Zakaria 6 - Tshwa Bible

A muwoniso wa mune wa tikareta.

¹ Nzi lo tlakusa kambe a mahlo ya mina, nzi wona mune wa tikareta na tita hi xikari ka zitsunga zimbiri. A zitsunga za kona zi wa hi za suku.

² A kareta yo ranga yi lo kokiwa hi mahaxi yo pswhuka; a ya wumbiri yi lo kokiwa hi mahaxi ya ntima; Kuv. 6:2

³ a ya wunharu yi lo kokiwa hi mahaxi yo basa; a ya wumune na yi kokiwa hi mahaxi ya matlhakatlhaka ya ntamu.

⁴ Zonake nziku ka ngelosi leyi yi nga wulawula na mina: Hosi yanga, zini lezi?

⁵ A ngelosi yiku ka mina: Leti hi mune wa timheho ta tilo, ti sukelako laha ti nga yimile kona mahlweni ka Hosi ya misava yontlhe. Jer. 49:36; Dan. 7:2; Kuv. 7:1

⁶ A kareta leyi yi kokiwako hi mahaxi ya ntima yi famba tikweni ga Nwalungu, lawa yo basa ma lanzela hi lenzhako; lawa ya matlhakatlhaka ma loya tikweni ga le Dzongeni.

⁷ Lawa ya ntamu ma lo huma ma lava ku nzulanzula ni misava. A ngelosi yiku: Sukani, mu nzulanzula ni misava! Zinghaho ma lo suka ma nzulanzula ni misava.

⁸ Zonake yi lo nzi vitana, yiku: Wona lawa ma yako tikweni ga Nwalungu ma ta ya rutisa a zanga ya mina tikweni ga Nwalungu.

A hluke.

⁹ A mhaka ya Jehova yi lota ka mina, yiku:

¹⁰ Amukela mihlengo ya lava va nga wukhumbini, ya va ka Heldai, ni ya va ka Tobija na Jedaia, uya siku gwalego a ndlwini ya Josia a nʼwana Zefania, laha va chikeleleko kona loku va sukile hi Babuloni.

¹¹ Teka a siliva ni nzalama, u maha ha zona a xidlodlo, u xi tlhateka hlokweni ya mupristi wa hombe Joxua a nʼwana Jehozadaki;

¹² uku ka yena: Jehova wa tiyimpi i ngalo: Languta, a wanuna loyi a vito gakwe a nga Hluke, i ta mita wutshanwini gakwe, a aka a yindlu ya Jehova. Isa. 11:1; Jer. 23:5; 33:15

¹³ Hi yena a ta nga aka a tempeli ya Jehova; i tava ni wuhosi, a tshama hehla ka xitshamu xakwe xa wuhosi a fuma; ni kambe i tava mupristi xitshanwini xakwe. Ku tava kona a makungo ya kurula xikari ka zikhundla lezi zimbiri.

¹⁴ Kanilezi a xidlodlo xi ta vekiwa tempeleni ya Jehova, xiva xialakanyiso xa Helema, na Tobija, na. Jedaia, na Heni, a nʼwana Zefania.

¹⁵ Lava va nga le kule va tata va ta aka a tempeli ya Jehova; zonake nwina mu ta zi tiva lezaku nzi rumilwe ka nwina hi Jehova wa tiyimpi. Lezi zi ta maheka loku hakunene mu ingisa a gezu ga Jehova a Nungungulu wa nwina.