3 Jɔɔn 1 - Vagla

¹ Mìŋ́ nabɔma labuu sɛbi hɔnnaa ń tɛɛ n dammunanii Geyus la miŋ nɔŋŋɛɛ, dikuu yaa maa n ɛɛ kpaŋ Kɔraawiizi wibii naa biini wia.

² N nɛnɔŋŋii, n na suŋŋi Kɔraawiizii ú hiinii, i wer dɔɔ alaanfia nɛnnɛ, í wiimaa ge wer lii siwee alugɔ i ni Kɔraawiizi baambaaŋ wia n lii siwee gunla.

³ Yaabalaa baŋhina ballɔɔ di wa ŋɔ i wia tɛŋ, dí i ra hiŋ wibiire. I wiimaa ra bagli gunnɛ. Awia, n bɔra sɔɔnɔɔrɛ werge.

⁴ Saŋa la maa miŋ ɔɔ ra nuu n biizi wia lugɔ ba ra hiŋ wibiire la, a gunnɛ a sɔɔni n bɔra kaali wiimaa.

⁵ N nɛnɔŋŋii, gunla hiŋ ɔɔ lɛɛ yaa dɔŋahina Yeesu hiŋra di gaa dau, haa ɔɔ zum baa ka wer lɛɛ baa di ra hiini baa la, i ra hiŋ ŋmɛnɛɛrɛ nɛnnɛ.

⁶ Ba ŋɔ i wiarɛ tɛɛ Yeesu hiŋra bɔnnaa, di tɛi sɔŋ ani gunla hiŋ nɔŋŋi baa la. Awia, di ba waa nyiŋŋi ba kpa ba ŋmɛnɛɛ kaali, i daŋ kaa hiini baa gunla maa hin niŋ ɛɛ, á par Kɔraawiizi,

⁷ dikuubɛɛwiai, Yeesu wiarɛ ba kuu lii ra vol guŋ. Ba waa kebee ra lɛɛ nɛra la n waa Kɔraawiizi zummɛ la be.

⁸ Awia, a wesso yaa n niŋ ɔɔ ra hiini nɛra naa dɔŋa. Di yaa wetto ra hiini dɔŋa guŋ, yaa maa kpauwɔɔ Kɔraawiizi wibii la huma biini.

⁹ N faa sɛbi wia aŋhinaa tɛɛ Yeesu hiŋra de, ka Diɔtrɛfɛs la waa yaa wia ra sɛɛ. U ra nyiŋŋi nabɔmuurɛ.

¹⁰ Awia, di n wa ballɔ, n daŋ kpa u wia di ŋɔ gunla unna ŋɔ wia pɛɛpɛɛ, di kpa wichɔgaa di ra chugiŋ. A bɛŋ wichɔgaa lɛi u ra ɛɛ. Waa ɔɔ sɛɛ ú lɛɛ yaabalaa ra dau. Di baŋhina ge du de di ra nyiŋŋi ba lɛɛ baa dau, ka waa ɔɔ gil ba lɛɛ baa dau, ka ɔɔ ra duŋŋi baa Yeesu hiŋra wiijaami dia la biini.

¹¹ N nɛnɔŋŋii, gilɛɛ ra hiŋ banla n na ɛɛ wichɔgaa. A ɛɛ winanaa bɛŋ. Nɛr la n na ɛɛ winanaa, u ɛɛ Kɔraawiizi biilulliirɛ. Nɛr la ge n na ɛɛ wichɔgaa haa waa Kɔraawiizi zummɛ.

¹² Dimitrius lawaa ɛɛ nɛnaniirɛ. Nɛra maa ra ŋɔ u wia guŋ. Wibii la unna hiŋ la ge ra di u daansɛɛrɛ guŋ. Yaa ge gba ra di u daansɛɛ guŋ. I zummɔ lugɔ yaa wiŋɔzi ɛɛ wibiire.

¹³ N dɔɔ wikpilakpila maanii di ra nyiŋŋi n ŋɔ i be. Ka maa nyiŋŋi n sɛbaa dau hɔŋ ni.

¹⁴ N na nyiŋŋuu lugɔ n ba i be di wa nai filaŋkeŋ, ya wer na dɔŋa di ŋɔ a wia.

¹⁵ Kɔ́raawiizi tɛi bampirsɔna. I dammuzi la n du bɔnnaa la ra jaamii. Jaami yaa ge dammuzi maa tɛɛ yaa.