1 Timoti 1 - Vagla

¹ Mìŋ́ Yeesu Kristo huŋhunni Pɔɔllɛ a sɛbi hɔnnaa. Kɔraawiizi la n ɛɛ yaa Lɛɛri ni Yeesu Kristo la n ɛɛ yaa Tamii Hiŋ la, baabuu ŋɔ ń na hum a huma.

² N biibaal Timoti, n na jaamii. Mìŋ́ faa baglii Kɔraawiizi wia i sɛɛ di birgi n biibaal himmaa Kɔraawiizi hiŋaa naa biini. Yáa Mɛɛ Kɔraawiizi ni yaa Dɔɔri Yeesu Kristo hiinii di suŋ i ni di tɛi bampirsɔna.

Baglikara tau dui wia

³ N na nyiŋŋuu i ɛɛ gunla miŋ faa baglii saŋa la miŋ faa ra nyiŋŋi n la Masɛdɔnia hɛri la. N faa ŋɔwɔɔrɛ lugɔ a wesso hiŋ haa du Ɛfɛsus mɔɔ í wer ŋɔ nɛra baŋhina be lugɔ bá gilɛɛ kaa ra bagli wia aŋhina n waa deŋlee,

⁴ di gilɛɛ aah siwii dikuu kara wia ni banla n lul ba naabaala ni ba naabaala ge naabaala kusu kusuu maa la wia. Wiŋɔzi naa dee dɔɔ bilaarɛ. A wàá wer lii tɔna maa tɛɛ yaa Kɔraawiizi huma naa biini. Yarda waa dɔɔ tɔnaa di wer ra hum Kɔraawiizi.

⁵ Baglaa la Kɔraawiizi n ŋɔ ya bagli la, u ŋɔ ya baglaabuu nɛ́ra wer dɔɔ dɔnnɔŋŋaa la dee ban niŋ dɔɔ dikuu ba wia n deŋlee, ba biine waa baa ra tɛɛ wichɔgaa ba yardi Kɔraawiizi ni biinihuŋŋu wia.

⁶ Baŋhina waa kaa ra hiŋ guŋ ka leu di ra ŋɔ wia aŋhina n waa tɔna dɔɔwɛ.

⁷ Ba ra nyiŋŋuu ba ɛɛ Kɔraawiizi Gbɔgni bagla di ra baglaa fɔŋŋa ni, ka ba waa a wia ni a zɛɛzi zummɛ nɛnnɛ.

⁸ Yaa zummɔ lugɔ di yaa zum Kɔraawiizi Gbɔgni zɛɛzi nɛnnɛ di ra hiŋaa, a wessoo werge,

⁹ di kaa zum lugɔ nɛnanaa wia lɛi gbɔg la du de. Banla n ɛɛ dignikpega hina, nɛvɛɛɔnna ani nɛkuna wiarɛ a du de. Banla n na ɛɛ wichɔgaa, wikuna di ra gbɛlli Kɔraawiizi di ra kpuuzi ba maawaa, ba mɛɛwaa, ba dɔŋahina,

¹⁰ banla n na sɛm, banla n na ɛɛ wikuna ba dɔŋa baala gɛɛ ba dɔŋa haana be, banla n na ŋmɛɛ nɛra di kpa baa ra kaali, banla n na kanni kara, banla n na hɛɛhzi Kɔraawiizi ka ra kanni kara ani banla n na ɛɛ wii la maa n waa deŋlee gunla yaa n bagli ia wibii la.

¹¹ Yaa faa bagli iabuu wibii lii amaniyesuma la n ɔɔ ra bagli Kɔraawiizi la n dɔɔ bɔsɔna ni girme la wia biini. A Kɔraawiizi faa yardimbuu di gil n lizi u amaniyesuma la di ra tɛɛ nɛra.

Ya ra jaami Kɔraawiizi dikuu u nɛsunaa wia

¹² N na jaami yaa Dɔɔri Yeesu Kristo. Waabuu hiiniŋ ani fɔŋŋa n wer ɛɛ guŋ. N na jaamuubuu, dikuubɛɛwiai, u binnimbuu lugɔ n wia dɔɔ wibiire di kpaŋ du u huma naa biini.

¹³ Faala la n faa ra gbɛlluubuu, di ra tɔɔri u hiŋra, di ra yoo baa werge maa. Ka u wettoo suŋ n ni, di na n sinyɛna, dikuubɛɛwiai, n faa waa zummɛ ka ra ɛɛ guŋ. N faa haa waa u wia sɛɛwɛ.

¹⁴ Yaa Dɔɔri suŋ n ninɛɛ werge maa di hiiniŋ werge n wer dɔɔ u yarda ni nɛnɔŋŋaa dikuu n ni Yeesu Kristo n ɛɛ kpaŋ la wia.

¹⁵ Wiŋɔɔlii bɛllɛ du de di ɛɛ wibii lugɔ nɛr maa n niŋ sɛɛ u wia. Waabuu keŋ, Yeesu Kristo ba durnyaa ú wa lɛɛ wichɔgɛɛra ta. Minuu wichɔgɛɛri werge ba maa biini.

¹⁶ Ka Kɔraawiizi kuu guŋ wia di suŋ n ni werge, ú wer kpa n wia bagli banla n niŋ haa sɛɛ u wia, di na u miibɔɔ la n waa tunaa dɔɔwɛ la, bá zum gunla u kanyitti dii n duwɛɛ. Waa maga dɔɔwɛ.

¹⁷ Ií ra tɛɛ unla n ɛɛ saŋa maa hina koori, di haŋ du de ra la la sɔŋ. Waa siwaa dɔɔwɛ. Ba wɔɔ ra na. U bɛnnɛ ɛɛ Kɔraawiizi. Awia, ií ra tɔgzuu di ra kpau girme saŋaa saŋa maa. Ami.

¹⁸ N bie Timoti, n ŋɔ ń ŋɔ wia aŋhinaa tɛi í ra ɛɛ di ra hum Kɔraawiizi. Ba faa bagli i ni Kɔraawiizi huma naa wiarɛ Kɔraawiizi Dumnanii fɔŋŋa biini. Gil gunla baŋ faa ŋɔwɛɛ la dui bɔkpega í wer yoo i hiŋaa naa yoori nɛnnɛ. Laalnaniirɛ i ra yoo gunla.

¹⁹ Ɔɔ́ yardi Kɔraawiizi di dɔɔ biinihuŋŋu. Baŋhina faa waa biinihuŋŋu dɔɔwɛ, di hiŋ huhzi. Ba waa kaa ra sɛɛ Kɔraawiizi wia.

²⁰ Haimɛnius ni Alɛgzanda ɛɛ bannii baŋhinaa. N gillɔɔ Sitaani tɔɔri baa bá wer zum lugɔ a waa wer banna gbɛlli Kɔraawiizi.