Zakaria 2 - Tshwa Bible

A kuoitanwa ka lava va nga hlongolwa.

¹ Nzi na su tlaku mahlo ya mina, nzi wona a wanuna na hi ni lingoti la lipimo canjeni gakwe.

² Nziku kakwe: uya kwihi? Yena aku ka mina: Nzi famba nzi ya pima Jerusalema, nzi ta wona a kuanama ni kuleha ka gona.

³ A ngelosi leyi yi nga wa wulawula na mina yi loya mahlweni, kuta yinwani ngelosi yi yi khinga;

⁴ yiku ka yona: Tsutsuma u ya byela a jaha legiya, uku: Jerusalema gi ta akiwa khwatsi hi miti leyi yi nga hiko na tigingisi, hi kota ya kutala ka vanhu ni zifuyo lezi zi ta ngava lomo.

⁵ Hakuva mina, ku wula Jehova, nzi tava a ligingisi la nzilo lowu wu ta nga gi bhiyela, nziva kungangamela xikari ka gona.

⁶ Ho, ho, tsutsumani hi lomu tikweni ga Nwalungu, ku wula Jehova; nwina lava nzi nga mu hangalasa matlhelweni ya mune wa timheho, ku wula Jehova.

⁷ Ho, Zioni, tsutsuma wena loyi u akileko ka nhanyana wa Babuloni!

⁸ Hakuva Jehova wa tiyimpi i ngalo: Anzhako ka kungangamela i nzi rumile ka matiko lawa ma ku hlaseleko, hakuva loyi a mu khumbako i khumba a nzololwani ya tihlo gakwe.

⁹ Hakuva nzi ta juja a woko ga mina hehla kabye, na vona va ta phangiwa hi malanza yabye; nwina mu ta zi tiva lezaku hi Jehova wa tiyimpi a nzi rumileko.

¹⁰ Yimbelela u tsaka, wena nhanyana wa Zioni! Hakuva nzata, nzi ta tshama xikari ka wena, ku wula Jehova. Isa. 12:6; Joh. 1:14; 2 Kor. 6:16

¹¹ A matiko yo tala ma ta namarela ka Jehova hi siku lego, va tava vanhu va mina. Nzi ta tshama xikari ka wena, zonake u ta zi tiva lezaku hi Jehova wa tiyimpi a nzi rumileko ka wena.

¹² Jehova i ta fumela Juda, ava tshomba yakwe a tikweni gi basileko, a engeta a ti hlawutela Jerusalema.

¹³ A nyama yontlhe ngha yi miyela mahlweni ka Jehova; hakuva i vukile wutshanwini gakwe gi basileko. Hab. 2:20; Zef. 1:7