1 Jɔɔn 1 - Vagla

Wiŋɔɔlii la n dɔɔ miibɔɔ wia

¹ Wiŋɔɔlii bɛllɛ du de di lii lugli la, di dɔɔ miibɔɔ. Yaa faa wettoo nuu u loobii di kaa wer nau, di faa ra binnuu, di wer kpa nonee gba ra gbɔgzuu.

² Kɔraawiizi kpa u Wiŋɔɔlii la n dɔɔ miibɔɔ labuu bagli yaa, yaa nau di di u daansɛɛ ra tɛɛ ia, di ra ŋɔ u wia ii be lugɔ Kɔraawiizi Miibɔɔ la n waa tuŋ, di du u be saŋa maa la jaa ba yaa benii, yaa nau.

³ Yaa ŋɔ ya bagli iabuu u wiɛɛlaa la maa yaa n nawɛɛ ani gunla maa yaa n nuuwɛ ge, yáa ni ii maa wer ɛɛ kpaŋ wia naa biini. Yaa ni Kɔraawiizi ni u Biibaal Yeesu Kristo maanii ɛɛ kpaŋ.

⁴ Yaa ra nyiŋŋuu yaa maa bɔra sɔɔni werge maa di ga tuŋ. Awiarɛ yaa sɛbi wia naa ra tɛɛ ia.

Kɔraawiizii bɔchaaŋ

⁵ Kɔraawiizi wia la um bagli yaa, yaa ge ra bagli ia la, aabuu keŋ. Kɔraawiizi maa ɛɛ bɔchaannɛ. Bɔbiri waa hoo u ni.

⁶ Di yaa ŋɔ yaa nuu dɔɔ nuukpannɛ, ka ɔɔ ra hum bɔbiri huma, karaa yaa ra kanni. Yaa waa wibii dɔɔwɛ.

⁷ Ama, di yaa ɔɔ huuhzi biine di ra la alugɔ kennaa Kɔraawiizi n ɔɔ chaani naa, yaa ni yaa dɔŋahina daŋ wer dɔɔ nuukpaŋ, Kɔraawiizi Biibaal Yeesu chal wer sɔ yaa wichɔgaa maa yaa ni di ha.

⁸ Di yaa ŋɔ yaa waa wichɔgaa maa dɔɔwɛ yaa ni, yaa hinaarɛ yaa ra dar. Yaa waa wibii dɔɔwɛ.

⁹ Ka di yaa ra sɛɛ chɔgri, Kɔraawiizi daŋ gil yaa wichɔgaa tɛɛ yaa, di lizi a doŋa maa yaa ni ha. Yaa zummɔ lugɔ u daŋ ɛɛ guŋ tɛɛ yaa, dikuubɛɛwiai, u wia dɔɔ wibiire. U wia maa ge kaa deŋli.

¹⁰ Di yaa ŋɔ yaa waa wichɔgaa maa ra ɛɛ, amɔ, yaa ra yir Kɔraawiizii kara hiŋ. U wiŋɔzi waa hoo yaa bampiree.