2 Jɔɔn 1 - Vagla

¹ Mìŋ́ nabɔma labuu sɛbi hɔnnaa ń tɛɛ haaŋ la Kɔraawiizi n lizɛɛ tɛɛ u hiŋ ani u biizi la miŋ nɔŋŋɛɛ dikuu n ni baa maa n ɛɛ kpaŋ, Kɔraawiizi wibii biini wia la. N bɛŋ lɛi nɔŋŋi baa guŋ. Ka banla n zum Kɔraawiizi wibii maanii nɔŋŋi baa guŋ,

² dikuu a wibii n du yaa maa bampiree wia. A wibii daŋ haa du de di ra la saŋaa saŋa maa.

³ N na jaami ia. Yáa Mɛɛ Kɔraawiizi ani u Biibaal Yeesu Kristo hiini ii maa di suŋ ii ni, di tɛɛ ia bampirsɔna, di gil ii dɔɔ wibii ani nɛnɔŋŋaa.

Wibii ni nɔŋŋaa wia

⁴ N bɔra sɔɔnɔɔrɛ werge ani miŋ wa zum i biizi baŋhina wia lugɔ ba ra hiŋ wibiire, gunla yaa Mɛɛ Kɔraawiizi n ŋɔ ya ra hiŋ la.

⁵ Ka filaŋkeŋ, n na suŋŋiibuu í ra hiŋ u widaulii naa. Widaulifalii lɛi. U faa dawuubuu saŋa maa ya ra hiŋ. Waabuu keŋ, ií nɔŋŋi dɔŋa.

⁶ Di yaa ra hiŋ u widaulaa, yaa daŋ nɔŋŋi dɔŋa. U widauliirɛ lugɔ ií nɔŋŋi dɔŋa, gunla iin nuuwɛ lugli la. Awia, ií ra ɛɛ wiimaa ni nɔŋŋaa.

⁷ Nɛfugze kpilakpila maa liwɔɔrɛ filaŋkeŋ. Baabuu waa sɛɛwɛ lugɔ Yeesu Kristo ba durnyaa lugɔ newee. Nɛr la maa n na hɔɔ guŋ, u ɛɛ a nɛfugzi bɛllɛ, di ɛɛ Kristo haahri.

⁸ Ií ra du tau nɛnnɛ, yaa huma la gilɛɛ waa bir pɛɛ, ka ií wer na a tɔna maa wa tuŋ.

⁹ Nɛr la maa n na bagli Kristo wia, ka kaa ra bagli wia lii u himmaa nfɛrɛ biini di ra jaa, Kɔraawiizi waa hoo a hiŋ ni. Nɛr la maa n zum Kristo baglaa la, di ɔɔ ra bagli guŋ maga bɛŋ, Kɔraawiizi ni u Biibal Yeesu du a hiŋ ninɛɛ.

¹⁰ Di nɛr la maa wa ba ii be di ŋɔ ú bagli ia, ka waa Kristo wia ra bagli guŋ, ii gilɛɛ lɛɛ a hiŋ dau ii be, di gilɛɛ waa jaamuu.

¹¹ Nɛr la maa n na maŋkuri a hiŋ guŋ, u ge gba du u wichɔgaa hiŋ biinii.

¹² N dɔɔ wikpilaa min niŋ ŋɔ ii be, ka màá sɛbaa dau hɔŋ ni. N na nyiŋŋuu ń ba ii be ya wer na dɔŋa, ń ŋɔ a wia tɛɛ ia. Denii yaa bɔra sɔɔni yaa werge maa.

¹³ Ii niwee la Kɔraawiizi n lizɛɛ tɛɛ u hiŋ la, u biizi ra jaami ia werge.