Emɔs 1 - Vagla

¹ Baal bɛllɛ ba faa ra yir Emɔs, u ɛɛ penɔɔni di lii Tɛkua. U wiŋɔzii keŋ. Izrɛl wia la Kɔraawiizi n faa pillɛɛ bagluu binni anɛɛ mɔɔ, ka hɛri faa zigli werge labuu keŋ. A saŋa di Uzziaa faa Juda koori, Koori Jehoas biibaal Jeroboam ge faa di Izrɛl kora.

² Emɔs faa ŋɔwɔɔrɛ, “Kɔraawiizi baaŋ ra fuuuh, u ra pogzi Bizeŋ Ziɔn nyuu, di ra pogzi lugɔ dooŋ, Jɛrusalɛm biini. Sela diiribɔra maanii hillɛ, Bizeŋ Kamɛl ge nyuu kooree maa yɔl.”

Kɔraawiizi daŋ di Izrɛl hina dɔŋahina seriya

³ Kenne Kɔraawiizi ŋɔ, “Bolzeŋ Damaskus hina ra ɛɛ wichɔgaarɛ digiidigii. Awia, n daŋ haŋ tɛr ba dignaa, dikuu baŋ tɔɔri Giliad hina sikpegii ni werge wia.

⁴ Awia, n daŋ gil niŋ fuuh kooridia la Koori Hazɛl n mawɛɛ ni Koori Bɛn Hadad diikpega la.

⁵ N daŋ chɔgi bolzeŋ Damaskus domininuuzeŋ la, di lalli nɛra la n soge Avɛn Waluu ni Bɛf Ɛdɛn koori. Ba daŋ lauri Siiria hina kaali Kir hɛri.”

⁶ Kenne Kɔraawiizi ŋɔ, “Bolzeŋ Gaza hina ra ɛɛ wichɔgaarɛ digiidigii, awia, n daŋ haŋ tɛr ba dignaa, dikuu baŋ lauri hɛri bɛl nɛra maa, di yoo tɛɛ Ɛdɔm hina wia.

⁷ N daŋ kpa niŋ du bolzeŋ Gaza koŋlaa ni, ú fuuh u diikpega maa.

⁸ N daŋ lizi bolzenaa Asdɔd ni Askɛlɔn koora. N daŋ tɛr bolzeŋ Ɛkrɔn hina digna, guŋŋ Filisti hina la maa n kawɛɛ la wa siuzi.”

⁹ Kenne Kɔraawiizi ŋɔ, “Bolzeŋ Taaya hina ra ɛɛ wichɔgaarɛ digiidigii, awia, n daŋ haŋ tɛr ba dignaa, dikuu baŋ lauri hɛri bɛl nɛra maa, di yoo tɛɛ Ɛdɔm hina, di chɔgi ba ni baa nuukpaŋ la wia.

¹⁰ N daŋ kpa niŋ du bolzeŋ Taaya hina koŋlaa ni, ú diikpega maa fuuh.”

¹¹ Kenne Kɔraawiizi ŋɔ, “Ɛdɔm hina ra ɛɛ wichɔgaarɛ digiidigii, awia, n daŋ haŋ tɛr ba dignaa, dikuu baŋ dau ba lulla Izrɛl hina luge, di kpu baa, ba waa ba ni sunne wia. Ba baaŋfuuih waa tunaa dɔɔwɛ, ba waa gillɛ u sɔɔni.

¹² Awia, n daŋ kpa niŋ du bolzeŋ Tɛman ni, di fuuh bolzeŋ Bɔzra diikpega.”

¹³ Kenne Kɔraawiizi ŋɔ, “Ammɔn hina ra ɛɛ wichɔgaarɛ digiidigii, awia, n daŋ haŋ tɛr ba dignaa, dikuu baŋ faa lɔ laal, di ra nyiŋŋi hɛri ba jaa, haali di yalli Giliad hina haana la n kpogli hizi la, hizi wia.

¹⁴ N daŋ kpa niŋ di du bolzeŋ Raba koŋlaa ni, di fuuh u diikpega. Ba daŋ lɔ wile, laal hɔpizii, a laal du kpeg alugɔ dooŋ pekpeg.

¹⁵ Ba daŋ lau ba koori ni u nabɔnzi kaali hɛrduma. Mìŋ́ Kɔraawiizii ŋɔ guŋ.”