Maak 1 - Vagla

Jɔɔn Kɔraawiizi Niisɔɔri wia

¹ Amaniyesuma faaraarɛ keŋ. A ɛɛ Kɔraawiizi Biibaal Yeesu Kristo wiarɛ.

² Kɔraawiizi faa gillɔɔ u dɔgtɛɛ la banna yir Aizaaya la sɛbi u wia u Hɔŋ biini di ŋɔ, “A nuu! N daŋ hum n huŋhunni bɛl ú tɔ i see di gaa ɛɛ sirya i ra ba.”

³ Ba daŋ nuu nɛbɛl n na sii hɛribɔduma biini, di ra ŋɔ, “Yaa Dɔɔri ra bau. Ií ra ɛɛ sirya ú ra ba. Ií ra ɛɛ wia á ra deŋli ni a ŋmɛnizi.”

⁴ Denii baal bɛl izi ba hɛribɔduma. U sɔnnɛ faa Jɔɔn, ba kaa ra yiruu Kɔraawiizi Niisɔɔri. U ɔɔ ra sii, di ra ŋɔ, “Ií maa gil ii biine chɔgi dikuu ii wichɔgaa wia, di gil a maa ta, ka Kɔ́raawiizi gil di tɛɛ ia, ka ń ge sɔ ia Kɔraawiizi nii.”

⁵ Juda hɛri hina ni Jɛrusalɛm hina maa lii la u be di ga sɛɛ chɔgri dikuu ba wichɔgaa wia. U sɔ baa Kɔraawiizi nii Jɔɔdan muu biini.

⁶ Jɔɔn ɔɔ faa tɔ wɛjɛ bɛllɛ baŋ kpa nyugma huna suah, di kpa kurhɔŋ kirsi, di ra di huuhni ni huuhnuu.

⁷ U ɔɔ ra sii, di ra ŋɔ, “Nɛbɛl du har di ra ba. Waabuu ɛɛ nabɔma n ni werge maa. Maa dɛg min niŋ lizi u gawa gba tɛu.

⁸ Miŋwaa n kpa nii ra sɔ ia naa, ka unla n tɔ har di ra ba la, Kɔraawiizi Dumnanii ni ninne waabuu wa kpa du ii ni.”

Yeesu niisɔi ni u zɛɛ dai na wia

⁹ A saŋa, Yeesu lii Nazarɛf n du Galilii hɛri, di ba Jɔɔn be Jɔɔdan muu la, u sɔ u ge Kɔraawiizi nii.

¹⁰ Yeesu n wa lii nii la biini, u binni chiŋ di na baama n yaawɛ. Kɔraawiizi Dumnanii ga de tuu wa togni u nyuu lugɔ komma.

¹¹ U nuu loobii bɛl n lii chiŋ di ŋɔ, “Hinuu n biinɔŋŋii. I wia parimbuu werge.”

¹² Denii Kɔraawiizi Dumnanii gil Yeesu zuu hɛribɔduma.

¹³ Un zuu de la, u la bɔr la sela ni kunchɔgaa n ɔɔ du la, di ga du de hɔpizaa tokkoanɛɛ. Sitaani ba u be de di wa ɛɛu na, ú vii ɛɛ wichɔgaa. Mɛlikazi ge gba ba u be di wa hiinuu.

Yeesu lugli hiŋra yiraa wia

¹⁴ A hɔl bɛl, ba lau Jɔɔn tɔ dia. Ban lawuu la, Yeesu ge izi ba a Galilii hɛri di ge waa sii amaniyesuma la di ra tɛɛ nɛra,

¹⁵ di ra ŋɔ, “A saŋa helloo. Kɔraawiizi Kora dii jaa dugluu. Awia, ií gil ii biine chɔgi dikuu ii wichɔgaa wia, ka yardi amaniyesuma naa.”

¹⁶ Denii u ga Galilii muuzeŋ la kɛrii di ra kaali di ga na nyinlaura banɛɛ n na ta asauzi muuzeŋ la biini. Bɛl sɔnnɛ faa Saimɔn. Bɛl ge sɔnnɛ Andru, u faa ɛɛ Saimɔn niweere.

¹⁷ Yeesu ŋɔ ba be, “Ií izi di ra hiŋiŋ. Ii faa ra kuuh nyinni kuuhnii. N daŋ jaa gil ii ra kuuh newea kuuhni.”

¹⁸ Ba gil ba asauzi ka izi manaŋ di ra hiŋuu.

¹⁹ U kaa kpa ra lii see tama, di nɛra baŋhina sogo muugbera biini di ra lonzi ba asauzi. Zɛbɛdi biibaala Jems ni u niwee Jɔɔn faa du ba biinii.

²⁰ Yeesu yir baa dí ba ba. Ba gil ba mɛɛ ni u balaa muugbera la biini, ka izi di ra hiŋuu.

Yeesu n duŋŋi tinnanchɔgii wia

²¹ Ba maa kpa wa hel bol bɛl banna yir Kapɛniɔm. Ba Heezaa Hɔpizii n wa helle, Yeesu zuu ba jaamaa dia, di bagli Kɔraawiizi wia ra tɛɛ nɛra.

²² Banla n du de ra nuu u wiŋɔzi la, a tir baa. U baglaa la biinii ba chi zum lugɔ u dɔŋ lɛi Kɔraawiizi Hɔnzunna la, dikuubɛɛwiai, ɔɔ ra baglaabuu lugɔ u himmaa n dɔɔ a fɔŋŋa.

²³ Baal bɛl faa du ba jaamaa dia la biini. Tinnanchɔgii hinnɛ faa. U izi di ra pogzi,

²⁴ di ra ŋɔ, “Nazarɛf hinuu Yeesu! Bɛɛ i ra nyiŋŋi yaa benei? I ballɔɔ í wa chɔgi yaa gɛɛ? N zumiibuu. Hinuu Kɔraawiizi Biinaniinanii la!”

²⁵ Yeesu ŋɔ tinnanchɔgii la be, “Gil kɔɔi ka wa lii a baal ni!”

²⁶ Tinnanchɔgii la izi a baal, di kpau ha, di pogzi werge ka lii.

²⁷ A tir ba maa. Ba maa ra pɛɛzi dɔŋa, “Beedee widizii kennei? Wifalaarɛ! Ii waa na gunla u wiŋɔzi la n dɔɔ fɔŋŋa, u ŋɔ tinnanchɔgaa be dí a wa lii a wa liiyaa?”

²⁸ Tama, di Galilii hɛri hina la maa n dugli de nuu u wia.

Yeesu n chaa nɛkpila wia

²⁹ Yeesu izi di lii a jaamaa dia di ra la, u ni Jems ni Jɔɔn, di ga zuu Saimɔn ni Andru dia,

³⁰ di Saimɔn hilahaaŋ du de di ra wii. U bɔra maa faa wenzi, u chɔɔ dia. Baŋ wa ŋɔ u wia Yeesu be,

³¹ u zuu u be di lau u nonii di tɛruu. Uŋ haŋ wa ɛɛ guŋ, wiila la lii haaŋ la ni. U izi di ra hum baa.

³² Wiizi n wa zuuwɛ a duana hiŋ, a bol hina paa ba wiila hina maa ni tinnanchɔgaa hina maa ba Yeesu be.

³³ Bol la hina maa chaali u dominua maa.

³⁴ U chaa wiila hina kpilakpila de, ba wiilchɔgaa maa lii ba ni, di kaa duŋŋi tinnanchɔgaa ge nɛkpila ni. Tinnanchɔgaa la maa zumuubuu. Awia, Yeesu waa sɛɛwɛ á ŋɔ wia di bagli nɛr la dee uŋ ɛɛwɛ.

Yeesu n ŋɔ Kɔraawiizi wia Galilii biini wia

³⁵ Hɔɔŋ waa pizi, bɔr ra ɛɛ kɔlɔkɔlɔ, Yeesu feli izi nyiŋŋi bɔduma bɛl di gaa suŋŋi wiizi de, u bɛŋ.

³⁶ Denii Saimɔnwaa izi di ra nyiŋŋuu.

³⁷ Baŋ wa nau, ba ŋɔ u be, “Nɛra maanii ra pɛɛzi i wia.”

³⁸ Yeesu ŋɔ ba be, “Ya izi ɛŋ di ra la bola la n kawɛɛ la, ń ga ŋɔ Kɔraawiizi wia tɛɛ ba ge, bá nuu. Awiarɛ n ba.”

³⁹ Ba izi di ra vol Galilii hɛri la maa, u ra ŋɔ Kɔraawiizi wia ba jaamaa diini la biine, di ra duŋŋi tinnanchɔgaa nɛra ni.

Yeesu n chaa baal bɛl wia

⁴⁰ Denii bɔchɔgaa hiŋ bɛl izi ba Yeesu be, di wa giŋŋi u see fɔrguu, di ŋɔ, “N Dɔɔri, di a parii, i daŋ wer chaa n bɔchɔgaa naa.”

⁴¹ U wia dɔɔ sinyɛna Yeesu be. U tɛr u nonii gbɔgzuu, ka ŋɔ, “A parimbuu. N chaaibuu la!”

⁴² Uŋ haŋ wa ŋɔ guŋ tuŋ, di a bɔchɔgaa tuŋ u ni kakpaŋ, u nyaagi.

⁴³ Denii Yeesu ŋɔ dí u ra la dia, ka karfuu werge maa, di ŋɔ,

⁴⁴ “A dazi í waa ŋɔ wiimaa ra tɛɛ nɛr maa, ka la Kɔraawiizi kizeehiŋ be ú ga nai. Di u wa nai, gil u lizi mbusu tɛi gunla Moosis n faa bagli ia ŋɔ ií ra ɛɛ la, nɛ́ra zum lugɔ i jaa nyaaguu.”

⁴⁵ A bɔchɔgaa hiŋ lii, ka waa gunla Yeesu n ŋɔwɛɛ la hiŋŋɛ, ka kpa ra ŋɔ nɛr maa be gunla Yeesu n ɛɛwɛ tɛu. Uŋ ɛɛ gunla wia, Yeesu waa wette u kaa zuu bol maa di waa suahzɛɛ lɛi. U jaa du bol nuuzi, ka nɛra lii yemmaa di ra ba u be.