Zefania 3 - Tshwa Bible

A kuonha ni kulamula.

¹ I khombo ka muti lowu wu ti alisako, loʼwo nyenyeza, a ka muti wa vatsimbeketi!

² A wu ingisangi gezu ni ginwe, a wu amukelangi a ziluleko, a wu tsumbangi Jehova, a wu tshinelangi ka Nungungulu wa wona.

³ A tihosana ta wona, tinghala leti ti dzumako; a valamuli va wona va fana ni mahlolwa ni wusiku, ma nga siyiko nchumu xa manziko.

⁴ A vaprofeti va wona mbo ti kulisa, va nga tsumbekahgiko; a vapristi va wona va nyenyezisile a wutshamu ga kubasa, va byeketa nayo. Jer. 23:11, 32; Ezek. 22:26

⁵ Jehova i lulamile xikari ka wona, a nga mahi kubiha; mixo ni mixo i humesa a nongameto wakwe kubaseni, a nga tindeki; kanilezi a vakubiha a va tivi tingana.

⁶ Nzi hihiritile matiko, a makhokhola ya wona ma khungumulwe; nzi mahile a tindlela ta wona lezaku ti nga ha tsemakanyiwi hi munhu. A miti ya wona yi iovile, laha kaku a ka ha hi na munhu, ni muaki munwe a nga ha hi kona.

⁷ Nzi te ngalo: Hizinene loku u wa ta nzi chava, u amukela a ziluleko, zinghaho a Wutshamu ga wena gi wa nga ta susiwa kukotisa zontlhe lezi nzi leleteleko xungetano na wena. Kanilezi na ga hi mixo va vukile kasi ku wonha zimaho zabye zontlhe.

⁸ Hikwalaho nzi rinzeleni, ku wula Jehova, kala a siku lego nzi ta nga vuka ha gona nzi phanga; hakuva a mixuvo ya mina hi ku tsombanyisa a matiko, ni ku tlhanganyisa a mifumo, kasi nza chulela hehla ka yona a zanga ya mina, yontlhe a zanga ya mina yi chavekako, hakuva a misava yontlhe yi ta hiswa hi nzilo wa xiluse xa mina.

⁹ Hakuva a siku lego nzi ta nyika a matiko milomu yiswa leyi yi basileko, kasi wontlhe ma fela ku vitana a vito ga Jehova, ma mu tirela hi mbilu yinwe.

¹⁰ A vakhozeli va mina, va nga vanhu ya mina va hangalakileko, va tata hi le tlhatukweni wa micongo ya Etiopia, va nzi nehela zinyikiwo.

¹¹ A siku lego u nga lawa tingana hi zimaho za wena zontlhe lezi u nzi goheleko ha zena; hakuva nzi ta susa xikari ka wena lava va giyako hi matshanza, zonake wena u nga ta ha ti kukumuxa xitsungeni xa mina xa kubasa.

¹² Kanilezi nzi ta siya xikari ka wena a vanhu va xanisekako ni vavumali, va ta tsumba a vito ga Jehova.

¹³ A misalela ya ka Israeli yi nga ta ha goha, yi nga ta hemba mawunwa, ge hambu lirimi la ku khohlisa li nga ta kuva kona milonwini yabye. Hakuva va taga, va etlela hi kurula, a nga hi kona a va dzuxako. Joba 11:19; 1 Joh. 5:18

¹⁴ Yimbelela, wena nhanyana wa le Zioni! Khana wena Israeli! Tsaka, u nengela hi mbilu ya wena yontlhe, wena nhanyana wa Jerusalema!

¹⁵ Jehova i susile mitsayiselelo ya wena, i hlongole a valala va wena; a hosi ya Israeli, yena Jehova, i lomu xikari ka wena, u nga ta ha chava kubiha kambe.

¹⁶ Hi siku lego va taku ka Jerusalema: U nga chavi, Zioni! ngha a mandla ya wena ma nga mbheli ntamu!

¹⁷ Jehova a Nungungulu wa wena, i lomu xikari ka wena, i nhenha leyi yi hanyisako. I ta ku tsakela hi zigingi, a miyela liranzweni lakwe, a ku tsakela hi tisimu.

¹⁸ Nzita tsombanyisa lava va hulukelako hi kuvumaleka ka tihlengeletano ta ximuse, lava va nga tshamile kule na wena, lava va rweleko a nzhwalo wa nzhukano.

¹⁹ A xikhatini lexo nzi ta tlhelisela vontlhe lava va ku hlokisako; nzi ta hanyisa lava va khwitako, nzi tsombanyisa lava va hlongolweko, nzi ta va nyika wudumo va khesiwa, lava a tingana tabye ti nga no fenemete misaveni yontlhe.

²⁰ Xikhatini lexo nzi ta mu wuyisa nzi mu tsombanyisa, hakuva nzi ta mu nyika wudumo mu khesiwa xikari ka matiko wontlhe ya misava, a siku lego nzi ta nga wuyisa a vakhonwi va nwina mahlweni ka nwina, ku wula Jehova. Deut. 30:3