Levi Dee 1 - Vagla

Mbusu lizaa kuna fuuih wia

¹ Kɔraawiizi yir Moosis di ŋɔ wia tɛu di lii U Ni Chemaa Tanti Dia la biini di ra ŋɔ,

² “Ŋɔ Izrɛl hina be lugɔ di ba bɛl maa waa lizi mbusu lizaa kuna ú wa tɛŋ, ú gil u lii u nauna gɛɛ u peeza gɛɛ u buuna biini.

³ Di mbusu lizaa sefuuhlii lii u nauna biinii, a dɛkkɔɔ ú lizi u bal la n kpekke, di kpau ba n Ni Chemaa Tanti Dia la dominua, guŋ gil n lɛɛu.

⁴ U daŋ kpa u nonee sag mbusu lizaa sel nyuu ni, ú ɛɛ u mbusu lizaa sefuuhlii, di ɛɛ u wichɔgaa kinturgaa.

⁵ U daŋ kpu a nabalee n see, Aarɔn biibaala la n ɛɛ kizeehina la kpa u chal tɛŋ, ka kpaa mizi mbusu lizibɔr keŋkerezi anaazu la maa n du n Ni Chemaa Tanti Dia dominua la.

⁶ U daŋ sih a sel di mɔnnuu.

⁷ Kizeehiŋ Aarɔn la biibaala daŋ paa daazi sag mbusu lizibɔr la ni di chem niŋ,

⁸ ka jaa paagi a ola ni u nyuu ni u nuuri sag a niŋ ni.

⁹ Nɛr la n na lizi mbusu la daŋ yagli u biini kuna ni u gballi, Kɔraawiizi kizeehiŋ la jaa fuuh u maa mbusu lizibɔr la ni, ú ɛɛ mbusu lizaa sefuuhlii la sɔɔh n summɛ tɛŋ.

¹⁰ Ka di u ɛɛ mbusu lizaa sefuuhlii di lii u peeza gɛɛ u buuna biini, u daŋ ɛɛ u bal la n kpekke.

¹¹ U daŋ kɔrguu mbusu lizibɔr la wiifurii nomɛɛl wiikakag keŋkere n see, Aarɔn biibaala la n ɛɛ kizeehina la jaa kpa u chal mizi bar mbusu lizibɔr keŋkerezi anaazu la maa ni.

¹² Nɛr la n na lizi mbusu la daŋ mɔnnuu di kpa u nyuu ni u nuuri jaa. Kɔraawiizi kizeehiŋ paagi a maa sag a niŋ ni mbusu lizibɔr la ni.

¹³ Nɛr la n na lizi mbusu la, daŋ yagli u biini kuna ni u gballi, n kizeehiŋ la jaa kpa u maa fuuh, mbusu lizibɔr la ni, ú ɛɛ mbusu lizaa sefuuhlii la sɔɔh n summɛ tɛŋ.

¹⁴ Di u ɛɛ mbusu lizaa kuŋfuuhlii la n ɛɛ kunzaahri, guŋwaa, a dɛkkɔɔ u lizi koorikomma gɛɛ koŋaahmu.

¹⁵ N kizeehiŋ la daŋ kpau ba mbusu lizibɔr la, di wa lau u nyuu miŋŋi tɔri, di fuuuh mbusu lizibɔr la ni, ka gil u chal toŋzi mbusu lizibɔr la kɛrii.

¹⁶ U daŋ lizi u chigii la maa bir ha mbusu lizibɔr wiifurii la banna ta hɔɔhri la.

¹⁷ Denii u jaa lau u keeri di tɛruu piili ka gilɛɛ waa tɔruu anɛɛ. Ka n kizeehiŋ la jaa fuuuh mbusu lizibɔr la ni, u ɛɛ mbusu lizaa kuŋfuuhlii la sɔɔh n summɛ tɛŋ.”