Luke 1 - Thet

¹ လေးစားနက်ပိုဟေကား သော်ဖိလို၊ ငါရက်ကလောကယာ ဘုရားရှင် လုပ်တက်ဟေကား အမူအရာရက်အင်

² အစဦးပါနိ မျက်မြင်သက်သေဖြိုက်တက်ကလူးရက်အိမ် အမူတော်ဆောင်ရက် ဟောပြိစ်ဒက်ကအတိုင်း လူးဘောင်းဂို့ရက်နာ ရေးဂိုဆနပ်ပီဒင့်လင်ကဟေ။

³ မှကြောင်း ငါစာ ဖြစ်ပျက်ဒက်ဂါအကြောင်းဆန်စုတ်အင် ဂရုတစိုက် စုံစမ်းလေ့လာဒက်ကို

⁴ နနိန်ရက် ဆနိန်ဒက်ဂါ အကြောင်းရက်နာ မှန်ကန်ဂါအကြောင်း ချေးကဇိစ် နနိန်ရက်ကမား အတတ်ကဒေလေ အစီစဉ်တကျ ရေးသားနက်ပေါ်ဂါ ဖြစ်ဟေ။

⁵ ယုဒပြည်ယာ ဟေရုဒ်မင်းကြီးအုပ်ချုပ်ကအချိန်ငါa ဇာခရိအမိန်းငါဟေကား ဂျူးပုရောဟိတ်စာ အဘိယငါးဂိုအော်ဟေကားဂျူးပုရောဟိတ်အဖွဲ့ဝင်ဟူးဝါဖြစ်လင်ဟေ။ အမှာဂါအအီးတားဧလိရှဗက်ယဲ့ အာရုန်ငါဂို့အော်ဟေကား ပုရောဟိတ်ကမျိူးရိုးယာဘင်းဆက်သက်ကလူဖြစ်ဟေ။

⁶ အိမ်မှာနိမ့်ဟူးနာ ဘုရားရှင်ဂါး ပညတ်တော်ရက်အင် အကာမင်အငါထမ်း လိုက်နာဂို ဘုရားရှင်ကရှေ့တော်ယာ ဖြောင့်မတ်ကလူးရက်ဖြစ်ဟေ။

⁷ အဲလစ်ဇဘက်နာ ဘင်းစားမက်ဖြိုက်ကအကြောင့်bမန်ဆာအလှုထမ်း အမာရက်က နိမ့်ဟူးစလုံးယေ့ အဆက်ရက်နာ ပြာယိုးဝန်ကဟေ့။

⁸ ယက်တာဂါရပ် ဇာခရိစာ ဗိမ္မာန်တော်ဝါ အလှည့်ကျတာဝန်ယင် ဆောင်ရွက်တုန်းကရပ်

⁹ ပုရောဟိတ်ရက်ကထုံးစံအရ ဗိမ္မာန်တော်ထဲယာ အမွှေးနံ့ဆာရက်အိမ် ထွန်းဂို့ပူဇော်ကဇိစ် မဲနှိုက်ကို ရွေးချယ်ကရပ် အမင်ရွေးချယ်လင်ကဟေ။

¹⁰ မဒေဖြိုက်ကို ဇာခရိစာ အမွှးတိုင်းငင် ထွန်းဂို့ပူဇော်ကားအချိန်ငါ လူးရက်နာ ဗိမ္မာန်တော်ဝန်းယာ cဆုစိန်ဂိုတုန်းလင်ဂါဟေ။

¹¹ ကျီးကအိမ် ဘုရားရှင်ဖြောက်နက်ဟေကား နတ်ဒေဝါစာd အမွှေးနံ့ဆာရက်အိမ်ထွန်းဂိုပူဇော်ကရပ် ပလ္လင်ပုတ်ဆလက်ဖက်အာe ဇာခရိအင် ကိုယ်ထင်ဆနပ်ကို စက်တုန်းဂါး

¹² ပိုနဲ့က(လ်) အမာစာ တဗျင်းအစက်ဂို့ တုန်လှုပ်လင်ဂါဟေ။"

¹³ အိမ်မာကရပ် ဟမန်း‌ဒေဝါနာ အမင်ယင် "အစက်ယေ့ ဇာခရိ။ နင်ဂါး ဆုစိန်ဂါးရက်အင်ဘုရားရှင် တတ်ဟေ။ နင်ဂါ အအီးတာအဲလစ်ဇဘက်နာ နင်ဂါးအတွက်အဆာဟူးဝါးကေဗာဂါ။ နင်စာ အမင် ယောဟန်ငါးဂို အမိန်းအီးပိုဂါ။

¹⁴ အမာဂါးကေဟေကအချိန်ယာ နနိန်းရက် တဗျင်ဝမ်းမြောက်က ဒက်လေ လူးအပေါင်းရက်အ(လ်)ဝမ်းမြောက်ပျော်ရွှင်ပေါ်ဂါ။

¹⁵ ယောဟန်နာ ဘုရားရှင်ဂါရှေ့တော်ယာ ကြီးကျယ်မြင့်မြတ်ဟေကလူဖြစ်လင်ကား။ အမှာနာ ဟက်တာယဲ့ ဝိုင်အိမ်အရက်အင် အူလင်ဂါအရိန်ပါ(လ်)။ အမာအကေမိဘင်း ဉာဏ်အလင်းတော်နာ အမာအိမ်မက်တာငါ့လင်ကား။

¹⁶ အမှာနာ များပြားဟေကား အစ္စရေးမျိူးရက်အင်f နောင်တသံဝေဂလူးဇိစ်ဂို အမှာရက်က ဘုရားရှင်ကဟိုက်နီးယာ ပြန်လှည့်ဇိစ်လင်ကား။

¹⁷ ယောဟန်နာ အရိယာသူတော်စင်ဧလိယတလေ အခွင့်အာဏာအိမ် ဘုန်းတန်ခိုးငါကို အရှင်သခင်က ရှေ့တော်ပြေးဖြိုက်လင်ကား။ အမာနာ အနှုးဗားအိမ်အဆာနာရက်က စိတ်နှလုံးရက်အင် ညီညွတ်ဇိစ်ကို လက်ခံခြင်အငါကလူးရက်အင် ဆနိန်အီလင်ကား။ မှအကြောင့် လူရက်နာ ဘုရားရှင် ကြွယောဝန်ကအချိန်ယာ အဆင်သင့်ဖြိုက်တုန်းလင် ကားငါ့ဂို" င့ါလင်ကဟေ။

¹⁸ ကျီးကအိမ် ဇာခရိယေ့ ဟမန်းဒေဝါယင် မှဒက်လေဖြစ်ယိုဝန်ဂါငါဟေကား ငါအဆမီရှေးကယာ။ ငါ့ရက်မောင်နှင်းနိမ့်ဟူးစလုံးနာ တဗျင်းအဆက်ပြာတုန်းနန်း"ငါးဂို ပြန်ငှားလင်ဟေ။

¹⁹ အိမ်မာကရပ် ဟမန်းဒေဝါယေ့ အမင် "ငါနာ ဘုရားရှင်ကရှေ့တော်ယာ ခစားပိုကား ဂါဗြေလ ဖြစ်ဟေ။ အတတ်ကဒေလေ ဝမ်းမြောက်ဖွယ်သတင်းတူးယင် နင်ကမားဗန်(ဖ်)ငါ့ကဇိစ် ဘုရားရှင်နာ ငင်ဖြောက်နက်အန်ဂါဖြစ်ဟေ။

²⁰ မှအကြောင့် ငါကတူးယင် နင်အကျုံးကအကြောင်းအိမ် မှအဖြိုက်ပျက်ရက် အဖြိုက်ပျက်တက်က အချိန်ထိ နင်နားတူးအပြိန်လှုထမ်း တုန်းလင်ကား။ ငါ့ကတူးနာ အချိန်တန်နဲ့က(လ်) ဖြစ်လင်ကား"ငါ့ကို ငါ့လင်ကဟေ။

²¹ ဇာခရိအိမ်ဟမန်းဒေဝါရက်နာ ဗိမ္မာန်တော်အထဲယာ တူးပြိစ်တုန်းကရပ် အပြင်ဖက်အာငါဟေကား လူထုပရိသတ်ရက်စာ ဇာခရိအင်စောင့်ဂို ငှားလင်ကဟေ။ အမှာရက်နာ ဗိမ္မာန်တော်အတောင်ဟုန်းငါ ဇာခရိ အဇာရိကအကြောင်း အချိန်ကြာတုန်းဂါးယားငါ့ကို စိတ်ဝင်စားတုန်းလင်ကဟေ။

²² ဇာခရိ အပြင်းငင်ပြူးယိုးဝန်ဂါအချိန်ငါ ဗိမ္မာန်တော်အတောင်ဟုန်းငါတုန်းကရပ် ဇာခရိစာ နိမိတ်လက္ခဏာအင် ပိုဒက်ဟေငါ့ကို လူထုပရိသတ်ရက်နာ နားလည်လင်ကဟေ။ အမာစာ ဆွံ့အဂိုး လူးရက်အင် ခြေဟန်လက်ဟန်အိမ် ဆက်လက်ကို အမူအရာရက်ဆနပ်တုန်းလင်ကဟေ။

²³ ကျီးကအိမ် ဇာခရိနာ ဗိမာန်တော်ယာg ဆောင်ရွက်ပိုဂါး အမှုတော်ရက်အင် ဆောင်ရွတ်ကျီးဟေကအခါ အမာဂါကိန်းငါ ပြန်လင်ကဟေ။

²⁴ အချိန်စိဆာကြားယိုးဝန်ဂါးအချိန်ငါ ဇာခရိကအအီးတား ဧလိရှဗက်နာအပိ ငါယိုဝန်ဂါဟေ။ အိမ်မှတဆာလောင်နာ အချိန်ငါးလ ကြားဇရိုးမှား ကိန်းငါဘင်းအပြင်း အပြူထန်း တုန်းလင်ကဟေ။

²⁵ မှတာဆာလောင်နာ "အရှင်စာ ငါဇီစ်ကိုယ်ဝန်ဆောင်လှုကား အခွင့်ငင်အီဒက်နန်း၊ အမာကအလိုတော်အားဖြင့် ငါယင် လူးရက်ကအထင်သေးနိမ်ချကဲ့ရဲ့ဟေကမှဘင်း ပပျောက်ဇိစ်ဒက်ဟေ " ငါ့ကို ငါ့လင်ကဟေ။

²⁶ ဧလိရှဗက်အပိငါဂို့ ခြောက်လနီးပါးကြားဟေကားအချိန်ငါ ဘုရားရှင်စာ h ဟမန်းဒေဝါ ဂါဗြေလယင်i ဂါလိလဲပြည်ယာဂါး၊ နာဇရက်မြို့အာဖြောက်နက်ကို

²⁷ မာရိငါးဂိုအော်ဟေက နင်းဆီဆာတဆာလောင်ဆာဟူးဝါထနဲ့ လင်ဂိုး သတင်းတူးရက်အင် ပြိစ်ဇိစ်လင်ကဟေ။ မာရိစာ ဘုရင်ဒါဝိဒ်က မျိူးရိုးယာဘင်း ဆင်းသက်ဗန်(ဖ်)ကလူးဖြိုက်ဟေကား ယောသပ်အိမ် စေ့စပ်ပီက လူးဖြိုက်ဟေ။

²⁸ ဟမန်းဒေဝါနာ နူတ်ဆက်ကျီးကရပ် မာရိယင် " ဘုရားရှင်နာ နင်အိမ်မက်တာငါဂိုး အမာက မဟာဂရုနာမေတ္တာတော်ယင် နင်ကအပိုဝါမယ် ဆနပ်လင်ဟေ"ငါ့ကို ငါ့လင်ကဟေ။

²⁹ ဆိုဆော် မာရိစာ အိမ်မာတူးယင် တတ်ကရပ် တဗျင်းစိတ်ရူပ်ကလင်ကို အမန်းဒေဝါရက်ကတူးစာ အဇာဆိုလိုဟေကအကြောင့်ယင် စဉ်းစားတုန်းလင်ကဟေ။

³⁰ အိမ်မားကရပ် ဟမန်းဒေဝါနာ မှတာဆာလောင်ယင် "အစက်ယေ့၊ မာရိ။ ဘုရားရှင်နာ နင်ငင် မျက်နာသာအီယင်နန်း။

³¹ နင်နာ ကိုယ်ဝန်ငါးဂို အဆာဟူးဝါးကေလင်ကား။ အမှားဂါအမိန်းယင် ယေရှုငါးဂိုအော်ပေါ်ကား။

³² အမှာနာ ပြောင်ဟေကားလူဟူးဝါ ဖြစ်ယိုးဂို့ အမြင့်မြတ်ဆုံးက ဘုရားရှင်ဂါးအဆာငါးဂို အော်ဟေကား ဟင်းလင်ပေါ်ကား။ အမာက ဘိုးဘေးဖြိုက်ဟေကား ဘုရင်ဒါဝိဒ်တလေ အမာကလူမျိူးရက်အင် အုပ်ချူပ်လှုကအခွင့်ယင် ဘုရားရှင်နာ အမာဇိစ်အီလင်ကား။

³³ အမှာနာ အစ္စရေးလူမျိူး အပေါင်းရက်အင် ဘုရင်အဖြိုက်ထာဝရအုပ်စိုးဂို အမှာဂါးနန်းဆက်အ(လ်) ဟက်တာယဲ့ အစီးလင်ကား အရိ(လ်)ပါ(လ်)"ငါ့ကို င့ါလင်ကဟေ။

³⁴ အိမ်မကရပ် မာရိနာ " ငါနာ နင်းဆီဟူးဝါးဖြစ်က အတွက်ကြောင်း မှအူဇာနာ အဆာမီဖြိုက်လှုကားယား"ငါ့ကို ဟမန်းဒေဝါယင် ငါ့လင်ကဟေ။

³⁵ ဟမန်းဒေဝါယေ့ "ဉာဏ်အလင်းတော်နာ နင်ထနဲဆင်းသက်ကို ဘုရားရှင်ကတန်ခိုးတော်ယဲ့ နင်ကာအဖုံးယာ လွမ်းခြုံလင်ကား။ မှအကြောင့် နင်ကအဆာယဲ့ ဘုရားရှင်က မြင့်မြတ်ကအဆာငါ့ကို အော်ကဟင်းလင်ပေါ်ကား။

³⁶ နင်ဂါးဆွေမျိုးဖြစ်ဟေကား ဧလိရှဗက်နာ အဆက်ပြာကို လူးရက်နာ မန်းဆာအလှုနိုင်းဂါထင်တုန်းကယေ့j အတတ်ကိုယ်ဝန်ဆောင်တုန်းကရပ် ခြောက်လနီးပါး ငါးတုန်းနိူင်း ဖြစ်ဟေ။

³⁷ "ဘုရားရှင်က အလိစ်လှုကား အူဇာဆူးယေ့အငါပါ(လ်)"ငါ့ကို င့လင်ကဟေ။

³⁸ အိမ်မာကရပ် မာရိနာ "ငါနာ အရှင်ဘုရားက ကျေးကျွန်အစေခံ ဟူးဝါဖြစ်နက်ဟေ။ နင်ငှားဟေက တူးအတိုင်း ငါကအပေါ်ဝါ ဘုရားရှင်ဂါး အလိုငါဟေကအတိုင်း ဖြစ်နက်ပိုဇီစ်"ငါးဂို့ ငါလင်ကဟေ။ ကျီးကအိမ် ဟမန်းဒေဝါနာ မာရိကမှားဘင်းပြူကလင်ဟေ။

³⁹ နီးကတောင် မာရိနာ အဆင့်သင့်ပြင်ဂို့ ဇာခရိတုန်းကနေရာ ယုဒမြို့ပြည်ယာ တဂိုးဒေသယာ အမြန်ဆုံးလင်ကဟေ။

⁴⁰ အိမ်မာနေရာထုပ်ကရပ် အမှာစာနာ ဇာခရိကကိန်းအတောင်ဟုန်းငင်ဆင်ဂို့ အမှာဂါအအီးတားဖြစ်ကဧလိရှဗက်အင် နှုတ်ဆက်နက်ကဟေ့။

⁴¹ မာရိကားနှုတ်ဆက်ဟေကတူးဝင် ဧလိရှဗက်တတ်ဟေကရအ် အမှာဂါအပိအတောင်ဟုန်းငါဂါးမန်းဆာနာ ရိန်းမို(လ်)တုန်းလင်ကဟေ။ ဧလိရှုဗက်နာ ဘုရားကဉာဏ်အလင်းတော်အိမ် ဝမ်းမြောင်ရွှင်လန်းဂို ဘုရားရှင်ယင် ဂုဏ်ပြုလင်ကဟေ။

⁴² ဧလိရှုဗက်နာ မာရိယင် "ဘုရားရှင်နာ တခြားတဆလောင်ရက်တောင်မှာဒင့် နင်ငင်ပိုဂို့ ကောင်းကျိုးချမ်းသာအီပီးဂို့ နင်ဂါကေယိုဝိုင်းဂါမန်ဆာယေ့ ကောင်းကျိုးချမ်းသာလှုလင်ဂါး။

⁴³ အရှင်ကအနှုးနာ ငါ့ထနဲ့ အဇာရိ(လ်)ကိုဗန်(ဖ်)ကယား အဆာမီကအကြောင်း အတတ်ကအဒေလေ အခွင့်ထုယင် ငါခံစားပေါ်ကယား။

⁴⁴ နင်ဂါးနှုတ်ဆက်ဟေကအကြင်တပ်ဟေကရပ် ငါဂါ အပိအတောင်ဟုန်းကမန်ဆာနာ ပျော်ရွှင်ဝမ်းမြောက်ဂို့ ခုန်တုန်းဟေ။

⁴⁵ ဘုရားရှင်းဂါးဗျာဒိတ်တူးနာ အမှန်တကယ်ဖြစ်ယိုးဝန်ကငါးဂို့ နင်ယုံကြည်ဟေကအကြောင့်အိမ် နင်စာ အဒင့်မင်္ဂလာငါဟေ"ငါ့ဂို ဟော်ဂိုင့ါလင်ကဟေ။

⁴⁶ ကျီးကအိမ် မာရိယဲ့ "ငါစာ ဘုရားရှင်က ဂုဏ်ကျေးဇူးယင် ချီးမွမ်းနက်ဟေ။

⁴⁷ ငါကစိတ်ဝိညာဥ်စာ ကယ်တင်ရှင်ဘုရားရှင်ထနဲ့ အားရတဟောင်လှုဂို့ ပျော်လင်ကဟေ။

⁴⁸ ငါနာ ကိုယ်တော်က နိမ့်ကျဟေကားအစေခံဖြိုက်ကယဲ့ အတတ်ကအချိန်ငါဘင်းစဂို့ မျိူးဆက်တိုင်းယာက လူးဘောင်းကိုရက်စာ ငင်ယင်ကောင်းချီးမင်္ဂလာအီးဂါးဟင်ပိုဂါးလူး" ငါးဂို့ ငါ့လင်ကား။

⁴⁹ တန်ခိုးတော်ပြောင်ဟေကာ ဘုရားရှင်စာ ငါကအဖုံးယာ မြင့်မြတ်အူဇာရက်အင် သက်ရောက်တော် မှုဂို ငါလင်ကဟေ။

⁵⁰ ခေတ်ဆက်ဆက်အာက ဘုရားရှင်စာ အမင်ယင် လေးစားကိုးကွယ်ဟေကား လူးရက်အင် မဟာကရုဏာမေတ္တာရက်အင် အမြဲထင်ရှားဂို့ ဆနပ်လင်ကဖြစ်ဟေ။

⁵¹ ဘုရားရှင်နာ မှန်မာန်နာထောင်ဟေက လူအပေါင်းရက်အင် အမာကတန်ခိုးတော်အိမ် လွင့်စင်ဇိစ်လင်ကဟေ။

⁵² ဘုရားရှင်နာ အုပ်စိုးဂါးလူးရက်အင် အမှာရက်ကား ပလ္လင်ပေါ်ငါဘင်းဆွဲချဂို နှိမ့်ချဒက်ဟေကား လူးအပေါင်းရက်အင် အရေးပါဟေကား လူးရက်ဖြိုက်ဇိစ်လင်ကဟေ။

⁵³ ဘုရားရှင်နာ ပုဆာလောင် ငတ်မွတ်တုန်းဟေက လူးရက်အင် မှီးဟေကားအစာအာဟာရအီးဂို့ သူဌေးရောက်အင် လက်လွှတ်ဗလာအိမ်ဖြောက်ဟေ။

⁵⁴ ဘုရားရှင်နာ အမာဂါး မဟာကရုဏာမေတ္တာတော်ယင် အမှတ်လှုကအဖြင့် အမူတော်ယင် ဆောင်ရွက်ကလူး အစ္စရေးလူမျိူးရက်အင် ကယ်တင်စောင့်ရှောက် လင်ကဟေ။

⁵⁵ "ဘုရားရှင်နာ ငါ့ရက်က အအီးအုပ်ဖြစ်ဟေကား အာဗြဟံဂါးမျိုးရိုးစဥ်ဆက်ရက်က ကတိတော်အတိုင်း အစဥ်ထာဝရစောင့်ရှောက်တော်မူလင်ဟေ။" ငါးဂို့ ဘုရားရှင်ဂါးဂုဏ်တော်အင် ချီးမွမ်းပူဇော်လင်ကဟေ။

⁵⁶ ကျီးကအိမ် မာရိနာ ဧလိရှဗက်အိမ်မက်တာ သုံးလခန့် တုန်းကျီးကရပ် အမာက ကိန်းငါပြန်းကလင်ဟေ။

⁵⁷ ကျီးကအိမ် ဧလိရှဗက်စာ ကေယိုးငန်ကားအချိန်ထုပ်ဗာ(ဖ်)ကရပ် အဆာတာဆာ ဗြိုင်းဟူးဝါယင် ကေလင်ကဟေ။

⁵⁸ ဧလိရှုဗက်ကကိန်းနားက ဆွေမျိုးရက်နာ ဧလိရှဗက်အပေါ်ဝါ ပီးဟေက ဘုရားရှင်းကားမေတ္တာပြောင်ဟေကား တတ်ဂို့နာချေးပီးဂါကြောင့် ငါအိမ်မက်တာ ပျော်ရွှင်ဝမ်းမြောက်ဂိုငါလင်ကဟေ။

⁵⁹ မန်းဆာကေကျီးဂို့ရှစ်ရက်မြောက်ဟေကားရယက်အာ မန်ဆာအင်္ဂါကိတ်ဟန်ဂါ မင်္ဂလာဒက်လေဆောင်ရွက်ကဇီစ်ဝတ်တရားရက်အင် ဆောင်ရွက်ကဇီစ် ဗန်(ဖ်)ဟေကလူးရက်နာ မာန်ဆာဂါအမိန်းငင် အဗာ(ဖ်)ဖြိုက်ဟေကား ဇာရိကအမိန်းယင်လာဂိုး ဇာခရိငါ့ကို အမိန်းအီကက်ကဟေ။

⁶⁰ ဆိုဆော် မာန်ဆာကားအနူးနာ "အမာက အမိန်းနာ ယောဟန်ဖြစ်ဟေ" ငါးဂို ငှားလင်ကဟေ။

⁶¹ လူးအပေါင်းရက်အ(လ်) မှတာဆာလောင်ယင် "နင်ကမျိုးရိုးထဲယာကား အတတ်ကဒေလေက အမိန်းအငါပါ(လ်)"ငါ့ကို င့လင်ကဟေ။

⁶² နီးကဒေါင်း အမှာရက်နာ မန်းဆာဂါးအဗားဖြစ်ဟေကလူး ဇာခရိအင် တာဟူးအိမ်ဆနက်ဂို အဆာမီက အမိန်းယင် အော်ကက်ဟေယားငါ့ကို ကတာလင်ကဟေ။

⁶³ ဇာခရိနာ သင်းပုန်းတစ်ချက်လာဂို အမှာဂါအမိန်းနာ ယောဟန် ဖြစ်ဟေငါးဂို ရေးလင်ကဟေ။ ပိုဟေကလူအပေါင်းရက်နာ အံ့ဩဂိုငါ့လင်ကဟေ။

⁶⁴ ကျီးကအိမ် ချက်ချင်းနာ ဇာခရိယေ့ စတင်ဂို့တူးပြိစ်လှုကိုး ဘုရားရှင်းဂါဂုဏ်တော်ယင် ချီးမွှမ်းလင်ကဟေ။

⁶⁵ ကိန်းနားကလူးရက်အိမ် ဆွေမျိုးဆန်းစူရက်နာ မှအဖြစ်အပျက်အင်ပိုဂါးအခါ အစက်ဂို့တုန်လှုပ်လင်ကဟေ။ လူးဆန်းစူရက်နာ အိမ်မှသတင်းငင် ယုဒပြည်တောင်ပေါ်ဒေသယာက နေရာတိုင်းငါ ငှားတုန်းလင်ကဟေ။

⁶⁶ အိမ်မားသတင်းတူးရက်အင် တတ်ပေါ်ကားလူးအပေါင်း ရက်အ(လ်) "မှမန်ဆာပြောင်ယောဝန်ကရပ် အဆာမိကလူးဖြိုက်အန်ကယား"ငါ့ကို စိတ်ဝင်တစား တီးတိုးငါ့တုန်းလင်ကဟေ။ ဘုရားရှင်ကတန်ခိုးတော်ယဲ့ မန်ဆာအိမ်မက်တာ ငါတုန်းလင်ကဟေ။

⁶⁷ ကျီးကအိမ် ဉာဏ်အလင်းတော်စာ ဇာခရိကမားထုန်ကို အမာနာ

⁶⁸ "အစ္စရေးလူမျိုး ဆန်စူရက်က အရှင်သခင်ဖြစ်တော်မူဟေကား ဘုရားရှင်ဂါး ဂုဏ်ကျေးဇူးတော်ငင် ငါချီးမွမ်းဟေ။ ဘုရားရှင်နာ အမာကလူမျိူးအပေါင်းရက်အင် ကယ်တင်ကဇီစ် ကြွဗန်(ဖ်)ဟေကဖြစ်ဟေ။

⁶⁹ ဘုရားရှင်နာ အပါနာကအစေခံဖြစ်ဟေ ဒါဝိဒ်ဘုရင်ဘင်းဆက်သက်ဗန်ဟေက တန်ခိုးအာဏာပြောင် ဟေကား ကယ်တင်ရှင်နာ ငါရက်ကအတွက် ပေးသနားတော်မူလင်ကဟေ။

⁷⁰ မလားအခါကရပ် ဘုရားရှင်စာ မြင့်မြတ်ဟေကား အရိယာသူတော်စင်ရက်အင် ကတိအီးဒက်ကအတိုင်း။

⁷¹ မှတန်ခိုးပြောင်ဟေကား ကယ်တင်ရှင်စာ ငါရက်အင် ရန်သူအပေါင်းရက်အာဘင်း ကယ်တင်ကအပြင် ငါရက်အင် မလိုမုန်းတီးကလူးရက်က ဘေးအန္တရာယ်ယာဘင်း ကင်းလွတ်ဇိစ်လင်က ဖြိုက်ဟေ။

⁷² ဘုရားရှင်နာ မဟာဂရုဏာတော်အိမ် ငါရက်ကဘိုးဘေးရက်အင် အီဒက်ကား ကတိတော်ယင် တည်ယိုင်ဂါးဖြစ်ဟေ။

⁷³ ဘုရားရှင်နာ ငါ့ရက်ကား အအီးအုပ်ဖြစ်ဟေကား အာဗြဟံယင် ကတိအီပီဟေကအတိုင်း။

⁷⁴ ငါ့ရက်အင် ဘေးအန္တရာယ်ပြူဟေကလူး ရန်သူရက်က တာဟူးဘင်း ကယ်ဆယ်ဂါးဖြစ်ဂို့ ငါရက်ယေ့ အဆက်ဆိမ်တုန်းက ကာလပတ်လုံး အကြောက်တရား ကင်ဝေးစွာအိမ် ဘုရားရှင်ဂါးအမှုတော်ငင် ထမ်းရွက်ပိုဂါးဖြစ်ဟေ။

⁷⁵ အိမ်မာဒေလေအားဖြင့် ငါရက်အ(လ်) အမာကရှေ့တော်မှောက်အာ ဖြောင့်မတ်စင်ကြယ်ကငါဂိုး ကျန်တုန်းကဘဝအဆက်အင် ကုန်ဆုံးလင်ပေါ်ကဖြိုက်ဟေ။"ငါ့ကို ဘုရားရှင်က ဂုဏ်ကျေးဇူးတော်ယင် ချီးမွမ်းလင်ကဟေ။

⁷⁶ ကျီးကအိမ် ဇာခရိစာ အမာကအဆာယင် " ငါကားအဆာ၊နင်ငင် အမြင့်မြတ်ဆုံးက ဘုရားရှင်ဂါ အရိယာသူတော်စင်ဒေလေ kအော်ဂို့ချီးမြောက်လင်ကဖြစ်ဂို့ ဘုရားရှင်ဂါလင်းငင် ကြိုတင်ပြင်ဆင် အီးဂါလူး ဖြစ်လင်ကား။

⁷⁷ ဘုရားရှင်နာ လူရက်ကအပြစ်ရက်အင် ခွင့်လွတ်အီကျီးကရပ် ကယ်တင်အီကားဟင်ပိုဂါးအကြောင်းငင် နင်စာ လူးရက်အင် ဟောဆနပ်လင်ပေါ်ကား။

⁷⁸ ဘုရားရှင်ဂါး မဟာကရုဏာမေတ္တာရက်နာ ကောင်းကင်အဖုံးငါကား စမိတ် ထွန်းလင်းတောက်ပတုန်းကဒေလေ ငါ့‌ရက်ကအပေါ်ဝါး ထွန်းလင်းဂို့။

⁷⁹ ဆိန်းကတရားယင် ရင်ဆိုင်တုန်းဟေကလူရက်အင် အပြစ်ဘင်း ကင်းလွှတ်ဂို့ အေးချမ်းဟေကဘဝယင် လင်းဆနပ်ဂို့ အီးလင်ကား"ငါ့ကို ပြိစ်လင်ကဟေ။

⁸⁰ အတတ်ကအခါ ယောဟန်စာ အရွယ်ထုန်းဗာ(ဖ်)ဂိုး အကျင့်သီလအိမ် ပြည့်စုံကလူးဖြိုက် ယောဝန်ကဟေ။ ဘုရားရှင်နာ အမာယင် အစ္စရေးလူမျိူးရက်ကရှေ့ယာ အမူတော်ယင် စတင်ကိုလုပ်ဇိစ်ကက်ကား ရယက်အထုန်မိ အမာစာ မလိမ်းကန္တာရအထဲယာ ကျင်လည်တုန်းလင် ကဟေ။