Valamuli 16 - Tshwa Bible

¹ Samsoni i loya le Gaza; leyo i lo ya wona a wasati wa xibhayi, a enghena ka yena:

² Ku lo zwala a nduma ka va le Gaza, yaku: Samsoni i tile lomu. Va lo mu ranzela va mu lavelela gontlhe wusiku laha nyangweni ya muti. Va lo miyela gontlhe wusiku, vaku: Ga ha taca, hi ta mu daya manziko,

³ Kanilezi Samsoni i lo etlela kala xikari ka wusiku. Zonake i lo vuka a tlemerela a tivati ta nyangwa ya muti ni timhanze ta kona ta timbiri, a ti simula ni tivati ta kona, a zi rwala makatleni yakwe a zi yisa le hehla ka xitsunga lexi xi cuwukeneko ni Hebroni.

⁴ Anzhako ka lezo i lo ranzana ni munwani wasati loyi a nga wa hi le minzhelelweni ya Soreka, a vito gakwe a nga hi Delila.

⁵ Zonake a tihosi ta maFilistia ti lota kakwe ti taku: Mu xengetele, kasi u fela ku tiva laha wu tshamileko kona a ntamu wakwe wa hombe ni laha hi ta nga zi kota ku mu hlula ha kona, kasi hi fela ku mu boha hi mu tshekulela. Munwe ni munwani wa hina i ta ku nyika 1,100 wa maxekeli ya Siliva.

⁶ Delila aku ka Samsoni: Hi nga nzi byela laha wu tshamileko a ntamu wa wena wa hombe, ni laha kaku loku u bohiwa ha kona u nga have na ntamu.

⁷ Samsoni i te ngalo: Loku va nzi boha hi 7 wa tisinga to tsakama, nzi ta rereka nzi fanana ni vanwani vanhu.

⁸ Zonake a tihosi ta maFilistia ti lo neha 7 wa tisinga ta ha tsakamako ka yena, a ta mu boha ha tona.

⁹ Ku wa hi ni vavanuna va nga wa fihlele lomu ndlwini. Delila aku ka Samsoni; Ehe! Samsoni, hi lawa maFilistia. Samsoni i lo bhewula tisinga leto, khwatsi lihinza la xikwenga loku li khumbiwa hi nzilo. Zinghaho a ntamu wakwe a wu tibyiwangi laha wu nga hi kona.

¹⁰ Delila i te ka Samsoni: U nzi khohlisile u nzi byela wunwa. Nzi byele laha u bohiwako ha kona.

¹¹ Yena aku kakwe: Loku nzi bohiwa nguvu hi magota ya maswa lawa ma nga tirangiko nchumu, nzi ta rereka nzi fanana ni vanwani vanhu.

¹² Delila i lo teka magota ya maswa a mu boha ha wona, aku kakwe: Samsoni, hi lawa maFilistia. A valaveleli va wa hi lomu ndlwini. I lo bhewula magota lawo ma nga bohile mawoko yakwe, khwatsi lihinza.

¹³ Delila aku ka Samsoni: Wa ha nzi khohlisile u nzi byela wunwa. Nzi byele laha u nga bohiwako ha kona. Yena aku: Loku wa nga luka 7 wa miluko ya misisi ya hloko ya mina, u yi lukela ni tingoti leti va lukako ha tona!

¹⁴ Delila i lo yi luka a yi tiyisa hi mhingu, aku kakwe: Ehe! Samsoni, hi lawa maFilistia! I lo vuka hi lomu wurongweni a hlomula a mhingu lomu ka misisi ni tingoti ta kona.

¹⁵ Delila aku kakwe: Hi kuyini uku wa nzi ranza, a mbilu ya wena yi nga hi ka mina? Hi nga wona, u nzi khohlisile zikhati zinharu, u nga nzi byeli laha a ntamu wa wena wa hombe wu nga ha kona.

¹⁶ Hi kota yo tshama a mu karata wontihe masiku hi timhaka takwe, a mu kurumeta, a mbilu yakwe yi lo karateka ga kufa.

¹⁷ I lo mu byela zontlhe za mbilu yakwe, aku: Hi cima, a nzi se ringiwa a hloko ya mina hi likari, hakuva nzi muNazirita wa Nungungulu, kusukela rumbyini ga mamani wa mina. Hikwalaho loku nzi ringiwa, a ntamu wa mina wu ta mbhela, nzi rereka ku fanana ni vanwani vanhu. Mitse. 6:5

¹⁸ Laha Delila a nga wona lezaku i mu byelile zontlhe za mbilu yakwe, i lo vitanisa a tihosi ta maFilistia, aku: Ngonani inyamutlha, hakuva i nzi byelile zontlhe zi nga mbilwini yakwe. Zonake a tihosi ta maFilistia ti lo kanziha tiya na ti welele mali mandleni yabye.

¹⁹ Delila i lo mu etlelisa laha madzolweni yakwe, a vitana munhu a ta mu cinga a miluko ya ntlhanu ni mimbiri ya hloko yakwe, a sangula ku mu xanisa. A ntamu wakwe wu wa mbhelile.

²⁰ I te ngalo kakwe: Ehe! Samsoni, Hi lawa maFilistia! I lo vuka hi lomu Wurongweni gakwe, aku: Nzi ta ti ponisa khwatsi hi manwani masiku, nzi ti vikela mandleni yabye; na a nga zi tivi lezaku Jehova i humile ka yena.

²¹ A maFilistia ma lo mu khoma, ma mu xokolela mahlo, ma relela naye le Gaza; va lo mu boha hi tisenga timbiri ta suku. I lo gaya lomu paxweni. Ekso. 11:5; 2 Tih. 25:7

²² Kanilezi a misisi ya hloko yakwe yi lo sangula ku kula, khwatsi hi kusanguleni na nga se ku ringiwa.

²³ A tihosi ta maFilistia ti lo tsombana a ku ta maha a miphahlo ka nungungulu wabye Dagoni; va lo maha miphahlo ya hombe nguvu ni mibuzo, vaku: Nungungulu wa hina i hi nyikile Samsoni a nala wa hina mandleni ya hina.

²⁴ Laha a vanhu va nga mu wona, va lo dumisa nungungulu wabye, vaku: Nungungulu wa hina i nyikile a nala wa hina mandleni ya hina, loyi a nga wa xakela a tiko ga hina, loyi a hlaseleko a vanhu va ka hina.

²⁵ Laha a timbilu tabye ti nga wa tsaka, va te ngalo: A ku vitanwe Samsoni a ta hi hlekisela. Va lo ya teka Samsoni lomu paxweni a ta va hlekisela, na va mu yimisile laha xikari ka timhanze ta tempeli.

²⁶ Samsoni i te ngalo ka mufana loyi a nga wa mu khomile hi canja: Nzi yimise hi laha ka timhanze leti ti tiyisako yindlu nzi khometela tona nzi khegela ka tona.

²⁷ A yindlu leyo yi wa tele hi vavanuna ni vavasati. Tontlhe tihosi ta maFilistia ti wa hi konawu; le langweni ku wa tele hi vavanuna ni vavasati, kusuhani ka 3,000; lava va nga tela ku ta wona Samsoni na a va hlekisela.

²⁸ Zonake Samsoni i lo vitana ka Jehova, aku: Hosi Jehova, nzi alakanye! Nungungulu nzi nyike ntamu zalezi, nzi ti photela a mahlo ya mina ya mambiri ka maFilistia. Maheb. 11:32

²⁹ Samsoni i lo khoma timhanze timbiri leti ti tiyisako a yindlu, a khegela ka tona. A yinwe yi wa hi reveni gakwe ga xibhabha a yinwani na yi hi reveni gakwe ga xinene.

³⁰ Samsoni i te ngalo: A nzife ni maFilistia lawa! I lo korama hi ntamu wakwe wontihe, ni yindlu yi lo wela hehla ka tihosi ni vanhu vontlhe lava va nga wa hi lomo. Hikwalaho a kufeni kakwe i lo daya a vanhu vo tala ku hunza lava a nga daya kuhanyeni kakwe.

³¹ Zonake a vamakabye vakwe ni vontlhe vanhu va yindlu ya raru wakwe va lo ta mu teka, va ya mu lahla xilahleni xa raru wakwe Manoa, xikari ka Zora ni Extaoli. I wa lamulile Israeli 20 wa malembe.