Ɛzra 1 - Vagla

Koorizeŋ Sairus n ŋɔ Jus hina bir kaali Jɛrusalɛm wia

¹ Lugli bina la, baal bɛl baŋ faa ra yir Sairus, faa wa di koraa Pɛsia hɛri. Kɔraawiizi faa gil u nua la uŋ ŋɔwɛɛ tɛɛ Jɛrɛmia la wa ɛɛ wibii. Kɔraawiizi faa bir Koorizeŋ Sairus nfɛrɛ, di gil u sɛbi hɔŋ tɛɛ u kora diiribɔra maa, di ŋɔ ba sii di karmuu nɛr maa nuu.

² Kenne Pɛsia Koorizeŋ Sairus faa ŋɔ, “Kɔraawiizi La N Na Di Kora Chiŋ la gillɔɔ n di kora durnya maa ni. U lizimbuu lugɔ ń ma u Dia bolzeŋ Jɛrusalɛm n du Juda hɛri biini tɛu.

³ Nɛr la maa n du ii biini di ɛɛ u nɛr, Kɔ́raawiizi la unna hum la du u be, di gil ú bir la Jɛrusalɛm n du Juda, di ga ma Kɔraawiizi la Izrɛl hina n na hum la Dia. Waabuu Kɔraawiizi la n du Jɛrusalɛm biini la.

⁴ Banla maa n haa kawɛɛ di du yemmaa di ɛɛ hɔɔhra, di ra nyiŋŋi hiinaa bá bir la, a dɛkkɔɔ bá dɔŋahina tɛɛ baa saliŋhuŋŋa, saliŋ, kuna, sela ani sunzaazi, bá ga du Kɔraawiizi Dia, Jɛrusalɛm biini.”

⁵ Denii Juda ni Bɛnjamin dizi domeezi nabɔnzi, Kɔraawiizi kizeehina ni Levi dee ani nɛr la maa Kɔraawiizi n bir ú nfɛrɛ, ɛɛ sirya bá la ga ma Kɔraawiizi Dia, Jɛrusalɛm biini.

⁶ Denii ba dɔŋahina maa hiini baa ni saliŋhuŋŋa kundaalikuna, saliŋ kuna, sela ani sunzinanaa, bá ga du Kɔraawiizi Dia.

⁷ Koorizeŋ Sairus la paagi tassazi ni kapuzi ni kuna la maa Koorizeŋ Nɛbukadnɛɛza n faa paagɛɛ lii Kɔraawiizi Dia n du Jɛrusalɛm, di ga du u vuga dia la, di lii tɛɛ baa jaa.

⁸ Denii Pɛsia Koorizeŋ Sairus gil Mitrɛdaf la n na dau ba kebee la, kur a kuna maa tɛɛ Juda hina sitɔɔri Sɛsbazar.

⁹ A kuna magazii keŋ, saliŋ tassazi tokko ni kpɔrgɔ, 30, saliŋhuŋŋa tassazi kagboŋ, 1,000, ani saliŋhuŋŋa tassazenaa tokko ni kabɛl, 29,

¹⁰ saliŋ tassabizi tokko ni kpɔrgɔ, 30, saliŋhuŋŋa tassabizi n li dɔŋa kalfaanaazu ni fi, 410, ani tassazi, kɔpuzi ani dunozi irizi la n jaawɛ ge du kagboŋ, 1,000.

¹¹ Saliŋ ni saliŋhuŋŋa tassazi ni kuna la maa faa du kagboŋa anue ni kalfaanaazu, 5,400. Aabuu Sɛsbazar faa paa, u ni nɛra la baŋ faa laurɛɛ la Babilɔn ka ba bir ba Jɛrusalɛm la.