Valamuli 7 - Tshwa Bible

¹ Zonake Jerubaali, loyi a nga Gideoni, ni vanhu vontlhe lava va nga wa hi zinwe naye, va lo vinzuka ni mixo va ya gova le hlobyeni ya Harode, a wugovelo ga vaMidiani na gi hi tlhelo ga Nwalungu, kusuhani ni miganga ya More hi le nzhelelweni.

² Jehova aku ka Gideoni: Va tele nguvu a vanhu lava u nga navo, laha kaku a nzi zi koti ku nyikela vaMidiani canjeni gabye, hakuva Israeli va nga ti dzunza va nzi vukela, vaku: Hi lo ti tlhatlhisa ha hoce. Deut. 8:17

³ Hikwalaho famba makunu u ya byela vanhu uku: Loye a chavako a rurumela, a suke xitsungeni xa Gileade a tlhelela kaya. Laho ku lo tlhela 22,000 wa vavanuna, ku sala ntsena 10,000 wa vavanuna.

⁴ Jehova i lo engeta aku ka Gideoni: A vanhu va ha tele nguvu. Relela navo le matini nzi ta ya ku hlawulele lava u ta nga famba navo. Loye nzi ta nga ku byela, nziku: Loyi i ta famba na wena; yaloye i ta famba na wena. Ni wihi nzi ta ngaku ka wena: Loyi u nga fambi naye; a nga fambi.

⁵ Zinghaho Gideoni i lo relela ni vanhu le matini. Jehova aku ka Gideoni: Kani hi wihi loyi a kapitelako mati hi lirimi lakwe khwatsi i mbyana, u ta mu yimisa tlhelo; zinghaho ni lava va ta nga khizama hi madzolo yabye vanwa.

⁶ A tsengo wa lava va kapiteleko mati nonwini hi mandla yabye va wa hi 300 wa vavanuna; kanilezi lava vanwani vontlhe va lo khizama hi madzolo va korama vanwa mati.

⁷ Jehova aku ka Gideoni: Nzi ta mu tlhatlhisa hi vanhu lava va 300 va kapiteleko mati; nzi ta nyikela vaMidiani mandleni ya wena na vona. Kanilezi a vanwani a va tlhele, loyi ni loyi a famba kaya kakwe. 1 Sam. 14:6; 2 Kro. 14:11

⁸ Zinghaho lava va 300 va lo teka timbuva tabye ni mipunzu yabye. A vanwani va ka Israeli, Gideoni i lo va tlhelisa vaya matendeni yabye, ku sala lava va 300. A wugovelo ga vaMidiani gi wa le nzhelelweni.

⁹ Gwalego wusiku Jehova i te ngalo kakwe: Suka u relela le wugovelweni, hakuva nzi gi nyikele mandleni ya wena.

¹⁰ Kanilezi loku u chava ku relela, famba ni nanza ga wena Pura le wugovelweni gabye,

¹¹ u ta yazwa lezi va ta nga wula, anzhako ka lezo a mandla ya wena ma ta tiyiswa; zonake u ta relela uya le wugovelweni gabye. Zinghaho i lo relela zinwe ni nanza gakwe Pura, vaya le magumo ka vavanuna lava va nga wa hlomile lomu wugovelweni.

¹² A vaMidiani ni vaAmaleki, ni vanana va le Mutsuwuka-gambo, vontlhe va wa mbambamele lomu nzhelelweni khwatsi i humbi kutala, ni makameli yabye ya tsanza-vahlayi ma wa ku khwatsi i seke ga bimbi a kutala:

¹³ Laha Gideoni a nga chikela, ku wa hi kona a munhu a nga hlawutela a noro ka munwe wa va ka kabye, aku: Nzi lorile noro; nzi lorile a xikhekhetselo xa xibaba xa sevada na xi khingirikela lomu wugovelweni ga vaMidiani, kala xi chikela laha tendeni xi giba, giwa lahasi gi ku baratata.

¹⁴ Inaloye a hlamula, aku: A noro lowu a wu wuli xinwani xilo, loku ku nga hi supado ya Gideoni nʼwana Joaxi, a wanuna wa ka Israeli. Jehova i nyikele vaMidiani ni yimpi yontlhe mandleni yakwe.

¹⁵ Ku te loku Gideoni a zwile timhaka ta noro lowo ni tlhamuselo wa tona, a khongela. Zonake i lo tlhelela le wugovelweni ga vaIsraeli, a yaku: Sukani, hakuva Jehova i nyikele a yimpi ya vaMidiani mandleni ya nwina.

¹⁶ I lo avanyisa a vavanuna lavo va 300 va maha mitlawa minharu, munwe ni munwani a mu nyika a mpunzu ni mbita ya phanga ni nwenge lomu mbiteni.

¹⁷ Aku kabye: Nzi cuwukani, mu maha lezi nzi ta nga maha. Loku nzi chikela le wugovelweni, mahaniwu za lezi nzi to maha.

¹⁸ Loku nziba mpunzu, zinwe ni vontlhe lava va nga na mina, nwinawu vanani mipunzu ka wontihe matlhelo ya wugovelo, na muku: Supado ya Jehova ni ya Gideoni.

¹⁹ Zinghaho Gideoni i lo famba ni 100 wa vavanuna lava va nga wa hi zinwe naye, va ya chikela le magumo ka wugovelo kusanguleni ka xirinzo xa laha xikari ka wusiku, na varinzeli va ha ku vekiwa. Va loba mipunzu, va faya a timbita leti va nga wa welele.

²⁰ A mitlawa yontlhe ya yinharu yi loba mipunzu na va faya timbita, loyi ni loyi a welele a nwenge canjeni gakwe ga xibhabha, ni mpunzu canjeni ga xinene, na vaba huwa, vaku: Supado ya Jehova ni ya Gideoni!

²¹ Va lo yima, munwe ni munwani wutshanwini gakwe, va ranzela a wugovelo. Vontlhe lava va nga wa hi lomu wugovelweni va lo sangula ku tsutsuma va ya ti chela seno ni seno, na vaba huwa, va pfowola.

²² Kanilezi laha lava va 300 va nga waba mipunzu, Jehova i lo maha vaMidiani va tlhavana ha voce hi matlhari yabye lomu wugovelweni gontlhe. A yimpi yontlhe yi nga hi lomu wugovelweni yi tsutsuma kala le Bet-xita, hi tlhelo ga le Zerera, va ya chikela le mbhinganweni wa Abeli-mehola, hi tlhelo ga le Tahate. 1 Sam. 14:20; Tis. 83:9

²³ Zonake a vavanuna va ka Israeli, ni va ka Naftali, ni va ka Axeri, ni vontlhe va ka Manasa, va lo tsombana va hlongolisa vaMidiani.

²⁴ Gideoni i lo rumela a mitsumi ka vontlhe lava va nga zitsungeni za ka Efraime, aku: Relelani hi ta hlasela vaMidiani. Mu ta vala hi le matini kala le Bet-bara, ni le Jordani. Zinghaho vontlhe vavanuna va ka Israeli va lo tsombana, va vala hi le matini kala le Bet-bara ni le Jordani.

²⁵ Va lo khoma tihosi timbiri ta vaMidiani, Oreba na Zeebe; va lo daya Oreba le ribyeni ga Oreba, Zeebe va lo mu daya le xigowolweni xa Zeebe, va hlongolisa vaMidiani. Va lo neha hloko ya Oreba ni ya Zeebe ka Gideoni le tlhatukweni wa Jordani. Isa. 9:4; 10:26