Valamuli 18 - Tshwa Bible

¹ Masikwini lawo Israeli i wa nga hi na hosi. Ka walawo masiku, a vanhu va lixaka la ka Dani va lo ti lavela a tiko legi gi ta ngava tshomba yabye, va aka ka gona, hakuva va wa nga se avelwa tshomba lomu xikari ka tixaka ta ka Israeli kala lego siku. Jox. 19:40

² Hikwalaho a vanana va ka Dani va lo hlawula 5 wa tinhenha xikari kabye, ti sukelako Zora ni le Extaoli, va ti ruma ku ya hlola a tiko va gi cuwukisisa. Va te ngalo ka vona: Fambani mu ya hlola a tiko! Va lo famba, kala va ya chikela ka Mika le xitsungeni xa ka Efraime, va etlela laho.

³ Na va hi kusuhani ni yindlu ya Mika, va lozwa a gezu ga jaha legi ga muLevi. Va lo gi tiva. Zonake va lo hambuka vaya kakwe, va yaku: Himani a nga ku tisa leno? Wo maha yini kwalaha? Timhaka muni u nga nato laha ke?

⁴ Yena aku kabye: Hi Mika a nzi maheleko lezi ni lezi, a nzi nyika ni hakhelo, ni kambe nzi mupristi wakwe.

⁵ Vona va te kakwe: Hi nga wutisa Nungungulu, kasi ha tiva loku hi ta humelela pfhumbeni ga hina.

⁶ A mupristi aku kabye: Fambani hi kurula; a ndlela leyi mu fambako ha yona yi le mahlweni ka Jehova.

⁷ Zonake a vavanuna lavo va ntlhanu va lo suka va famba, va ya chikela le Laixa, va ya wona a vanhu va kona na va tshamekile khwatsi maSidoni, na va tangele va nga chavi nchumu. Ku wa nga hi na munhu tikweni lego wa ku va fumela hi titsheku; va wa hi kule ni vaSidoni, va wa nga hi na mhaka ni vanwani vanhu.

⁸ Va lo tlhela vaya ka vamakabye vabye lava na nga hi le Zora ni le Extaoli. A vamakabye vabye vaku: Mu yini ke?

⁹ Vona vaku: Sukani hi famba hi ya va hlasela, hakuva hi wonile a tiko lego go saseka nguvu. Mu miyelela yini? Mu nga lolohi ku famba, hi ya khozisa a tiko lego go saseka.

¹⁰ Loku mu chikela kona, mu ta ya kuma a vanhu lava va nga chaviko nchumu, ni tiko ga hombe; hakuva Nungungulu i gi nyikele ka nwina, a tiko gi nga vumaliko nchumu wa zilo za misava.

¹¹ Zonake ku lo suka 600 wa vavanuna va ka Dani, va sukela le Zora ni le Extaoli na va hlomile;

¹² va lo kanziha va ya gova le Kiriate-Jearime wa Juda. Hi xigelo lexo ku vitanwako ku Zumbo ga Dani kala lezi. Kona ku le nzhako ka Kiriate-Jearime.

¹³ Zonake va lo suka laho va ya chikela ka Mika le xitsungeni xa ka Efraime.

¹⁴ Zonake a ntlhanu wa vavanuna lava va nga wa yile ku ya hlola tiko ga le Laixa, va lo wutisa vamakabye vabye, vaku: Ma zi tiva lezaku lomu tindlwini leti ku na ni efode, ni terafime, ni xifananiso xi vatlilweko ni xinwani xi wumbilweko ke? Hikwalaho ehleketani makunu lezi mu ta nga ya maha.

¹⁵ Va lo hambuka vaya kona, va ya enghena ndlwini ya jaha ga muLevi, ku nga ndlwini ya Mika, va mu losa.

¹⁶ A vavanuna lava va hlomileko va 600, a vana va Dani, va lo yima laha nyangweni, na va welele matlhari yabye.

¹⁷ A ntlhanu wa vavanuna lava va nga wa yile ku ya hlola tiko, va lo kanziha lomu ndlwini va ya teka a xifananiso xi vatlilweko, ni efode, ni terafime, ni xifananiso xi wumbilweko; a mupristi yena i wa yimile laha nyangweni ni 600 wa vavanuna lava va hlomileko.

¹⁸ Laha a ntlhanu lavo wa vavanuna va nga enghena lomu ndlwini ya Mika, va lo teka xifananiso lexi xo vatliwa, ni efode, ni terafime ni xifananiso lexi xo wumbiwa; a mupristi aku kabye: Zini mu mahako?

¹⁹ Vona va te ngalo kakwe: Rutisa, u vala a nomu wa wena hi canja ga wena u famba na hina, u ta maha raru ni mupristi wa hina. A kuva mupristi wa yindlu ya munhu munwe u zi wona zi hi chukwana ku hunza a kuva mupristi wa ngango munwe ni wa lixaka la ka Israeli ke?

²⁰ A mbilu ya mupristi yi lo tsaka, a teka efode, ni terafime, ni xifananiso xi vatlilweko, a enghena xikari ka vanhu lavo.

²¹ Va lo suka va famba, va rangisa a vanana ni mitlhambi, ni nhunzu le mahlweni.

²² Na va fambile pfhukana kusukela ka yindlu ya Mika, a vaakelane va Mika va lo tsombana va lanza a vanana va ka Dani.

²³ Va lo kanyuluka va va vitana; a va ka Dani va lo hunzuluka va cuwuka nzhako, vaku ka Mika: Na u bayiswa hi yini ko kala uta ni ntlawa wa ku nghahi?

²⁴ Yena aku: Hi lezi mu tekileko vanungungulu va mina lava nzi va mahileko, ni mupristi wa mina, mu famba navo. Xini nzi seleko naxo? Ni lezi mu nge: Wo bayiswa hi yini!

²⁵ A vanana va ka Dani vaku kakwe: U nga zwati a gezu ga wena, u nga tshekulelwa hi vavanuna va xizangazangani u dawa ni vanhu va muti wa wena.

²⁶ A va ka Dani va lo khoma ndlela yabye va ti fambela. Laha Mika a nga wona lezaku mbanhu va ntamu ku hunza yena, i lo tlhela aya kaya kakwe.

²⁷ Vona va lo teka lezi zi nga mahilwe hi Mika, zinwe ni mupristi wakwe, vaya le Laixa ka vanhu vo rula, va tshamekileko, va ya va hlasela hi wutlha ga supado, va hisa muti wabye.

²⁸ Ku wa nga hi kona a munhu wa ku va lamulela, hakuva va wa hi kule ni le Sidoni, ni kambe a vanhu va kona va wa nga hi na makungo ni vanwani vanhu. A muti lowo wu wa hi le nzhelelweni wa Bet-Rehoba.

²⁹ Va lo vuxa muti va aka ka wona va wu chula vito ga Dani a raru wabye, loyi wo belekwa hi Israeli. Kanilezi a vito ga wona ga kale ku wa hi Laixa.

³⁰ A vanana va ka Dani va lo ti yimisela a xifananiso lexo xo vatliwa. Jonatani nʼwana Gerexome wa Mosi, zinwe ni vana vakwe, va lo maha vapristi va lixaka la ka Dani kala siku ga ku khomiwa va yiswa wukhumbini. Ekso. 2:22; 1 Tih. 12:30; 2 Tih. 17:23

³¹ Zinghaho va lo ti yimisela a xifananiso xi vatlilweko, lexi xi nga wa mahilwe hi Mika, xontlhe xikhati lexo a yindlu ya Nungungulu yi nga wa hi le Xilo.