Jowɛl 1 - Vagla

¹ Wia la Kɔraawiizi n pillɛɛ bagli Pɛtuɛl biibaal Jowɛllɛ keŋ.

Lotorozi wia

² Ií ra nuu, ii banla n ɛɛ nabɔnzi, ií ra nuu, nɛra la maa n du Juda hɛri. Wii naa dɔŋ haa ɛɛwɔ ii saŋa gɛɛ ii naabaala saŋaa?

³ Ií ŋɔ a wia tɛɛ ii biizi, di gil ii biizi ge ŋɔa tɛɛ ba biizi, ba ge biizi wa ŋɔa tɛɛ banla n niŋ wa hiŋ ba ni.

⁴ Kuna la lotorozi kpila werge n diwee ka ka, lotorokpega ɔɔ bau wa dia. Anla a ge n wa diwee ka ka, a jigzi ɔɔ wa diabuu. Anla a jigzi la n diwee ka ka, lotorozi aŋhina ɔɔ wa diabuu.

⁵ Sinnyɔɔra, ií izi di ra wii! Ií ra lɔɔgi wile, ii banla n na nyɔɔ siŋ, dikuu iiŋ wàá ka na siŋfalii nyɔɔ wia.

⁶ Lotorozi lugɔ laallɔkpega ballɔɔ á wa chɔgi yaa hɛri maa, a dɔɔ fɔŋŋaa werge maa, a waa maga dɔɔwɛ, a nyina ra diu lugɔ bunyiŋ nyina.

⁷ A chɔgi yaa grepu daazii, di hee yaa fig daazi. A po a hɛga maanii ha, ka ka a kela, a huuhzi chi.

⁸ Ií ra wii alugɔ toloori la n su haaŋ ka u haa waa baal zummɛ, di nigni gbɔglɔŋ di ra wii, dikuu u bichaljaari la un niŋ vii yuu n siuwɛ wia.

⁹ Mbusuzi lizaa mia gɛɛ siŋ waa hoo bá kpa ba Kɔraawiizi Dia. Kɔraawiizi kizeehina ra wiiu, dikuu baŋ waa kuna dɔɔwɛ, bá kpa lizi mbusuzi Kɔraawiizi be wia.

¹⁰ A kooni maanii chɔkkɛ, a hɛri maa hil, mia maa chɔgi, grepu nɔna maa hil, ɔlivi daazi ge maa hil.

¹¹ Patta, ií gil ii bɔra huah, grepu patta, ií ra lɔɔgi wile, ií gil ii biine chɔgi dikuu huuti ni baali wia, dikuubɛɛwiai, pattikuna maanii chɔkkɛ.

¹² A grepuzi daazi maanii hillɛ, fig daazi maa yɔl, pomegranet, abɛ, huu daazi ani kooni daazi maanii hillɛ. Wibii maa, newea bɔsɔna tunnɔɔ.

Wichɔgaa gilaa ta wia

¹³ Kɔraawiizi kizeehina, ií kpa gbɔglɔnzi tɔɔgi di ra wii, ii banla n na hum mbusu lizibɔr la! Ií zuu Kɔraawiizi Dia la di ra wii hamuŋa maa! Mia gɛɛ siŋ waa hoo ii kpa ra lizi mbusuzi Kɔraawiizi Dia.

¹⁴ Ŋɔ bá vɔɔ nua, chaali nɛra maa! Chaali nabɔnzi ni nɛra la maa n du a hɛri, di ba Kɔraawiizi la iinna hum la Dia, di wa wii tɛu.

¹⁵ Gooŋga! Kɔraawiizi Hɔpizii la duglɔɔrɛ! Hɔpizii la Kɔraawiizi Fɔŋŋa Maa Hiŋ n niŋ gil chɔgaa ba. Ɔnsii werge daŋ du de a hɔl hiŋ.

¹⁶ Yaa chigɔɔ haa nuuzi di ra binni, ka yaa pattikuna maa chɔgi. Bɔsɔna ge waa kaa hoo Kɔraawiizi la yaa n na hum la Dia biini.

¹⁷ Kunduulaa maanii siuwɛ dikuu a hɛri n hillɛ wia. Mia waa hoo bá kaa du buugazi biine, awia, a buugazi maanii purgee.

¹⁸ Nauna ra wiiu, dikuu kooree n waa hoo á di wia, haali peeza gba ra di dɔgnya.

¹⁹ Kɔraawiizi, hinuu n wii ra tɛɛ, dikuubɛɛwiai, kooree ni daazi maanii hillɛ, alugɔ niŋ n fuuah la.

²⁰ Haali pir sela maa wii ra tɛɛ hìŋ́ Kɔraawiizi, dikuubɛɛwiai, muuni ni gɔŋa maanii hiihzɛɛ, niŋ ge fuuh sela diiribɔra maa.