2 Timoti 1 - Vagla

¹ Mìŋ́ Yeesu Kristo huŋhunni Pɔɔllɛ ra sɛbi hɔnnaa ń tɛi. A par Kɔraawiizii u tɛŋ a huma. Nua la uŋ faa ŋɔwɛɛ lugɔ u daŋ gil ya wer na miibɔɔ Yeesu Kristo be la wiarɛ u gil n birgi u huŋhunni la.

² N biinɔŋŋii Timoti, n na jaamii. Yáa mɛɛ Kɔraawiizi ni yaa Dɔɔri Yeesu Kristo hiinii di suŋ i ni di tɛi bampirsɔna.

Kɔraawiizi jaamaa ni bɔkpega dui wia

³ Saŋa maanii n na liizi i wia di ra suŋŋi Kɔraawiizi la minna hum ani biinihuŋŋu gunla n naabaala n faa ra humuu la, di ra jaamuu dikuu i wia.

⁴ Anna liizi gunla hiŋ faa wiiwe la di ra kɛlli i ni lugɔ ń wer nai ń bɔra sɔɔni werge.

⁵ N na liizi gunla hiŋ yardi Kɔraawiizi ani biinihuŋŋu alugɔ i naa Lɔis ni i maa Yunis n faa yarduu la. N dɔɔ i tamiirɛ lugɔ ba Kɔraawiizi yarda dɔnnɛ i ge gba dɔɔ.

⁶ Awia, n ŋɔ ń liiziibuu í kaa izi ra hum ani wiɛɛlaa fɔŋŋa la Kɔraawiizi n faa sunzii, saŋa la miŋ faa kpa n nonee sag i ni la.

⁷ Kɔraawiizi waa yaa tɛɛwɛ duma la n niŋ gil ya ra ɔm nɛra. U tɛɛ yaabuu duma la n gillɛ yaa dɔɔ bampirsi ni nɛnɔŋŋaa ani hinlawaa.

⁸ Awia, gilɛɛ gil hiihzi lawii yaa Dɔɔri Yeesu Kristo wia baglaa biini, di gilɛɛ wa gil n wia naa waa ɛɛi hiihzi, baŋ kuu u wia tɔŋ dia naa. Ka í ge ra di tɔɔrɔɔ dikuu u amaniyesuma la wia gunla Kɔraawiizi n niŋ hiinii ni fɔŋŋa í wer dia la.

⁹ Waabuu lɛɛ yaa ha di yir yaa, yaa ba waa hiŋ u hinnanii la. Yaa hunnanaa wia lɛi u yir yaa. U nɛsunaa, u hiinaa ani gunla un dauri yaa wia saŋa maa la wiarɛ u yir yaa di hiini yaa dikuu Yeesu Kristo wia.

¹⁰ U dau yaa wiarɛ guŋ saŋa maa ka yaa jaa wa zum a wia saŋa la yaa Lɛɛri Yeesu Kristo n wa ballɛ la. Um ballɛ la, u chɔgi siu fɔŋŋaa di kaa gil miibɔɔ la n waa tuŋ la wia ra chaani nɛnnɛ lii amaniyesuma la biini.

¹¹ Amaniyesuma hiŋ wiarɛ Kɔraawiizi liziŋ n ɛɛ u siiri di sii ra ŋɔa, di kaa ɛɛ u huŋhunni ni u wia bagli.

¹² Amaniyesuma wiarɛ n na di tɔɔrɔɔ filaŋkeŋ, ka u guŋ wanna ɛɛ hiihzi, dikuubɛɛwiai, n zum Kɔraawiizi la miŋ yardɛɛ labuu di dɔɔ u tamii lugɔ u daŋ wer du u wia la maa uŋ gillɛ n ɛɛ la tau di ra la ú hɔpizii la wa hel.

¹³ A liizi gunla maa miŋ faa baglii wibii a deŋli la, di ɔɔ ra hiŋ guŋ, di yardi Kɔraawiizi di nɔŋŋi nɛra. Yaa ni Yeesu Kristo n kpauwɛ wiarɛ yaa wer yardi Kɔraawiizi di wer nɔŋŋi nɛra la.

¹⁴ A du winanii la Kɔraawiizi n gillɛ i dɔɔ la tau. U Dumnanii la n du yaa biine daŋ hiinii í wer du u tau.

¹⁵ I zummɔ lugɔ Eesia hina la maa gilimbuu ta. Haali Faijɛlus ni Hɛmɔgɛnɛs la gba gilimbuu.

¹⁶ Ka Ɔnɛsifɔrus waa, Kɔraawiizii niŋ suŋ u ni u diahina ni dikuu uŋ ɔɔ wer ra hiiniŋ n siwee ba hɛri wia. N ɛɛ nɛr la baŋ tɔ diarɛ, ka n wia wɔɔ ra ɛɛ hiihzi.

¹⁷ Uŋ wa hel Room la, u ɛɛ ania maa di wer zum n bɔr ba n be.

¹⁸ Di yaa Dɔɔri hɔpizii la wa hello, ú suŋ u ni. Gunla uŋ faa hiiniŋ Ɛfɛsus la gba, i zum a wiarɛ nɛnnɛ.