hina wichɔgaa lɛiyaa? Juda hina vuga kuaribɔttɛ lee? Jɛrusalɛm lɛiyaa?

⁶ Awia, Kɔraawiizi ŋɔwɔɔrɛ lugɔ u daŋ gil bolzeŋ Samaria puri, di chɔɔ kulululu, di birgi grepu daazi pattibɔr. U daŋ chɔgi a bolzeŋ, di paa u bia maa ga ha waluu biini, ka gil a bolzeŋ zɛɛ maa chɔɔ.

⁷ Samaria hina vuga maanii bá purgi burburbur, di fuuh ba vuga dia kuna maa ani ba vuga maa. Dikuu baŋ naa di lii sɛnsɛnna kinturgaa biinii wia, gunnɛ bá kaa kpaa ga turgi sɛnsɛnna yembɛl.

Wiraa ni biinichɔg wia

⁸ Dikuu keŋ wia, mìŋ́ Maika daŋ lɔ wile, di ra wii, di ra vol ni n naadumazi ni chakpal, di ra bar. N danna uuli alugɔ hohobia n na wii, di kaa ra wii alugɔ kikiu.

⁹ Ba wàá wer chaa Samaria hina ŋmɛra. Juda hina gba daŋ wa di a keŋ tɔɔrɔɔ naa. Chɔgaa jaa hel Jɛrusalɛm dominuuzeŋ himmaanii, bɔr la n nɛra n duwɛɛ.

¹⁰ Ií gilɛɛ waa ŋɔ Gaf hina be, di gilɛɛ waa wii de gba. Bɛf Ɔfra hina, ií chɔɔ bumburi biini di ra billi, dikuu ii biinichɔg wia.

¹¹ Safir hina, ba daŋ wa lauri ia ni ii chakpalli, di kaali hɛrduma, ii di hiihzi. Zaanan hina wàá kur lii ba bolzeŋ. Di ii wa nuu Bɛf Ɛzɛl hina n na wii, ii daŋ zum lugɔ suahribɔr waa hoo de.

¹² Marɔf hina chigɔɔ, ba bɔra ra waazi, di ra kpaŋ ba na lɛɛi, dikuubɛɛwiai, Kɔraawiizi gillɔɔ hɛhchɔg chol ba ni, haali di ga hel Jɛrusalɛm dominuuzeŋ la gba.

¹³ Ii banla ge n du Lakis, ií lauri ii zagra vɔɔzi a laal torkozi ni. Ii chanzi Izrɛl hina wichɔgaarɛ, di gil Jɛrusalɛm hina ɛɛ wichɔgaa.

¹⁴ Awia, filaŋkeŋ, Juda hina, ií ta Mɔrɛsɛf Gaf hina ŋmɛnɛɛ. Izrɛl koora wàá ka na hiinaa, lii Akzib hina be maa.

¹⁵ Marɛsa hina, Kɔraawiizi daŋ kpa ia du ii dɔma nonee, bá ba wa foozi ii bol dɔɔ. Izrɛl hina sitɔɔra daŋ la ga suah Adulam bia bɔɔni.

¹⁶ Juda hina, ií gbaari ii nyuuni alugɔ duuni, dikuu ii biine n chɔkkɛ, ii bichalli la iin nɔŋŋɛɛ wia. Ba daŋ wa lauri baa yoma, di kaali hɛrduma.