Ɛsta 1 - Vagla

Koorizeŋ Zɛgzis n vɛɛ u haaŋ Vasti wia

¹ Koorizeŋ Zɛgzis faa di koraa Pɛsia hɛri. Wia la n ɛɛwɛ u saŋa labuu keŋ. U faa di koraa hɛssi kalfa ni tokko ni aniidaanɛɛ ni, di lii India hɛri di ga hel Itiopia hɛri.

² A saŋa hiŋ, Koori Zɛgzis sogo u diikpeg, Susa biini u koorikara ni, di ra di kora.

³ Un di a kora guŋŋ binni ahoro wa hel, u gil ba daali diuzenaa ú tɛɛ u nabɔntɔga ni u huŋhunna nabɔnzi. Pɛsia ni Mɛdia hɛssi laallɔɔra nabɔnzi, kooribiizi ani hɛssi la unna di kora a ni la gba nabɔntɔga maanii faa du a diuzenaa dii bɔr.

⁴ Hɔpizinanaa kalfa ni tokkoanaazu maanii, u kpa bagli nɛra u kora diiribɔr daama la n kannɛ werge ani u kora wessi ni u girme.

⁵ Annii harbɔɔ, a koori kaa gil ba daali diuzenaa u tɛɛ nɛra la maa n du u bolzeŋkpeg Susa la, nɛdumazi ni nɛtɔga maa. U kooridia kambol la baŋ duu daananaa la biinii ba faa chaali, di di a diuzenaa naa hɔpizaa aniidaanɛɛ.

⁶ U faa gillɔɔ ba bɔg de ani patiisananaa. Aŋhina ɛɛ burgu, aŋhina ge huuhzi. Gessihuŋŋunanaa ni anla n lugɔ zagbiiŋ niirɛ ba faa kpa vɔɔzaa, ka kpa saliŋhuŋŋa gbittizi ge sagzi a ligee la baŋ kpa binanaa aŋhina di kuari, a chi di hiŋzi dɔŋa ni la. Karjannanaa baŋ kpa saliŋ ni saliŋhuŋŋu di kuari maanii faa du de. Ba faa kuari a hɛrii ni binanaa, aŋhina huuhzi, aŋhina aah, aŋhina ge ɛɛ burgu, ani anla n na nyɛgzi ani binanaa irizi yoola n kpolle werge maa.

⁷ Saliŋ libizi biinee ba faa du siŋ di ra tɛɛ nɛra. A libizi bɛl maa faa waa u dɔŋ liwɛɛ. A siŋ ge faa pur, di ra bagli a koorizeŋ bunya.

⁸ A koorizeŋ ŋɔ bɛl maa ra nyɔɔ a siŋ gunla un niŋ wer nyɔɔ, di kaa ŋɔ tɛɛ banla maa n na yiili a siŋ di ra tɛɛ a hɔɔhra lugɔ ba ra tɛɛ nɛr maa, gunla maa maga unna nyiŋŋi u nyɔɔ.

⁹ A koorizeŋ haaŋ banna yir Vasti ge faa gillɔɔ ba daali diuzenaa ú tɛɛ haana la maa n faa du Koorizeŋ Zɛgzis dia la.

¹⁰ A hɔpizaa aniidaanɛɛ hɔl la, Koori Zɛgzis bɔra sɔɔnuu werge maa, dikuu uŋ nyɔɔ siŋ la wia. Denii u ŋɔ Mɛhuman, Bizta, Habɔna, Bigta, Abagta, Zɛtar ani Kakas n ɛɛ nɛvaraa di ra humuu la be

¹¹ lugɔ ba ga kpogli u haaŋ Vasti, di gil u kpa u wiche kahuro hi di ba u see, ú kaa bagli nɛtɔga la ni a nɛra maa, bá na u wessi, dikuubɛɛwiai, u faa wessoo werge.

¹² Nɛvaraa naa n ga ŋɔ Vasti be gunla Koorizeŋ Zɛgzis n ŋɔwɛɛ la, ka u vɛɛ, di ŋɔ wàá la. A koorizeŋ n wa nuu guŋ, u baaŋ fuuh werge maa.

¹³ Di koori ra nyiŋŋi ú zum widaulaa ni wia biini, ɔɔ yir nunzunnaa di kpa a wia dau ba see. Awia, u yir u nunzunna la n zum wiɛɛlaa ŋmɛnizi la, di kpaa dau ba see.

¹⁴ Banniibuu ɔɔ du u be di ra hiinuu saŋa maa. Ba sɔnaa keŋ, Kasina, Sɛtar, Admata, Taasis, Mɛrɛs, Masɛna ani Mɛmukan. Nabɔntɔga baniidaanɛɛ naabuu faa ɛɛ Pɛsia ni Mɛdia hɛssi hina nabɔnzi la n faa ɛɛ koori zɛɛsogna di kaa ɛɛ a hɛri hina sitɔɔra nabɔnzi.

¹⁵ Baŋ wa chaalɛɛ, a koorizeŋ pɛɛzi baa, “Di lii yaa widaulaa biini, ɛrɛɛ n dɛkkɛ lugɔ ya dau Wiche Vastei? Waa sɛɛwɛ u hiŋ n nua la miŋ kpawɛɛ tɛɛ nɛvaraa ŋɔ ba tɛu la.”

¹⁶ Denii Mɛmukan izi chi a koori ni u dɔŋahina nabɔntɔga la see di ŋɔ, “Jara, i haaŋ Vasti ɛɛ wichɔgaarɛ. A waa ɛɛwɛ lugɔ u ɛɛ wiarɛ zuu hìŋ́ koori bɛŋ ni, ka a hɛssi nabɔntɔga ni nɛra la maa n du Koorizeŋ Zɛgzis kora hɛssi la maa biini ninɛɛ u ɛɛ a wia zuu.

¹⁷ Wiche naa wiɛɛlaa naa daŋ zuu a hɛssi naa maa haana digna, guŋ gil bá ɔɔ ra gbɛlli ba janna, di ra ŋɔ lugɔ Koorizeŋ Zɛgzis ŋɔ bá yir u haaŋ Vasti ú ba, ka u vɛɛ.

¹⁸ Zinaa hɔpizii naa, Pɛsia ni Mɛdi hina nabɔntɔga haana la n nuu Wiche Vasti wiɛɛlaa naa, daŋ jaa ra ɛɛ hìŋ́ koori nɛtɔga la guŋ himmaa. Ba danna gbɛlli ba janna, ba janna ge baana ra fuuh ba ni.

¹⁹ Awia, Jara, di a parii, ŋɔ nua di gil ba sɛbuu du Pɛsia ni Mɛdi hina widaulaa n waa birgaa dɔɔwɛ ŋmɛnɛ maa biini lugɔ a waa dɛkkɛ koori siwii n niŋ kaa na Vasti ŋmɛnɛ maa. Di kaa kpa jaa, gil koori nyiŋŋi haaŋ la n bɔu di gil ú lɛɛ u bɔr.

²⁰ Di ba wa ŋɔ koori widaulifalii naa tɛɛ u hɛri naa n kannɛ werge maa naa hina, haana maa danna tɔgzi ba janna.”

²¹ Mɛmukan wiŋɔɔlaa naa faa par a koori ni u nabɔntɔga la maa, u gil ba dau gunla Mɛmukan n baglɛɛ la.

²² U hunzi nɛra u kora hɛssi maa biini dí ba sii a widaulii tɛɛ baa. U faa gillɔɔ ba sɛbaa hɛri maa sɛbaa biini. Iri maa ge himmaa mɔɔri biinii u faa gil ba kaa sɛbaa tɛɛ ba maa, di ŋɔ ra tɛɛ nɛra maa ba mɔɔri biini lugɔ baal maanii ninna di nabɔmuu u diahina ni.