Zakaria 11 - Tshwa Bible

¹ Lebanoni, vulula tinyangwa ta wena, kasi a nzilo wu ta fela ku hisa a tisedare ta wena.

² Kipres, rila hakuva a sedare yi wile, hakuva a tisinya ti nene ti gohilwe! Nwina mikuhlu ya Baxani, rilani hakuva a likwara li wisilwe.

³ Hi nga zwani a xirilo xa varisi, hakuva a wukosi gabye gi fuvisilwe; ku zwala a kudzuma ka zinghalana hakuva a xihlahla xa Jordani xi lobyisilwe.

A varisi.

⁴ Jehova Nungungulu wa mina i ngalo: Risa a ntlhambi wa tiyivu le to tlhabyiwa;

⁵ leti a vaxavi va tona va ti tlhavako va nga kumi nanzu, ni vaxavisi va tona vange: A khesiwe Jehova, hakuva nzi fumile! Hambu ni varisi va tona a va ti zweli. Rom. 8:36

⁶ Hakuva nzi nga ta ha va zwela wusiwana a vaaki va tiko, ku wula Jehova. Kanilezi nzi ta nyikela munwe ni munwani mandleni ya muakelane wakwe, ni mandleni ya hosi yakwe. Va ta onha tiko, kanilezi nzi nga ta va tlhatlhisa mandleni yabye.

⁷ Zinghaho nzi lo maha murisi wa ntlhambi wa tiyivu ti to tlhabyiwa, a tiyivu ti wonzileko futsi. Nzi lo teka tinhonga timbiri, a yinwe nzi yi vitana ku Wunene, a yinwani nzi yi vitana ku Kuzwanana; zonake nzi lo risa a ntlhambi.

⁸ Hi hweti yinwe nzi lo lovisa varisi vanharu, hakuva a moya wa mina wu wa karele hi tiyivu, ni moya wa tonawu wu wa swihala ha mina.

⁹ Zonake nziku: Nzi nga ta ha mu risa! Leyi yi fako, a yife; ni leyi yi lahlekako, a yi lahleke! Leti ti salako, a yinwe ni yinwani a yige a nyama va yinwani.

¹⁰ Nzi lo teka a nhonga ya mina yi vitwako Wunene nzi yi tshova, kasi nza fela ku tshova a xivumelwano xa mina lexi nzi nga xi maha ni matiko wontlhe.

¹¹ Laha xi nga tshobyiwe sikwini lego, a tiyivu ti nga nyawuliko ta ntlhambi leti ti nga nzi ingisa, ti lo zi tiva lezaku yi wa hi mhaka ya Jehova.

¹² Nziku ka tona: Loku zi kumeka zi sasekile kuwoneni ka nwina, nzi nyikeni a hakhelo ya mina: loku zi nga hi tano, yi tsikeni! Zonake va lo nzi pimela a hakhelo ya mina a 30 wa zipanze za siliva.

¹³ Jehova aku ka mina: Yi hoxe ka muwumbi wa timbita, a ntsengo lowu wa hombe nzi nga pimelwa wona. Nzi lo teka a 30 wa zipanze za siliva nzi zi hoxa ka muwumbi, lomu ndlwini ya Jehova.

¹⁴ Zonake nzi lo tshova leʼyinwani nhonga yi vitwako Kuzwanana, kasi ku tsema a wunakulobye gi nga xikari ka Juda na Israeli.

¹⁵ Jehova aku ka mina: Teka kambe a zibya za murisi wa xipumbu.

¹⁶ Hakuva nzi ta vuxa lomu tikweni a murisi loyi a to kala a nga hlayisi leti ti lahlekileko, ge hambu a ku famba a lava leti ti hangalakileko, ni ku chuma leti ti tshovekileko. A nga ta gisa leyi yi nga tomi, kanilezi i taga a nyama ya leti ti nonileko, a kala a panza ni makhanzo ya tona.

¹⁷ Khombo a give ka murisi a nga nyawuliko, loyi a tsikako a ntlhambi! A supado yi taba a woko gakwe ni tihlo gakwe ga xinene: a woko gakwe gi ta woma, ni tihlo gakwe ga xinene gi tafa. Zak. 13:7; Joh. 10:12