Valamuli 9 - Tshwa Bible

Ahimeleki.

¹ Abimeleki nʼwana Jerubaali i loya le Xekemi ka vakoko vakwe, a ya wulawula ni vontlhe vanhu va yindlu ya raru wa nyine wakwe, aku:

² Wulawulani ni vanhu va Xekemi, muku: A ku fumelwa hi vontlhe vanana va Jerubaali va 70, ni ku fumelwa hi munhu munwe basi, lezi zi nga zinene hi zihi ke? Na mu alakanya kambe lezaku mina nzi marambu ya nwina ni nyama ya nwina.

³ A vakoko vakwe va lo wulawula ha yena ka tontlhe timhaka leto ka vontlhe vanhu va Xekemi, ni timbilu tabye ti lo khegela ka Abimeleki, hakuva va waku: Yena inakulori.

⁴ Va lo mu nyika 70 wa maxekeli ya siliva va nga teka lomu ndlwini ya Baali-Berite, a xava ha wona vanyamijiri va mahanyela ma nga nyawuliko, va mu lanzela.

⁵ I loya ndlwini ya raru wakwe le Ofra a ya daya 70 wa vanakulobye, a vanana va Jerubaali laha ka ribye ginwe. Kanilezi Jotamu a nzisana ya vanana va Jerubaali, i lo pona hakuva i wa fihlele.

⁶ Zonake vontlhe vanhu va Xekemi, ni vontlhe va yindlu ya Milo va lo tsombana va yimisa Abimeleki ku maha hosi, kusuhani ni nkuhlu lowu wu nga le Xekemi.

⁷ Laha Jotamu a nga wa tivile timhaka leto, i lo ya yima hehla ka xitsunga xa Gerezima a kanyuluka aku kabye: Ingisani nwina vanhu va Xekemi, na Nungungulu a mu ingisewo!

⁸ Xinwani xikhati a tisinya ti lo suka ku ya ti yimisela a hosi. Ti lota ka sinya ya oliva ti taku: Maha hosi ya hina!

⁹ Kanilezi a sinya ya oliva yi te ngalo: Nzi ta tsikisa kuyini a kunona ka mina loku ku dzunziwako hi Nungungulu ni vanhu, nzi angamela hehla ka tinwani tisinya ke?

¹⁰ A tisinya ti te ngalo ka sinya ya nkuwu: Ngone wena u ta maha hosi ya hina.

¹¹ Kanilezi a sinya ya nkuwu yi te ngalo ka tona: Nzi nga tsika kutsombela ka mina ni mihanzu ya mina yo nanziha nzi angamela hehla ka tinwani tisinya ke?

¹² A tisinya ti te ngalo ka vina: Ngone wena u ta maha hosi ya hina!

¹³ A vina wuku ka tona: Nzi nga tsika a vinya ga mina legi gi tsakisako Nungungulu ni vanhu nzi angamela hehla ka tinwani tisinya ke?

¹⁴ Zonake tontlhe tisinya ti te ngalo ka munga: Ngone wena u ta maha hosi ya hina.

¹⁵ A munga wuku ka tona: Loku hakunene mu nzi yimisa a kuva hosi ya nwina, zonake ngonani mu chavela hasi ka nzhuti wa mina. Loku zi nge nghaho, ngha nzilo wu huma hi le mungeni wu lovisa a tisedare ta le Lebanoni.

¹⁶ Hikwalaho loku nwina mu mahile khwatsi lezi mu fumisileko Abimeleki, ni loku mu mahile khwatsi ka Jerubaali ni yindlu yakwe, a kuva mu tlhelisele hi fanelo a mitiro ya mandla yakwe;

¹⁷ Hakuva a raru wa mina i lo lwela nwina, a nyikela wutomi gakwe a tlhatlhisa nwina mandleni ya vaMidiani.

¹⁸ Inyamutlha mu vukela a yindlu ya dadani, mu daya vanana vakwe, 70 wa vanhu ka ribye ginwe, mu fumisa Abimeleki a nʼwana wa nanza gakwe, a maha hosi hehla ka vanhu va Xekemi, hilezi a nga nakuloni;

¹⁹ Loku inyamutlha futsi mu sasile ka Jerubaali ni yindlu yakwe, tsakani zinwe na Abimeleki, yenawu a tsaka zinwe na nwina.

²⁰ Kanilezi loku zi nge nghaho, ngha a nzilo wu huma ka Abimeleki wu lovisa a vanhu va Xekemi ni va yindlu ya Milo. Ni kambe ngha nzilo wu huma hi ka vanhu va Xekemi ni ka yindlu ya Milo wu lovisa Abimeleki.

²¹ Zonake Jotamu i lo suka a tsutsuma a ya tshama le Beera hi ku chava nakulobye Abimeleki.

²² Laha Abimeleki a nga wa fumele va ka Israeli malembe manharu,

²³ Nungungulu i lo rumela a moya wo biha ka Abimeleki ni ka vanhu va le Xekemi. A vanhu va le Xekemi va lo kanyisa Abimeleki;

²⁴ kasi a xapi leyi yi nga mahiwa ka 70 wa vanana va Jerubaali, a nkhata wabye wu fela ku tlheliselwa ka nakulobye Abimeleki ni ka vanhu va le Xekemi lava va nga mu kucetela ku daya vanakulobye.

²⁵ A vanhu va le Xekemi va lo mu vekela varinzeli le hehla ka zitsunga; va lo wutla a zilo za vontlhe vahunzi va ndlela leyi va nga wa hi ka yona. Abimeleki i lo byeliwa ha zona.

²⁶ Gaali nʼwana Ebedi i lo tawu ni vanakulobye le Xekemi; a vanhu va le Xekemi va lo mu tsumba.

²⁷ Va lo huma vaya masinwini, va ya kolela mauva va ma kamela, va maha mibuzo, vaya lomu ndlwini ya mingungulu wabye va yaga, vanwa, va rukatela Abimeleki.

²⁸ Gaali nʼwana Ebedi aku: Himani Abimeleki, himani Xekemi wo kala hi mu khozela? A hi yena nʼwana Jerubaali ni nduna yakwe a hi Zebula ke? Khozelani a vanhu va Hamori a nga hi raru wa Xekemi! Kanilezi Abimeleki hina hi ta mu khozelela yini? Gen. 34:2

²⁹ Loku ku wo khwatsi a tiko legi gi fumelwa hi mina, ngha nzi hlongola Abimeleki. Zonake aku ka Abimeleki: Hlomisa a yimpi ya wena u huma!

³⁰ Laha Zebula, a mufumeli wa muti, na zwile timhaka ta Gaali nʼwana Ebedi, i lo zangara nguvu.

³¹ I lo ruma mitsumi ka Abimeleki hi le xihundleni, aku: Gaali nʼwana Ebedi ni vanakulobye, va tile leno Xekemi; va kucetela a muti a kuva wu kuvukela.

³² Hikwalaho vuka ni wusiku ni vanhu lavo u nga navo, uya lavelela le handle.

³³ Zonake ni mixo, laha a gambo gi tsuwukako, u ta Suka u hlasela muti; kasi loku Gaali ni vanhu lava a nga navo vata ku talwa na wena, u ta maha kabye lezi u ta nga zi wonisa zona.

³⁴ Abimeleki i lo vuka ni wusiku ni vontlhe vanhu lava a nga hi navo, va ya lavelela le Xekemi; na va ti avanyisile hi mune wa mitlawa.

³⁵ Makunu Gaali nʼwana Ebedi i lo huma a yima laha nyangweni ya muti. Zonake Abimeleki ni vanhu lava va nga hi naye va lo suka laha va nga wa baramile kona.

³⁶ Laha Gaali a nga wona a vanhu lavo, i te ngalo ka Zebula: A vanhu va relelako hi le zitsungeni! Zebula aku ka yena: Wo wona a minzhuti ya zitsunga uku mbanhu.

³⁷ Gaali i lo engeta aku; Hi lavaya vanhu va relelako hi le hehla, ni tlawa munwani wu tako hi ndlela ya nkuhlu wa Meonenime.

³⁸ Zonake Zebula aku kakwe: A hi wena u ngaku: Himani Abimeleki wo kala hina hi mu khozela ke? A hi vona vanhu lava u va kanyisako ke? Huma makunu ulwa navo!

³⁹ Gaali i lo huma mahlweni ka vanhu va le Xekemi alwa na Abimeleki.

⁴⁰ Abimeleki i lo hlongolisa Gaali a tsutsuma, ku dawa vanyingi kala le nyangweni ya muti.

⁴¹ Zonake Abimeleki i lo ya tshama le Aruma. Zebula i lo hlongola Gaali ni vanakulobye, kasi va nga ha tshami lomu Xekemi.

⁴² Hi manziko wa kona a vanhu va lo huma lahandle; va lo byela Abimeleki.

⁴³ Yena i lo teka a vanhu vakwe a va avanyisa hi mitlawa minharu, zonake a ya lavelela le handle. Laha na a cuwuka, i lo wona a vanhu na va huma hi lomu mutini; i lo tsutsumela ka vona, a yalwa navo.

⁴⁴ Zonake Abimeleki ni tlawa lowu a nga hi nawo va lo tsutsumela le nyangweni ya muti; kanilezi a mitlawa mimbiri yi lo hlongolisa vontlhe lava va nga hi le handle, va va hlasela.

⁴⁵ Abimeleki i lolwa navo gontlhe siku, a kala a enghena mutini a hlasela a vanhu lavo va nga hi lomo, a khungumula muti, a wu xwanyela munyu.

⁴⁶ Laha vontlhe vanhu va lomu khokholeni ga Xekemi va nga wa zwile lezo, va lo ya enghena lomu khokholeni ga tempeli ya El-berite.

⁴⁷ Zonake Abimeleki i lo byelwa lezaku a vavanuna vontlhe va khokhola ga Xekemi va tsombene.

⁴⁸ Abimeleki i lo kanziha xitsungeni xa Zelmoni ni vanhu vontlhe lava a nga wa hi navo. I lo teka xihloka hi canja gakwe a tsema a ravi ga sinya, a gi tlhateka makatleni yakwe, zonake aku ka vanhu lava a nga hi navo: Hatliseni mu maha lezi nzi mahileko.

⁴⁹ A vanhu vontlhe, loyi ni loyi i lo tsema a ravi a lanzela Abimeleki. Va lo ta ma veka laha khokholeni, va hisa a khokhola zinwe ni lava va nga wa hi ka gona. Vontlhe vanhu va Xekemi va lo fisa lezo; va wa hi 1,000 a vavanuna ni vavasati.

⁵⁰ Zonake Abimeleki i loya le Tebeza, a ya vimbezela a muti wa Tebeza a wu khozisa.

⁵¹ Kanilezi leyo ku wa hi kona a khokhola go tiya laha xikari ka muti, laho a vavanuna ni vontlhe vavasati ni vontlhe a vahombe va muti va nga chavela kona, va ya ti valela va kanziha le hehla ka khokhola.

⁵² Abimeleki i lota ka khokhola lego a talwa nago, aya laha nyangweni ya goha kasi ku gi hisa.

⁵³ Kanilezi a wasati i lo hoxa a ribye ga xigayo laha hlokweni ya Abimeleki, a mu faya a xikhwakhwa.

⁵⁴ Zonake Abimeleki i lo hatlisa a vitana a muweleli wa matlhari yakwe, aku kakwe: Hlomula a tlhari ga wena u nzi daya; va ngaku: I delwe hi wasati. A jaha lego gi lo mu tlhava afa. 1 Sam. 31:4

⁵⁵ Laha a vavanuna va ka Israeli va nga wona lezaku Abimeleki i file, va lo hangalaka, loyi ni loyi aya kaya kakwe.

⁵⁶ Nungungulu i lo tlhelisela Abimeleki a kubiha loku a nga ku maha ka raru wakwe, hi ku daya 70 wa vanakulobye.

⁵⁷ Nungungulu i lo tlhelisela kambe hehla ka tihloko ta vanhu va le Xekemi a kubiha kontlhe loku va ku mahileko. A kurukatela ka Jotamu nʼwana Jerubaali ku lowa hehla kabye.