Zakaria 9 - Tshwa Bible

A kulobyiswa ka valala va Juda.

¹ A xiprofeto xa Jehova hi tiko ga Hadrake, xi ta tshama ni hehla ka Damasku; hakuva a tihlo ga Jehova gi cuwuka a vanhu vanwani kukotisa loku a cuwuka tontlhe tixaka ta ka Israeli; Isa. 17:1; Jer. 32:19

² xi le hehla ka Hamate kambe, legi gi gamekeneko nawo; ni le hehla ka Tire ni Sidoni, lomu va tlharihileko nguvu.

³ Tire i ti akele a khokhola, a hlengeletela siliva ku fanana ni tshuri, ni nzalama khwatsi i nzhope ya lomu tindleleni.

⁴ Kanilezi Hosi yi ta mu wutlela, yi ta wisa makhurisi yakwe bimbini, a lobyiswa hi nzilo.

⁵ Axkeloni i ta zi wona a chava, na Gaza i ta rurumela nguvu; na Ekroni kambe, hakuva i ta tsanzeka kutsumbeni kakwe. Gaza i ta lahlekelwa hi hosi yakwe, Axkeloni a nga ta kuva ni muaki.

⁶ A lixaka la xangelwa li ta aka lomu Axdode, lezo nzi ta fuvisa a matshanza ya maFilistia.

⁷ Nzi ta susa zakuga za nkhata nonwini wakwe, ni manyalataniso xikari ka meno yakwe; yenawu i tava a salela wa Nungungulu wa hina. I ta ku khwatsi i hosi xikari ka Juda, na Ekroni a ku khwatsi mu Jebusi, 1 Sam. 14:32

⁸ Nzi ta ranzela yindlu ya mina hi wugovelo, kasi ku yi vikela ka tiyimpi ti hunzako hambu ku tlhelela kona; ni muxanisi a nga ta ha hunza xikari kabye, hakuva makunu nzi yimile nzi langutela.

A kuta ka Hosi.

⁹ Tsaka nguvu, nhanyana wa le Zioni! Bana mikulungwani, wena nhanyana wa le Jerusalema. Languta, a hosi ya wena yata ka wena. I lulamile, i na ni kuhlula; ngwa ku ti koramisa, i khilele a mbongola, a role ga pswele ga mbongola. Isa. 12:6; Mat. 21:5; Joh. 12:15

¹⁰ Nzi ta fuvisa a tikareta lomu Efraime, ni mahaxi le Jerusalema, ni mawura ya yimpi ma ta fuviswa. I ta wulawula kurula a ka mifumo; a kufuma kakwe ku ta sukela bimbini ginwe kala ka ginwani, ni kusukela Congweni kala magemetamusi ya misava.

¹¹ Loku ku hi wena, hi kota ya xivumelwano xa wena xa nkhata, nzi ta tlhatlha a tiperesu ta wena ti huma rinzini gi nga hiko na mati. Ekso. 24:8; Maheb. 9:19

¹² Tlhelelani khokholeni, nwina tiperesu ti ftga ni kutsumba. Inyamutlha nza tiyisa lezaku nzi ta mu tlhelisela ha kumbiri.

¹³ Hakuva nzi ta kondla Juda a ku khwatsi i wura, Efraime a hi ligalala la kona; nzi ta vuxa a vana va Wena Zioni, va Vukela a vana va maGreki, nzi ku maha u fanana ni supado ya nhenha.

¹⁴ Jehova i ta woneka hehla kabye, a ligalala lakwe li ta phandiwa li ku khwatsi xingwalangwanza. Hosi Jehova i taba a mpunzu, a famba hi xipupuri xa Dzonga.

¹⁵ Jehova wa tiyimpi i ta va vikela, va ta khadamule valala vabye, va kanzihelela a maribye yo nziwitela; va tanwa a nkhata wabye, va maha guwa khwatsi hi loku va pswonga a vinya; va ta tala ha wona kukotisa mingelo ya muphahlo, va ku khwatsi magwitsi ya alati. Ekso. 24:6

¹⁶ Jehova Nungungulu wabye i ta va hanyisa hi siku lego, kota lezi va nga tlhambi wa tiko gakwe; hakuva va ta fana ni maribye ya lisima ma kwezimako lomu ka xidlodlo a tikweni gakwe.

¹⁷ Hakuva a kuvuvuma kabye ka hombe nguvu, ni wumbhuri gabye ga hombe nguvu! A mavele ma ta kulisa a majaha, ni vinya giswa a vanhwana. Deut. 33:28