Jems 1 - Vagla

¹ Mìŋ́ Jems n ɛɛ Kɔraawiizi ni yaa Dɔɔri Yeesu Kristo baliirɛ ra sɛbi hɔnnaa, di ra tɛɛ ii banla n ɛɛ Yeesu hiŋra di yaari du yemmaa la. N na jaami ia.

Yarda ni nunzuma wia

² Yaabalaa, di tɔɔrɔɔ kpila wa huuzi ia, ií gil ii bɔra sɔɔni ia werge.

³ Ií zum lugɔ di tɔɔrɔɔ maa wa ɛɛ ia di na ka ii haa wer dɔɔ yarda di ra hiŋ, amɔ, gunnɛ niŋ gil ii ɔɔ wer dɔɔ kanyitti.

⁴ Ama, ii gilɛɛ gil ii kanyitti dii waa tuŋ, ka ií haa vɛɛ ra di kanyitti guŋŋ ú wer kuari ia nɛnnɛ di wa tuŋ, ií wer zum wiimaa nɛnnɛ, di gilɛɛ waa nyaa mananaa dee maa.

⁵ Di hinla maa ra nyiŋŋi nunzuma, amɔ, í ra suŋŋi Kɔraawiizi ú tɛi. Waa ɔɔ ra nyɛg banla n na suŋŋuu guŋ ni, ka u ɔɔ ra tɛɛ baabuu werge maa. Di i suŋŋuu, i daŋ na kunla hiŋ suŋŋɛɛ u be.

⁶ Ka di ii ra suŋŋuu, ií ra suŋŋuu ni yarda, di gilɛɛ ra aani. Nɛr la n na suŋŋi Kɔraawiizi ka ra aani lugɔ wàá tɛu la, a hiŋ ɛɛwɔɔ lugɔ muuzeŋ la peu n niŋ wer bir u nii di ra la bɔr maa labuu.

⁷ Ú gilɛɛ ra binni lugɔ u daŋ na kunla maa un suŋŋɛɛ Kɔraawiizi be.

⁸ Nfɛssi anɛɛ hinnɛ ra chol. U wiimaa wàá wer kuari.

⁹ Di i ɛɛ Yeesu hiŋri ka ɛɛ nyaari, ka í gil i bɔra sɔɔnii. I ɛɛ nɛzenne Kɔraawiizi be.

¹⁰ Di i ɛɛ daama hiŋ genii, ka í gil i ni nyaara nuukpaŋ dɔɔi la sɔɔni i bɔra, dikuubɛɛwiai, u daŋ siu lugɔ pir fiiri.

¹¹ Gunla wiizi n ɔɔ baŋ di lɔ, koorii hil, u fiiri yɔl, u wessi chɔgi la, gunnɛ daama hiŋ ge ɔɔ ɛɛ u wia ka bir wa siu la.

¹² Hinla maa n dɔɔ kanyitti di ra di tɔɔrɔɔ, gil i bɔra sɔɔnii. Di a tɔɔrɔɔ ɛɛi guŋŋ di wa huhzi, ka i haa vɛɛ ra hiŋ ani kanyitti, i daŋ na tɔna. Kɔraawiizi daŋ tɛi u miibɔɔ la uŋ faa ŋɔ nua lugɔ u daŋ kpa tɛɛ banla maa n nɔŋŋuu la.

¹³ Di kummaa wa darii lugɔ í ɛɛ wichɔgaa, gilɛɛ ŋɔ Kɔraawiizii darii. Kummaa wàá wer dar Kɔraawiizi ú ɛɛ wichɔgaa. U ge gba wàá dar nɛr maa ú ɛɛ wichɔgaa.

¹⁴ Kunnyiŋŋichɔgaa la n du bɛl maa bampirii labuu ɔɔ ra daruu, ú ɛɛ wichɔgaa. Aabuu ɔɔ ra da u zɛɛ.

¹⁵ Kunnyiŋŋichɔgaa a lul wichɔgaarɛ. Di wichɔgaa ge wa hello tuŋ, a ge ɔɔ lul siu.

¹⁶ N nɛnɔŋŋaa, ií bɛl maa gilɛɛ waa dar u hiŋ.

¹⁷ Wii la maa n wesse di ɛɛ winanii himmaa, Kɔraawiizi benii u lii, u kpa sunzi yaa. Kuna la maa n na chaani chiŋ, Kɔraawiizii ta a maa. Ka u himmaa waa ɔɔ bir kur gunla aŋ ɔɔ bir kur, di ra tɔ yaa chunchugle la.

¹⁸ U himmaa kipar wiarɛ yaa wer nuu u wibii wiŋɔzi, di wer birgi u biizi, di ɛɛ u kunnanaa un lizɛɛ tɛɛ u hiŋ, u kuna la maa un tawɛɛ la biini.

Kɔraawiizi wia nuui ni a ɛɛi wia

¹⁹ Ií ra liizi guŋ, yaabalaa. A dɛkkɔ nɛr maa n hahzee ra nuu nɛra be, ka sɔɔni bɔra ra ŋɔ wia, di gilɛɛ gil u baaŋ na fuuh manamanaŋ.

²⁰ Newee baaŋfuuih waa wikuarii maa dɔɔwɛ winanaa hiŋaa la Kɔraawiizi n na nyiŋŋi la biini.

²¹ Awia, ií lizi wichɔgaa maa ii ni di ha ani wijagazi la maa n kannɛ werge ii be la. Ií lizi a maa ha ka dɔɔ sisɔna di nuu ra tɛɛ u wiŋɔzi la uŋ kpawɛɛ du ii bampiree biine la. A wiŋɔzi daŋ wer lɛɛ ii dunzi ha.

²² Ama, ii gilɛɛ ra nuu ka ra vɛɛ a hiŋaa. Di ii ra nuu u wiŋɔzi la, ka ii wàá ra hiŋ, ii ra dar iihinaarɛ.

²³ Ii ɛɛwɔɔ lugɔ nɛr la n na binni digii

²⁴ di ra na u hiŋ de, ka bir a kaali la. Di u wa kaalɔɔ tuŋ, ɔɔ bir suuh gunla maa un duwɛɛ la.

²⁵ Kɔraawiizi wiŋɔɔlii la n wesse werge di ga tuŋ di lɛɛ yaa, yaa wer dɔɔ yaa hinaa la, u ɛɛ digiire. Nɛr la maa n ninna binni Kɔraawiizi digii la biini di ra pessi wiŋɔɔlaa la nɛnnɛ, waa ra suuh, ka ra hiŋ gunla maa un nawɛɛ de, Kɔraawiizi daŋ gil u nuu suma u wiɛɛlaa maa biini.

²⁶ Di nɛr la maa ra binni lugɔ u ra hiŋ Kɔraawiizii, ka waa u himmaa nua tau ra du, u ra dar u hinnɛ. Himpɛɛrɛ u ra hiŋ la.

²⁷ Wii la maa n par yaa Mɛɛ Kɔraawiizi di du wer u benii keŋ, waabuu lugɔ hinna binni lalbiizi ni luhaana la n na di dɔgnya, di ra hiini baa, di kaa ra binni i hiŋ ni, di gilɛɛ gil durnya wichɔgaa maa waa pɛli i ni.