Zefania 2 - Tshwa Bible

A kulamulwa ka matiko.

¹ Tsombanani, mu ti alakanyela, nwina tiko gi nga hiko na tingana,

² hi mahlweni a nyiwo na yi nga se ku tatiseka, hakuva a siku lego gata khwatsi i mungu lowu wu kukuletwako, hi mahlweni a zanga ya Jehova yi nga se ngata ka nwina, hi mahlweni a siku ga zanga ya Jehova na gi nga se ngata ka nwina.

³ Hlotani Jehova nwina nwentlhe va koramileko va tiko, lava mumahako a zileletelo zakwe; hlotani kululama, mu hlota ku ti tsongahata; kutani mu ta fihlala a sikwini ga zanga ya Jehova.

⁴ Hakuva Gaza i ta tsikiwa, Axkeloni i tava marumbi; Axdode i ta hlongolwa ni mumu, Ekroni i ta tsuwulwa.

⁵ Va tava ni khombo lava a akileko fungwini wa bimbi, a tiko ga vaKereti! A mhaka ya Jehova ya ku vukela, wena Kanani, tiko ga maFilistia; nzi ta ku lovisa kasi ku nga havi kona ni muaki munwe ka wena.

⁶ A tiko ga fungu wa bimbi gi tava wuriselo, giva ni zikupe za varisi ni maranga ya mitlhambi.

⁷ Gi tava tiko ga misalela ya ka Juda, va ta risela lomo a mitlhambi yabye. Laha gambyeni va ta etlela tindlwini ta ka Axkeloni, hakuva Jehova a Nungungulu Wabye i ta va alakanya, a tlhelisela a vakhonwi yabye.

⁸ Nzi zwile a tinzhukano ta Moabi, ni tihlamba ta vana va ka Amoni, leti va rukateleko a vanhu va mina, va ti tekela tiko mimbhinganweni yabye.

⁹ Hikwalaho nza hlambanya hi kuhanya ka mina, ku wula Jehova wa tiyimpi, a Nungungulu wa Israeli, Hizinene Moabi i ta fanana ni Sodoma, ni vana va ka Amoni va ta fanana ni Gomora, ku maha a tiko ga mizwa ni marinzi ya munyu, giva xiwula kala kupinzuka. A misalela ya vanhu va mina yi ta va phanga, a misalela ya tiko ga mina yi taga tshomba yabye. Gen. 19:24; Jer. 48:1

¹⁰ Lezo va ta tlheliselwa hi kota ya matshanza yabye, hakuva va rukatele, va ti kulisa ka vanhu va Jehova wa tiyimpi.

¹¹ Jehova i ta chaviseka kabye, hakuva i ta riza vontlhe vanungungulu va misava; vanhu va ta mu khizamela, munwe ni munwani na hi wutshanwini gakwe a ka wontlhe matiko matlhelweni ya bimhi.

¹² Na nwina maEtiopia kambe mu ta hlaselwa hi supado ya mina.

¹³ I ta nawuluta a woko gakwe tlhelweni ga Nwalungu, a daya maAssiria; i ta hahlula a Niniva gi: woma ku fanana ni xiwula:

¹⁴ A mitlhambi yi ta zumba lomu xikari kakwe, ni lixaka tontlhe ta zihari; a masekwa ni tinungu zi ta etlela lomu timhanzeni ta wona, a gezu ga xikotlwani gi ta zwala lomu tinjhaneleni, zikunguwa zi ta kapama ka zipimbitsi za wona, hakuva i funungule a mapulangu ya tisedare.

¹⁵ Hi wona a muti wa litsako, lowu wu nga tshama hi ku nga khatali, na wuku mbilwini ya wona; Hi mina nzoce, a ku na munwani ahandle ka mina! Wu hunzulukisile kuyini wu maha marumbi, wu maha wutshamu go etlela kona zihari? Loyi ni loyi a hunzako mahlweni ka wona i ta wu bela noti, a ninginiza woko gakwe.