Zakaria 3 - Tshwa Bible

A muwoniso wa Joxua kukotisa mupristi wa hombe.

¹ I lo nzi kangeta Joxua, a mupristi wa hombe, na yimile mahlweni ka ngelosi ya Jehova, na Satani a yimile reveni gakwe ga xinene kasi ku mu kecara.

² Jehova aku ka Satani: Ngha Jehova a ku kawuka, wena Sata! Ina, Jehova loyi a hlawulileko Jerusalema ngha a ku kawuka! A muti lowu a hi lihunyi li susilweko nzilweni ke?

³ Joxua i wa ambele a tinguwo to nyenyeza, na a yimile mahlweni ka ngelosi.

⁴ A ngelosi yiku ka lava va nga yimile mahlweni ka yona: Mu tlhatlheni a tinguwo to nyenyeza! Yi wuya yiku kakwe: Nzi ku susele a kugoha ka wena; nzi ta ku ambexa tinguwo ta mibuzo. Isa. 4:4; Mika 7:18; Lu. 15:22

⁵ Nziku: A va mu ambexa a xihuku xo basa hlokweni yakwe! Va lo tlhateka a Xihuku xo basa hlokweni yakwe, va mu ambexa tinguwo. A ngelosi ya Jehova yi wa yimile kwalaho.

⁶ A ngelosi ya Jehova yi lo tiyisa ka Joxua, yiku:

⁷ Jehova wa tiyimpi i ngalo: Loku u famba hi tindlela ta mina, u hlayisa zileletelo za mina, wena u ta fumela yindlu ya mina, u hlayisa a tihubye ta mina, nzi ta ku nyika fanelo ku tshinela xikari ka lava va yimileko lomu.

⁸ Zwana makunu, wena Joxua mupristi wa hombe, wena ni vanghana va wena lava va tshamileko mahlweni ka wena, hakuva a vavanuna lava va tava xikombiso; hakuva nzi ta neha a nanza ga mina Hluke. Isa. 8:18; Jer. 23:5; 33:15

⁹ Hakuva a ribye legi nzi nga gi veka mahlweni ka Joxua (hehla ka ribye legi ku na ni ntlhanu wa mahlo ni mambiri), mina nzi ta kehla a mutsalo wa kona, ku wula Jehova wa tiyimpi; hi siku ginwe nzi ta susa a kugoha ka tiko legi.

¹⁰ Hi siku lego, ku wula Jehova wa tiyimpi, munwe ni munwani i ta ramba muakelwane wakwe ku tshama naye lahasi ka xivina ni kuwu wakwe.