Valamuli 19 - Tshwa Bible

A kubiha ka le Gibea.

¹ Masikwini lawa Israeli a nga kala a nga hi na hosi, ku wa hi ni muLevi a nga wa luvela le xitsungeni xa ka Efraime, a nga wa tekile a mundlukulu le Betlehema-Juda.

² A mundlukulu loyi wakwe i lo bomba hi wuoswi, a suka aya ka raru wakwe le Betlehema-Juda, a ya tshama leyo Xipimo xa mune wa tihweti.

³ A nuna wakwe i lo suka a mu lanza, a ya wulawula naye hi wuxinji kasi a fela ku wuya naye kaya; i wa hi ni nanza gakwe ni timbongola timbiri. A sati loye wakwe i lo mu amukela a mu rurela ndlwini ya raru wakwe. Laha a raru wa muni a nga mu wona i lo mu tsakela.

⁴ A raru wakwe wo pswala sati i lo mu thindekisa, a tshama laho masiku manharu, vaga, vanwa, va etlela leyo.

⁵ Hi siku ga wumune va lo vinzuka ni mixo; laha a muLevi a nga wa lava ku famba, a raru i te ka mwane wakwe: Fihlula hi xikhemu xa xibaba, anzhako ka lezo mu ta khoma ndlela ya nwina.

⁶ Zinghaho va lo tshama vaga, vanwa, hi wumbiri gabye. A raru wa sati, aku: Xwena kambe wusiku legi, u tsakisa a mbilu ya wena.

⁷ A wanuna a si kakatsuko, ku lava ku khoma ndlela. A raru wakwe i lo mu khongotela; kala axwa laho kambe.

⁸ Hi siku ga wuntlhanu i lo vinzuka ni mixo a ku i ta famba; a raru wa sati aku: Ha, mwane, rutisa mbilu ya wena u rinzela kala gi sangula ku pepa. Va lo tshama vaga hi wumbiri gabye.

⁹ Laha a wanuna a nga suka kasi ku famba, ni sati wakwe, ni nanza gakwe, a raru wakwe aku: E, a gambo gi pelile; etlela. Hi nga wona, wusiku makunu; xwana u tsakisa a mbilu ya wena. Manziko u ta vukela ku khoma ndlela u famba kaya.

¹⁰ Kanilezi a wanuna i lo ala kuxwa lego wusiku; i lo suka a famba a ya chikela kusuhani ni Jebusi (ku nga Jerusalema); i wa hi ni timbongola timbiri ti nga gabhatselwe. I wa hi ni mundlukulu wakwe.

¹¹ Laha na va chikele le Jebusi, a gambo gi lo pela. A nanza giku ka hosi ya gona: A hi hambukeni laha ka muti lowu wa maJebusi hi etlela kona.

¹² A nwinyi wakwe aku ka yena: A hi zi koti ku hambuka ka muti wa vamatiko, wu nga hiko muti wa va ka Israeli. A hi wu hunzeni hiya le Gibea.

¹³ A engeta aku ka nanza gakwe: A hi yeni mahlweni ka ginwe ga matshamu lawaya, hi ta ya etlela le Gibea kutani le Rama.

¹⁴ Hilezo va lo hunza vaya mahlweni. Gi lo va pelela na va hi kusuhani ni Gibea ga ka Benjamini.

¹⁵ Va lo hambuka le Gibea a ku ya etlela kona wusiku lego. Va lo enghena mutini va ya tshama nyangweni ya muti, hakuva a nga kona ni munwe a nga va rurela ndlwini yakwe.

¹⁶ Ku lo chikela a xikhosana xi nga wa wuya hi le ntirweni le masinwini ya xona xikhatini xa gambo; a nuna loyi i wa hi muluveli a humelako xitsungeni xa ka Efraime. Kanilezi a zisumbulwa za wutshamu lego zi wa hi za ka Benjamini.

¹⁷ I te aku hafu mahlo, a si wona a mufambi laha nyangweni ya muti; a xikhosana lexo xi nge: Woya kwihi? U humela kwihi?

¹⁸ Yena aku: Hi humela le Betlehema-Juda, na hiya le tlhelweni ga xitsunga xa ka Efraime, ku nga kona nzi humelako kona mina. Nzi wa loya le Betlehema-Juda. Makunu nziya ndlwini ya Jehova, kanilezi a ku na munhu wa ku nzi rurela ndlwini yakwe;

¹⁹ kasilezo nzi na ni byanyi ni kuga ka timbongola ta hina; ni kambe nzi na ni vinya ni zibaba zi ringanako mina ni nanza ga wena ga xisati, ni mufana loyi a malanza ya wena ma nga naye; ku hava nchumu xi kiyelako.

²⁰ A xikhosana xiku kakwe: A kurula a kuve na wena! Ni zihi zi ku kiyelelako, nzi ta ku lavela. Ntsena lezaku u nga etleli laha nyangweni wusiku legi.

²¹ Zinghaho i lo mu rurela ndlwini yakwe, a nyika a timbongola a kuga ka tona, vona va hlamba mikonzo yabye vaga, vanwa.

²² Na va ha ti tsakisa, a vavanuna va nyamijiri va muti lowo va lo ta ranzela a yindlu vaba livati, vaku ka xikhosana lexo xa nwinyi wa yindlu: Humesa inaloye a enghenileko ndlwini ya wena, hi lava ku mu tiva! Gen. 19:5; Hos. 9:9

²³ A nwinyi wa muti i lo huma a yaku kabye: Ahihi vamakabye, mu nga mahi kubiha ka lixaka lolo. Lezi mu wonako lezaku inaloyi i tile ndlwini ya mina, mu nga mahi zilo za tingana.

²⁴ A nʼwana wa mina wa nhwana hi loyi, ni mundlukulu wakwe kambe hi loyi; mahani ha vona a zilo za tingana za kuranza ka nwina. Kanilezi inaloyi mu nga mahi manyala ka yena.

²⁵ Kanilezi a vanhu lavo a va mu ingisangi. Zinghaho a wanuna loye i lo khoma a mundlukulu wakwe a mu humesa ka vona. Vona va lo mu tiva, va mu xakela wusiku lego gontlhe kala gica. Kutsuwukeni ka gambo va lo mu tsika a famba.

²⁶ Zonake i lota wasati loye laha gi cako, a tawa laha nyangweni ya yindlu leyo ku nga hi ni nwinyi wakwe, a tshama kona kala gi huma gambo.

²⁷ A nwinyi wakwe i lo vuka ni mixo a vulula tivati ta yindlu, a huma lahandle a kuva a tlhavinyeta a pfhumba gakwe; kanilezi i lo wona a mundlukulu wakwe na a la su nhavalala laha nyangweni, a mandla yakwe na ma hi laha ka xipimbitsi.

²⁸ Aku kakwe; Vuka hi famba! Kanilezi a nga hlamulangi nchumu. A nuna wakwe i lo mu teka a mu kanzihisa laha mbongoleni, a famba a ya chikela kaya.

²⁹ Loku a chikele kaya, i lo teka mukwana a khoma a mundlukulu wakwe a mu phaphulela 12 wa zipanze, a zi rumela tikweni gontlhe ga ka Israeli.

³⁰ Vontlhe lava va nga wa zi wona, va waku: Kusukela a siku legi a va ka Israeli va nga huma Gipite, kala nyamutlha, cima a ku na nga maheka hambu ku woniwa a zilo Za kunghahi. Hlolisisani mhaka leyi, mu xuxa ha yona, mu tsema xikungo.