Joob 1 - Vagla

Joob wia

¹ Baal bɛllɛ faa du de, u sɔnnɛ Joob. U faa du hɛri bɛl banna yir Uz. U faa ra jaami Kɔraawiizii, u wia dɔɔ wibii u be. Joob faa ɛɛ nɛnaniirɛ, di ra du tau ni wichɔgaa ɛɛi.

² U faa dɔɔ biibaala baniidaanɛɛ ni biihaana bahoroo,

³ di dɔɔ peeza ge kagboŋa aniidaanɛɛ, nyugmazi kagboŋa ahoro, napattaa kagboŋ ani kauzi kalfaanue, di kpa balaa kpila maa. Waabuu faa ɛɛ nɛzeŋ di dɔɔ daama werge, di kaali nɛra la maa n faa du de barii.

⁴ U biibaala ɔɔ faa ra daali diuzenaare ba diini ka ra tɛɛ dɔŋa, ba ɔɔ yir ba niuhambizi bahoro la, ba ba, ba maa di ka nyɔɔ.

⁵ Di ba diuzenaa dii haŋ wa tuŋ, Joob ɔɔ faa hum ba bɔttɛ, di sɔ lizi ba doŋa ha, bá ɛɛ nɛnanaananaa Kɔraawiizi be. U ɔɔ izuu chɔɔzimpikke ni, di lizi mbusu fuuh tɛɛ Kɔraawiizi, di ra fɛ, “Aŋhinabe, n biizi ɛɛ wichɔgaarɛ, di see Kɔraawiizi nua ba bampiree biine.” Gunnɛ Joob ɔɔ faa ra ɛɛ, saŋaa saŋa maa.

Joob lugli ɛɛi na wia

⁶ A hɔl bɛl, mɛlikazi chaali Kɔraawiizi be, Sitaani ge wa jaa ba ni.

⁷ Kɔraawiizi pɛɛzi Sitaani, “Lee i liiyɛi?” Sitaani ŋɔ, “Hɛrii n du di gaagi ra bar.”

⁸ Denii Kɔraawiizi pɛɛzi Sitaani, “Ɛrɛɛ n balii Joob wia duɛi? Nɛr maa waa hoo hɛri lugɔu. U wia dɔɔ wibiire, u ɛɛ nɛnaniirɛ. U ra jaamimbuu, di ra du tau ni wichɔgaa ɛɛi.”

⁹ Sitaani pɛɛzi Kɔraawiizi, “I ŋɔ pɛɛrɛ u ra jaamii?

¹⁰ I ra guu u ni u diahina ni u kundɔɔlaa maanii nɛnnɛ, di kissuu u wiɛɛlaa maa biini. Guŋ gil u sela wazi, di yaari a hɛri maa biini.

¹¹ Ka di i gillɔ u kuna naa maa tuŋ, u daŋ seei nua, i sibɔɔ.”

¹² Kɔraawiizi ŋɔ Sitaani be, “Guŋ wesso. Joob kundɔɔlaa maa du i nonee biinii, ka gilɛɛ waa gbɔgzi u himmaa.” Denii Sitaani lii Kɔraawiizi be kaali.

¹³ A hɔl bɛl, Joob biizi ba, ba kpɛɛma dia, di waa di diuzenaa, di ra nyɔɔ siŋ.

¹⁴ Denii Joob balii bɛl chɔ ba u be, di wa ŋɔ, “Yaa kpogli navargazi labuu di ra par, ka kauzi la ge dugli de di ra di,

¹⁵ kakpaŋ, Saba hina ba di wa lɔ yaa, di kpu n dɔŋahina maa, ka tigaa kaali. N bɛnnɛ liiwɛ di chɔ ba ń wa kalii!”

¹⁶ Uŋ faa haa ra ŋɔ a wia, di a balii bɛl ballɔ di wa ŋɔ, “Dooŋ pozi peeza la ni i balaa la ninɛɛ, di fuuh ba maa, ka n bɛnnɛ liiwɛ, di chɔ ba ń wa kalii!”

¹⁷ U ge n faa haa ra ŋɔ a wia, di a balii bɛl kaa ba, di wa ŋɔ, “Babilɔn hina ŋmɛɛna sugezi ahoro ballɔɔ di wa lɔ yaa, di kpu i balaa maa, ka tig i nyugmazi la maa kaali. N bɛnnɛ liiwɛ di chɔ ba ń wa kalii.”

¹⁸ U ge n faa haa ra ŋɔ a wia, di a balii bɛl kaa ba, di wa ŋɔ, “I biizi du ba kpɛɛma diarɛ di ra di, di ra nyɔɔ siŋ.

¹⁹ Denii pekpeg bɛl lii hɛribɔduma di wa yag a dia, u chol ba ni, ba maa siu. N bɛnnɛ liiwɛ, di chɔ ba ń wa kalii!”

²⁰ Denii Joob izi di lau u tagta jaŋ la uŋ laalɛɛ la, di piili ni biinichɔg, di gbaari u nyuu, ka chɔɔ pi, di ra jaami Kɔraawiizi,

²¹ di ŋɔ, “Ba lulimbuu ni chakpal, chakpallɛ ń kaa kpa kaali. Kɔraawiizii tɛɛwɛ, waabuu kaa lɛɛ, u dɛg dargaarɛ.”

²² Haali annii maa gba, ka Joob waa sɛɛwɛ ɛɛ wichɔgaa, di zuu Kɔraawiizi ni.