Josua 1 - Vagla

Kɔraawiizi n bagli Josua wia la un niŋ ɛɛ

¹ Kɔraawiizi balii Moosis n wa siuwɛ, Kɔraawiizi ŋɔ Nun biibaal Josua la n ɛɛ Moosis hiini la be,

² “Josua, n balii Moosis siuwɔɔ. Awia, ɛɛ sirya filaŋkeŋ, di izi tɔ n nɛra Izrɛl hina see, ií gi Jɔɔdan muu di la hɛri la minna nyiŋŋi n tɛɛ baa la.

³ N daŋ tɛɛ i ni n nɛra bɔr la maa iin niŋ kpa ii naazi jag, gunla miŋ faa ŋɔ nua tɛɛ Moosis la.

⁴ Ii hɛri magbɔɔ daŋ chi wiifurii nodig wiikakag hɛribɔduma la guŋŋ di ga chug Lɛbanɔn bizenaa la n du wiifurii nomɛɛl wiikakag. Di kaa lii Muu Yufretis la n du wiifurii la, di ga Hitti hina hɛri di ra la Muuzeŋ Mɛditerenɛn la n du wiicholii la.

⁵ Nɛr maa wàá wer kpeglii maa, i de dui saŋa. Gunla miŋ faa du Moosis be la, gunnɛ ń du i ge gba be. Màá gilii ta gɛɛ di ɛɛ i wia vɛɛlai maa.

⁶ Awia, chiiri zɛɛ, di dɔɔ bɔkpega, dikuubɛɛwiai, hinuu niŋ tɔ a nɛra naa see di la hɛri la miŋ ŋɔ nua lugɔ n daŋ tɛɛ ba naabaala la.

⁷ Chiiri zɛɛ, di dɔɔ bɔkpega. A du tau di wer hiŋ Gbɔg la n balii Moosis n tɛi la, gilɛɛ wa bir har di ra kpuu, ka i wiɛɛlaa maa wer lii siwee, bɔr la maa hin niŋ la.

⁸ Ɛɛ ra karmi Gbɔg Hɔnnaa di ra tɛɛ a nɛra saŋa maa, di gilɛɛ waa gar. Ka ra helluu hɔpizaa ani hamuŋa maa, í wer di ra ɛɛ wia la maa baŋ sɛbɛɛ du u biini la. Denii í nyɛɛli, i wiɛɛlaa maa ge lii siwee nɛnnɛ.

⁹ Maa ŋɔ í chiiri zɛɛ, di dɔɔ bɔkpegaa? Gilɛɛ gil i bɔra waa sa di waa huah, dikuubɛɛwiai, mìŋ́ Kɔraawiizi la hinna hum la daŋ du i be, bɔr la maa hin niŋ la.”

¹⁰ Denii Josua jaa ŋɔ a nɛra sitɔɔra be,

¹¹ “Ií gaagi a chɔɔribɔr maa di ŋɔ a nɛra maa be lugɔ bá ɛɛ sirya di nyiŋŋi diwee nɛnnɛ, hɔpizaa ahoro hɔl, ba daŋ gi Jɔɔdan muu di ga foozi hɛri la Kɔraawiizi la banna hum la n na tɛɛ baa la, di so.”

¹² Denii Josua chaali Rubin ni Gad dizi ani Manasɛ dee yeŋ, di ŋɔ ba ge be,

¹³ “Ií ra liizi gunla Kɔraawiizi balii Moosis n faa ŋɔwɛɛ tɛɛ ia la, ‘Kɔraawiizi la iinna hum la ra tɛɛ iabuu Jɔɔdan muu wiifurii paga naa, ií so.’

¹⁴ Ii haana ni ii biizi ani ii sela waa daŋ wer du Jɔɔdan muu wiifurii bɔnnaa Moosis n tɛɛ ia naa, ka ii laallɔɔra la waa vɔɔ nɛnnɛ, di tɔ see gi a muu di ga hiini ii dɔŋahina Izrɛl hina la n kawɛɛ la,

¹⁵ di ra la saŋa la Kɔraawiizi n niŋ wa tɛɛ baa a hɛri, Jɔɔdan muu wiicholii paga la bá so gunla uŋ tɛɛ ia la, bá ge wa wer foozi hɛri la Kɔraawiizi la iinna hum la n na tɛɛ baa la. Di guŋ wa ɛɛwɔ tuŋ, ii daŋ jaa wer bir ba di wa so ii himmaa hɛri naa Kɔraawiizi balii Moosis n tɛɛ ia, a Jɔɔdan muu wiifurii naa.”

¹⁶ Denii ba sɛɛ tɛɛ Josua, di ŋɔ, “Wii la maa hin niŋ ŋɔ yá ɛɛ, yaa daŋ ɛɛu. Bɔr la maa ge hin niŋ hum yaa, yaa daŋ la.

¹⁷ Yaa daŋ hiŋ i nua gunla yaa n hiŋ Moosis nua la. Kɔ́raawiizi la hinna hum la du i be, gunla uŋ faa du Moosis be la.

¹⁸ Nɛr la maa n niŋ vɛɛ i nua, bá kpuu. Awia, chiiri zɛɛ di dɔɔ bɔkpega!”