Sitɔɔra 1 - Vagla

Izrɛl hina n lɔ Keenan hina laal wia

¹ Josua n wa siuwɛ, Izrɛl hina pɛɛzi Kɔraawiizi, “Izrɛl dee bɛliirɛ niŋ feli ga pig Keenan hinai?”

² Kɔraawiizi ŋɔ ba be, “Juda deere niŋ feli la. N teŋ kpa a hɛri maanii du ba nonee.”

³ Denii Juda hina ŋɔ ba lulla Simɛɔn dee be, “Ií hiini yaa yá yoo Keenan hina naa, di lɛɛ bɔr la Josua n mɔnnɛ tɛɛ yaa la. Di yaa wa lɛɛ de, yaa ge daŋ hiini ia yá yoo di lɛɛ ii bɔr tɛɛ ia.” Baŋ wa ŋɔ guŋ, ba ɛɛ sirya di la ga hiini baa.

⁴ Ba wa hel de di pig Keenan ni Pɛriz hina, Kɔraawiizi kpa baa du ba nonee ba kpegli ba nɛra kagboŋa fi, bolzeŋ la banna yir Bɛzɛk biini.

⁵ Ban du de hinnɛ ba na koori Adoni Bɛzɛk, di yoo u ni Keenan ni Pɛriz hina la maa di kpegli baa.

⁶ Denii Koori Adoni Bɛzɛk lii di ra chɔ, ba duŋŋuu ga lawuu di teŋri u nonibibala ni u naanibibala maa.

⁷ Denii a koori ŋɔ, “N ŋmɛnɛ teŋri koora tokkoahoro ni fi nonibibala ani ba naanibibalaa, ba faa ra hɔɔzi diwee la minna di a yeŋ ra chogli n tɛɛbul zɛɛ la di ra di. Awia, n zummɔ lugɔ wii la miŋ ɛɛ baa la kinnɛ Kɔraawiizi kpa di ra turgiŋ la.” Denii ba kpau la Jɛrusalɛm, u ga siu de.

⁸ Juda laallɔɔra n wa hel Jɛrusalɛm ge, ba kaa pig baa di kpegli baa. Baŋ wa kpuuzi baa tuŋ, ba jaa fuuh ba bolzeŋ maa.

⁹ A harbɔɔ ni, ba la ga yoo Keenan hina la n du a giŋgimee hɛri ni Nɛgɛv ani wiicholii giŋgimee zɛɛzi.

¹⁰ Ba kaa la ga pig Keenan hina la n soge bolzeŋ Hɛbrɔn, di kpegli Sɛsai, Ahiman ani Talmai domeezi.

¹¹ Ba kaa lii de di ga pig bolzeŋ Dɛbir.

¹² Denii ba bɛl banna yir Kalɛb faa ŋɔ, “Nɛr la maa n niŋ kpegli Dɛbir, n daŋ kpa n biihaaŋ Aksa tɛɛ a hiŋ.”

¹³ Kalɛb niwee Kɛnaz biibaal Ɔtniɛllɛ ɛɛ nɛr la n wette pig di kpegli baa. Awia, Kalɛb kpa u biihaaŋ Aksa tɛu.

¹⁴ A hɔl bɛl, Ɔtniɛl ŋɔ u haaŋ Aksa be, “Ŋɔ i mɛɛ be lugɔ ú tɛi hɛri.” Uŋ wa lii u kawee nyuu di tuu, u mɛɛ Kalɛb pɛɛzuu, “A summɔaa? Bɛɛ i ra nyiŋŋi ń ɛɛ tɛinɛi?”

¹⁵ U ŋɔ u be, “Hiŋ felee tɛŋ hɛri bɛl Nɛgɛv biini la, awia, kaa jaaŋ bulli ge.” Uŋ wa ŋɔ guŋ, Kalɛb kpa a hɛri chiŋ ni u zɛɛ bulli jaau.

¹⁶ Moosis hila Kɛn hinuu naanna lii bolzeŋ Jɛriko, di hiŋ Juda dee di ga so nɛra la n du Juda Hɛribɔduma n du Nɛgɛv di dugli bol bɛl banna yir Arad biini.

¹⁷ Denii Juda hina ga jaa ba lulla Simɛɔn dee ni, ba ga lɔ Keenan hina n du Zɛfaf, di kpegli baa, di purgi ba bol maa burburbur. Ba jaa dau a bolzeŋ sɔŋ Hɔma.

¹⁸ Bola la Juda hina n kaa foozi jaau Gaza, Askɛlɔn ani Ɛkrɔn, di kpa boljigzi la n baraa la maa jaa.

¹⁹ Kɔraawiizi faa hiini Juda dee, di tɛɛ baa fɔŋŋa, ba wer foozi giŋgimee hɛri la dɔɔ. Ka ba faa waa wette duŋŋi a nɛra lii a hɛri lɛla la baŋ soge la waa biine, dikuu baŋ dɔɔ laal lugbia torkozi wia.

²⁰ Juda dee kpa bolzeŋ Hɛbrɔn tɛɛ Kalɛb, gunla Moosis n faa ŋɔ nua tɛu la. Kalɛb jaa duŋŋi Anak domeezi ahoro la n soge de la.

²¹ Ka Bɛnjamin dee waa wette duŋŋi Jɛbus hina lii Jɛrusalɛm, awia, haali ni zinaa, Jɛbus hina ni Bɛnjamin dee la maanii haa soge Jɛrusalɛm.

²² Joosɛf naanna Ɛfram ni Manasɛ ɛɛ sirya di ga pig bolzeŋ Bɛtɛl. Kɔraawiizi faa hiini baa.

²³ Mɔɔ ka ba la de, ba lizi baalaa ba la Bɛtɛl la baŋ faa ra yir Luuz la, di ga suahzi daanuu na gunla uŋ duwɛɛ.

²⁴ Ban laŋŋɛ, ba ga na baal bɛl n lii a bolzeŋ biini di ra ba, ba ŋɔ u be, “Bagli yaa gunla yaa n niŋ ɛɛ di zuu a bol naa. Di i bagli yaa, yaa daŋ suŋ i ni, yaa wàá ɛɛi wiimaa.”

²⁵ U bagli baa, ba zuu a bolzeŋ di kpuuzi ba maa, ka gil a baal waa ni u diahina maa.

²⁶ Saŋa bɛl n wa helle, a baal izi di la Hitti hina hɛri, di ga tii bolzeŋ bɛl zɛɛ de, di so ka dau u sɔŋ Luuz. A sɔnnɛ u haa di, di wa lii ni zinaa.

²⁷ Manasɛ dee gba faa waa Bɛf San, Taanak, Dɔɔ, Ibliam, Mɛgidɔ ani bola la n baraa la hina duŋŋɛɛ, dikuu Keenan hina n na fir bá so a hɛri wia.

²⁸ Izrɛl hina n wa dɔɔ fɔŋŋa, ba jaa ra fir Keenan hina bá ra hum baa alugɔ yoma. Ka ba faa waa baa duŋŋɛɛ lii a hɛri biini.

²⁹ Ɛfram dee ge waa Keenan hina la n soge bol la banna yir Gɛza la duŋŋɛɛ. Ka ba ni baa haa kpau di so de.

³⁰ Zɛbulɔn dee gba waa Keenan hina la n soge Kitrɔn ni Nahalal la duŋŋɛɛ, ka gil ba ni baa kpau so, ba ra fir baa, ba ra hum alugɔ yoma.

³¹ Asɛ dee la ge waa banla n du Ako, Saidɔn, Alab, Akzib, Hɛlba, Afɛk ani Rɛhɔb la duŋŋɛɛ.

³² Awia, Asɛ dee ni Keenan hina la maa jaa kpau so a hɛri.

³³ Naftali dee gba waa nɛra la n soge Bɛf Sɛmɛs ani Bɛf Anaf duŋŋɛɛ. Ka ba ni Keenan hina la kpau so a hɛri. Naftali dee ɔɔ ra fir baa ba ra hum alugɔ yoma.

³⁴ Amɔri hina fir Dan dee la waa, ba mag giŋgimee hɛri, ba waa sɛɛwɛ bá tuu lɛl la biini.

³⁵ Amɔri hina fittɔɔ bá so Bizeŋ Hɛrɛz, Aijalɔn, ani Saalbim. Ka Joosɛf naanna Ɛfram ni Manasɛ dizi n wa dɔɔ fɔŋŋa jaa, ba ra fir baa ba ra hum lugɔ yoma.

³⁶ Amɔri hina hɛri bɔr magbɔɔ chi Nuuma Ŋmɛnɛɛ di ga lii Sɛla, di bɛri de di ra la.