Valamuli 4 - Tshwa Bible

Debora na Barake.

¹ Anzhako ka kufa ka Ehudi, a vanana va ka Israeli va lo engeta va maha kubiha mahlweni ka Jehova.

² Jehova i lo va nyikela mandleni ya Jabina a hosi ya le Kanani, loyi a nga wa fumile le Hazora, a nduna ya yimpi yakwe a nga wa hi Sisera, loyi a nga wa akile le Haroxete wa vamatiko. Jox. 11:10; 1 Sam. 12:9

³ Zonake a vanana va ka Israeli va lo rila ka Jehova, hakuva Sisera i wa hi ni 900 wa tikareta ta ziketse. A 20 wa malembe i lo tsimbeketa a vanana va ka Israeli hi ntamu.

⁴ Makunu xikhatini lexo muprofeti Debora, a sati wa Lapidota, i lo lamula va ka Israeli,

⁵ I wa tshamile lahasi ka sinya ya cinzu wa Debora xikari ka Rama na Beteli le xitsungeni xa ka Efraime. A vanana va ka Israeli va lo kanziha va ya lamulwa hi yena.

⁶ Debora i lo vitanisa Barake nʼwana Abinoame, wa le Kedexi-Naftali, aku kakwe: Ingisa. Jehova Nungungulu wa ka Israeli i leletele lezaku famba uya kanziha xitsungeni xa Tabora zinwe ni 10,000 wa vananuna va ka Naftali ni vanana va ka Zabuloni. Maheb. 11:32

⁷ Nzi ta neha Sisera, a nduna ya yimpi ya Jabina, le Congweni wa Kixoni, zinwe ni tikareta takwe ni mabutho yakwe, nzi ta mu nyikela canjeni ga wena.

⁸ Barake i te ngalo kakwe: Loku hi famba hontlhe, nzi ta famba; kanilezi loku hi nga fambi hontlhe, cima nzi nga ta famba.

⁹ Debora aku: Hakunene, nzi ta famba na wena: kanilezi u nga tava na wudzunzo pfhumbeni ga kona, hakuva Jehova i ta nyikela Sisera canjeni ga wasati. Debora i lo suka aya Kedexi na Barake.

¹⁰ Barake i lo hlomisa va ka Zabuloni ni va ka Naftali vata le Kedexi. I lo kanziha ni 10,000 wa vavanuna, Debora a kanzihawu navo.

¹¹ Makunu Hehera a muKeni i wa ti hambanyisile ni va ka kabye, a vanana va Hobaba, muxade wa Mosi, a ya zimeka a tenda gakwe kusuhani ni nkuhlu wa le Zananime, kusuhani ni le Kedexi.

¹² Makunu Sisera i lo tiviswa lezaku Barake nʼwana Abinoame i kanzihile xitsungeni xa Tabora.

¹³ Sisera i lo tsombanyisa tontlhe tikareta takwe ta ziketse ta 900, ni vanhu vakwe vontlhe, kusukela le Haroxete wa vamatiko, kala le Congweni wa Kixoni.

¹⁴ Debora aku ka Barake: Suka, hakuva nyamutlha hi gona siku legi Jehova a nyikeleko Sisera canjeni ga wena! Jehova a nga ku rangelangi mahlweni ke? Zinghaho Barake i lo relela hi le xitsungeni xa Tabora ni 10,000 wa vavanuna.

¹⁵ Jehova i lo hlasela Sisera ni tikareta takwe tontlhe, ni yimpi yakwe yontlhe mahlweni ka Barake hi wutlha ga supado. Sisera i lo jatama kareteni yakwe a tsutsuma hi milenge.

¹⁶ Kanilezi Barake i lo hlongorisa tikareta ni yimpi ya kona kala le Haroxete wa vamatiko, a yimpi yontlhe ya Sisera yi hlaselwa hi supado, ku nga poni ni munhu munwe.

¹⁷ Zinghaho Sisera i lo tsutsumela tendeni ga Jaeli, a sati wa Hehera a maKeni, hakuva ku wa hi kona kurula xikari ka Jabina a hosi ya le Hazora ni yindlu ya ka Hehera a maKeni.

¹⁸ Jaeli i lo huma a khinga Sisera, aku kakwe: Ngone seno, hosi yanga, hambukela seno u ta enghena ndlwini ya mina, u nga chavi! Sisera, i lo hambuka aya tendeni gakwe, Jaeli i lo mu fenengeta hi nguwo.

¹⁹ Sisera aku kakwe: Hi nga nziha matanyana nzinwa, nzi na ni tora. Jaeli i lo vulula a nghotso ya masi a mu nyika anwa, a tlhela a mu fenengeta.

²⁰ Sisera aku kakwe: Yima hi laho nyangweni, kasi loku kuta munhu a ta wutisa aku: I kona munhu lomu ke? U taku: Ahihi.

²¹ Zonake Jaeli kata Hehera i lo hlomula a xikhongwani xa tenda, a teka a nkono a nyanima aya ka Sisera, a ya belela xikhongwani laha xitlongweni xakwe, xi si phondla xi zima lahasi; a si fisa lezo, hakuva i wa etlele wurongo ga tshongotshongo hi kukarala.

²² Khwatsi hi lezi Barake a nga wata a lanza Sisera, Jaeli i lo huma a mu tlhangaveta, aku kakwe: Ngone nzi ta ku komba a munhu loyi u mu lavako. I lo enghena tendeni gakwe, a ya kuma Sisera na file, a xikhongwani na Xi woneka lomu zitlongweni zakwe.

²³ Zinghaho a siku lego Nungungulu i lo khozisa Jabina a hosi ya le Kanani kuwoneni ka vanana va ka Israeli.

²⁴ A va ka Israeli va lo simama valwa na Jabina a hosi ya le Kanani kala va mu lovisa.